Gwefan llywodraeth y DU

Pa oriau y mae angen i chi eu gweithio?

Os nad oes gennych blant
Os nad ydych yn gyfrifol am blant, mae angen i chi weithio'r oriau canlynol er mwyn cael Credyd Treth Gwaith:

• os ydych yn 25 oed neu'n hŷn, mae angen i chi wneud gwaith â thâl am o leiaf 30 awr yr wythnos
• os oes gennych anabledd a'ch bod yn 16 oed neu'n hŷn, mae angen i chi wneud gwaith â thal am o leiaf 16 awr yr wythnos
• os ydych yn 60 oed neu'n hŷn, mae angen i chi wneud gwaith â thâl am o leiaf 16 awr yr wythnos

• Sut i weithio allan oriau gwaith arferol ar gyfer eich cais am gredydau treth

Os oes gennych blant

Os ydych yn gyfrifol am blant, mae angen i chi fod yn 16 oed o leiaf, a gweithio'r oriau canlynol er mwyn cael Credyd Treth Gwaith:

• os ydych yn sengl, mae angen i chi wneud gwaith â thâl am o leiaf 16 awr yr wythnos
• os ydych yn rhan o gwpwl, mae angen i'ch oriau gwaith â thâl ar y cyd fod o leiaf 24 awr yr wythnos, gydag un ohonoch yn gweithio o leiaf 16 awr yr wythnos

Felly, os ydych yn rhan o gwpwl ac mai dim ond un ohonoch sy'n gweithio, bydd angen i'r unigolyn hwnnw weithio o leiaf 24 awr yr wythnos.

Os yw eich oriau gwaith ar y cyd yn llai na 24 awr yr wythnos, gallwch gael Credyd Treth Gwaith o hyd os yw un o'r canlynol yn berthnasol:

• mae un ohonoch yn 60 oed neu'n hŷn ac yn gweithio o leiaf 16 awr yr wythnos
• mae un ohonoch yn anabl ac yn gweithio o leiaf 16 awr yr wythnos
• mae un ohonoch yn gweithio o leiaf 16 awr yr wythnos ac mae gan y llall hawl i gael Lwfans Gofalwr - hyd yn oed os nad yw'n cael unrhyw daliadau am ei fod yn cael budd-daliadau eraill yn lle hynny
• mae un ohonoch yn gweithio o leiaf 16 awr yr wythnos, ac mae’r llall yn 'analluog', yn glaf mewnol mewn ysbyty, neu yn y carchar (yn bwrw dedfryd o garchar neu wedi'i gadw yn y ddalfa tra'n aros am dreial neu ddedfryd)
  

• ‘Analluog’: beth mae hyn yn ei olygu ar gyfer Credyd Treth Gwaith

• Sut i weithio allan oriau gwaith arferol ar gyfer eich cais am gredydau treth

Os oeddech yn arfer cael yr 'elfen 50 oed a throsodd'

Daeth yr 'elfen 50 oed a throsodd' i ben ar 6 Ebrill 2012, i'r rheini sy'n 50 oed neu'n hŷn sy'n dychwelyd i'r gwaith ar ôl bod ar fudd-daliadau. Felly os ydych yn 50 oed neu'n hŷn a'ch bod bellach yn dychwelyd i'r gwaith, bydd angen i chi weithio'r nifer berthnasol o oriau fel yr eglurir uchod.

Felly, er enghraifft, os nad oes gennych blant, fel arfer bydd angen i chi weithio o leiaf 30 awr yr wythnos i gael Credyd Treth Gwaith.

Beth sy'n cyfrif fel gwaith â thâl?

Os ydych yn gyflogai, mae gwaith â thâl yn golygu:

• y gwaith rydych yn ei wneud i'ch cyflogwr yn gyfnewid am dâl (neu lle y byddech yn disgwyl cael eich talu) fel cyflog
• unrhyw 'daliad mewn da' (er enghraifft nwyddau i unigolyn sy'n gweithio fel cynorthwy-ydd siop, neu gynnyrch fferm i weithiwr fferm)

Os ydych yn hunangyflogedig, mae gwaith â thâl yn golygu unrhyw waith rydych yn ei wneud am dâl (neu lle y byddech yn disgwyl cael eich talu) neu elw.

Er mwyn hawlio Credyd Treth Gwaith, dylech ddisgwyl i'ch gwaith â thâl barhau am o leiaf bedair wythnos.

