Gwefan llywodraeth y DU

Pwy all gael credydau treth?

Os oes gennych blant mae’n bosib y gallwch gael credydau treth, ond nid oes bod gennych blant i wneud cais. Gallwch hefyd fod yn gymwys os ydych yn gweithio ac ar incwm isel.

• Cadarnhau a ydych yn gymwys i gael credydau treth - holiadur cyflym

Pa fath o gredydau treth y gallwch eu cael?

Gallwch gael un o'r canlynol - neu'r ddau.

Credyd Treth Gwaith

Mae Credyd Treth Gwaith yn seiliedig ar yr oriau rydych yn eu gweithio ac rydych yn cael eu talu amdanynt, neu'n disgwyl cael eich talu amdanynt. Gallwch hawlio p'un a ydych yn gyflogai neu'n hunangyflogedig. Ond nid yw gwaith di-dâl yn cyfrif ar gyfer Credyd Treth Gwaith

• Beth sy'n cyfrif fel gwaith ar gyfer Credyd Treth Gwaith?

Credyd Treth Plant

Telir Credyd Treth Plant i chi os ydych yn gyfrifol am o leiaf un plentyn neu berson ifanc sydd fel arfer yn byw gyda chi. Nid oes rhaid i chi fod yn gweithio i hawlio Credyd Treth Plant.

• Mae gennych blant - a allwch gael credydau treth ar eu cyfer?

Faint fyddwch chi’n ei gael?

Bydd faint o gredydau treth a gewch yn dibynnu ar bethau fel:

• faint o blant sy'n byw gyda chi
• os ydych yn byw gyda rhywun fel cwpl
• p'un a ydych yn gweithio - a faint o oriau rydych yn eu gweithio
• os ydych yn talu am ofal plant
• os oes gennych chi neu unrhyw blentyn sy'n byw gyda chi anabledd

Mae eich taliadau hefyd yn dibynnu ar eich incwm. Y lleiaf yw eich incwm, y mwyaf o gredyd treth y gallwch ei gael.

• Cyfrifiannell credydau treth - cael gwybod faint y gallwch chi ei gael

• Sut y caiff eich hawl i gael credydau treth ei chyfrifo

Beth yw'r terfynau incwm cyfredol ar gyfer cael credydau treth?

Mae a fyddwch yn gymwys i gael credydau treth, a faint y gallwch ei gael, yn dibynnu ar eich amgylchiadau chi eich hun.

Fel canllaw bras, os nad yw eich incwm blynyddol yn fwy nag un o'r 'terfynau' canlynol, mae'n debyg y gallwch gael credydau treth:

• os oes gennych un plentyn £26,000 ydyw
• os oes gennych dau blentyn £32,000 ydyw
• os ydych yn sengl heb blant £13,000 ydyw
• os ydych mewn cwpl heb blant £18,000 ydyw

Dyma'r terfynau ar gyfer cael credydau treth yn y flwyddyn dreth bresennol - yn dod i ben ar 5 Ebrill 2013.

Nid ydych yn debygol o gael unrhyw beth os yw eich incwm yn fwy na'r symiau hyn. Ond mae'n bwysig gwybod y canlynol:

• nid yw'r terfynau incwm hyn yn gymwys i bawb - er enghraifft, os oes gennych fwy o blant, os ydych yn talu am ofal plant, os oes gennych anabledd, neu os oes gan eich plentyn anabledd, gallai'r terfyn incwm fod yn uwch i chi
• mae angen i chi wneud cais er mwyn cael ateb pendant o ran faint rydych yn gymwys i'w gael

Fyddwch chi'n gymwys yn seiliedig ar eich incwm?

I gael syniad gwell o ran p'un a ydych yn debygol o fod yn gymwys i gael credydau treth yn seiliedig ar eich incwm, gallwch ddefnyddio'r canlynol:

• tablau hawliadau 'cipolwg' - dilynwch y ddolen isod sy'n gymwys i'ch sefyllfa chi
• holiadur cyflym ar-lein - bydd yn dweud wrthych a ydych yn debygol o fod yn gymwys i gael credydau treth, ond ni fydd yn dweud wrthych faint y gallwch ei gael

Dim ond canllaw bras yw'r tablau hawliadau ar faint y gallech ei gael am y flwyddyn dreth bresennol - yn dod i ben ar 5 Ebrill 2013. Cânt eu diweddaru gyda'r symiau ar gyfer y flwyddyn dreth nesaf ar 6 Ebrill 2013.

• Nid ydych yn gweithio ond mae gennych blant: tablau hawliadau

• Rydych chi'n gweithio ond nid oes gennych chi blant: tablau hawliau

• Cadarnhau a ydych yn gymwys i gael credydau treth - holiadur cyflym

Beth sy'n cyfrif fel incwm?

Ystyrir eich incwm cyn treth ac Yswiriant Gwladol. Pan fyddwch yn gwneud cais am gredydau treth am y tro cyntaf, defnyddir eich incwm o'r flwyddyn a ddaeth i ben ar 5 Ebrill 2012. Os ydych mewn cwpl, defnyddir eich incwm ar y cyd.

Mae enillion o waith a rhai o fudd-daliadau'r wladwriaeth yn cyfrif fel incwm. Mae incwm 'arall' hefyd yn cyfrif. Gall hyn gynnwys llog ar gynilion, pensiynau neu incwm o eiddo - ond dim ond os oedd y cyfanswm yn fwy na £300 ar gyfer y flwyddyn. Nid yw swm gwirioneddol unrhyw gynilion a allai fod gennych yn effeithio ar gredydau treth.

Sut mae credydau treth yn gweithio

Fel arfer bydd angen i chi wneud cais ar y cyd am gredydau treth os ydych:

• yn briod
• mewn partneriaeth sifil
• yn byw gyda rhywun fel petaech yn briod neu mewn partneriaeth sifil

Fel arfer dim ond un cais y gallwch ei wneud os na fyddwch yn perthyn i un o'r grwpiau hyn.

Telir credydau treth yn uniongyrchol i'ch cyfrif banc, cymdeithas adeiladu, Swyddfa'r Post® neu Gynilion Cenedlaethol os yw'n derbyn Taliad Uniongyrchol. Caiff taliadau eu gwneud bob wythnos neu bob pedair wythnos.

Pwy fydd yn cael y taliadau credydau treth?

Os yw'r ddau ohonoch yn gweithio a bod y ddau ohonoch yn gymwys i gael Credyd Treth Gwaith, gallwch benderfynu pa un ohonoch fydd yn cael y taliadau.

Bydd angen i gyplau sy'n hawlio Credyd Treth Plant benderfynu pwy yw prif ofalwr y plentyn. Os mai chi yw'r prif ofalwr, yna caiff yr arian ei dalu i chi.

Sut mae taliadau credydau treth yn gweithio

Os byddwch yn gwneud cais newydd, fel arfer cewch eich taliadau o ddyddiad eich cais i ddiwedd y flwyddyn dreth. Er enghraifft, os byddwch yn gwneud cais ar 10 Tachwedd 2012, caiff eich taliadau eu cyfrifo o'r dyddiad hwnnw hyd at 5 Ebrill 2013. Fel arfer gellir ôl-ddyddio hawliadau hyd at un mis - weithiau'n hwy - o'r dyddiad y cafodd y Swyddfa Credyd Treth eich ffurflen gais.

Ni chaiff taliadau credydau treth eu cyfrif yn incwm trethadwy.

Adnewyddu eich credydau treth

Bob blwyddyn yn ystod mis Ebrill, Mai neu Fehefin bydd y Swyddfa Credyd Treth yn ysgrifennu atoch er mwyn gofyn i chi:

• gadarnhau'r wybodaeth sydd ganddi am eich amgylchiadau personol
• cadarnhau'r incwm a gawsoch yn y flwyddyn sydd newydd ddod i ben

Gelwir hyn yn 'adnewyddu' eich cais am gredydau treth. Y dyddiad cau ar gyfer adnewyddu fel arfer yw 31 Gorffennaf.

Pam fod angen i chi adnewyddu eich cais am gredydau treth

Bydd angen i chi adnewyddu er mwyn sicrhau bod y taliadau a gawsoch yn gywir. Mae hefyd yn galluogi'r Swyddfa Credyd Treth i bennu eich taliadau ar gyfer y flwyddyn nesaf ar yr incwm cywir.

Weithiau bydd y Swyddfa Credyd Treth wedi talu gormod neu ddim digon i chi. Os bydd hyn yn digwydd, bydd y Swyddfa yn gwneud addasiad i sicrhau bod eich taliadau'n gywir. Bydd unrhyw daliadau a wneir o 6 Ebrill 2013 i'r dyddiad y byddwch yn adnewyddu eich cais yn daliadau dros dro. Os na fyddwch yn adnewyddu, efallai y gofynnir i chi eu talu'n ôl.

Newidiadau gartref ac yn y gwaith

Os bydd eich amgylchiadau'n newid ar unrhyw adeg, gall hyn effeithio ar faint o arian y dylech ei gael. Gall pethau fel dechrau swydd newydd, gwahanu â phartner neu gael babi i gyd wneud gwahaniaeth i'ch credydau treth.

Cysylltwch â'r Swyddfa Credyd Treth cyn gynted â phosibl i ddweud wrthi am unrhyw newidiadau. Er mwyn gwneud hyn, gallwch ffonio'r Llinell Gymorth Credyd Treth, neu ysgrifennu i'r Swyddfa Credyd Treth. Ond ni allwch roi gwybod am newidiadau ar-lein ar gyfer credydau treth.

• Credydau treth: newidiadau y bydd angen i chi roi gwybod amdanynt a phryd

• Manylion cyswllt ar gyfer y Llinell Gymorth a'r Swyddfa Credyd Treth

Mwy o ddolenni defnyddiol

• Sut i wneud cais am gredydau treth

• Pryd i wneud cais unigol neu ar y cyd am gredydau treth

• Adnewyddu eich cais am gredydau treth - y ffeithiau sylfaenol

Cysylltiadau defnyddiol

• Llinell Gymorth Credydau Treth – manylion cyswllt