• Sut i weithio allan oriau gwaith arferol ar gyfer eich cais am gredydau treth

Beth nad yw'n cyfrif fel gwaith â thâl?

Os yw unrhyw un o'r canlynol yn berthnasol i chi, ni fydd y gwaith yn cyfrif at ddibenion Credyd Treth Gwaith:

• rydych yn fyfyriwr ac yn gweithio fel rhan o astudiaethau ar gyfer gradd neu gymhwyster arall (mae unrhyw grant neu fenthyciad a gewch at ddibenion cynhaliaeth ac ni chaiff ei dalu yn gyfnewid am waith a wneir ar y cwrs)
• rydych yn nyrs dan hyfforddiant ac yn cael Bwrsariaeth gan y GIG a grantiau neu fenthyciadau eraill ar gyfer gwaith a wneir ar y cwrs
• rydych yn gweithio i elusen neu sefydliad gwirfoddol lle nad ydych yn cael unrhyw dâl neu'n cael treuliau yn unig
• rydych yn gweithio i awdurdod lleol, sefydliad elusennol neu wirfoddol yr awdurdod iechyd yn gofalu am rywun nad yw'n aelod o'ch cartref - a lle caiff yr unig daliad a gewch ei dalu drwy'r cynllun Rhentu Ystafell
• rydych ar streic am fwy na deg diwrnod yn olynol
• rydych yn gweithio mewn cynllun lle rydych yn cael lwfans hyfforddi, yn hytrach na thâl - oni bai bod y lwfans yn drethadwy
• rydych yn cymryd rhan yn y Cyfnod Gweithgarwch Dwys neu'r Rhaglen Paratoi ar gyfer Cyflogaeth - oni bai bod y taliad a gewch yn drethadwy
• rydych yn cymryd rhan mewn gweithgaredd lle rhoddwyd gwobrau chwaraeon ac ni wnaed unrhyw daliadau eraill neu ni ddisgwylir i unrhyw daliadau eraill gael eu gwneud
• rydych yn cymryd rhan mewn rhaglen Parth Cyflogaeth lle na wnaed unrhyw daliadau eraill (heblaw ar gyfer premiymau hyfforddi neu daliadau dewisol, fel ffioedd, grantiau, benthyciadau neu ôl-daliadau ar gyfer treuliau a delir fel taliad unigol)
• rydych yn gweithio - naill ai yn y carchar neu y tu allan i'r carchar - tra rydych yn bwrw dedfryd o garchar, neu wedi eich cadw yn y ddalfa tra'n aros am dreial neu ddedfryd
  

Sut a phryd i wneud cais

Mae angen i chi fod mewn gwaith â thâl pan fyddwch yn gwneud eich cais, neu'n dechrau gwaith â thâl o fewn saith diwrnod i wneud eich cais. Dim ond os byddwch yn dechrau'r gwaith â thâl hwn y byddwch yn cael Credyd Treth Gwaith.

Os ydych eisoes yn cael Credyd Treth Plant dylech ffonio’r Llinell Gymorth Credyd Treth i hawlio Credyd Treth Gwaith.

Os nad ydych eisoes yn cael credydau treth bydd rhaid i chi lenwi ffurflen hawlio ar-lein. Dim ond drwy ffonio'r Llinell Gymorth Credyd Treth y gallwch gael ffurflen hawlio. Ni allwch hawlio ar-lein.

• Sut i wneud cais am gredydau treth

• Manylion cyswllt ar gyfer y Llinell Gymorth Credyd Treth

Os ydych yn absennol o'r gwaith dros dro

Efallai y cewch eich trin fel pe baech yn gweithio o hyd ac y byddwch yn gallu cael Credyd Treth Gwaith o hyd pan fyddwch yn sâl neu ar gyfnod mamolaeth, tadolaeth neu fabwysiadu. Ond bydd angen i chi fod wedi gweithio nifer benodol o oriau fel arfer yn union cyn i chi ddechrau eich cyfnod i ffwrdd o'r gwaith.

Mae rhai sefyllfaoedd eraill pan fyddwch yn cael seibiant o'ch gwaith dros dro, ond y gallech gael eich trin fel pe baech yn gweithio o hyd. Er enghraifft, efallai na fyddwch yn gweithio am gyfnod byr am fod gennych fwlch cyn dechrau swydd newydd, neu eich bod wedi cael eich diswyddo.

• Credyd Treth Gwaith pan na allwch weithio oherwydd salwch

• Cyfnod mamolaeth, tadolaeth a mabwysiadu a chredydau treth

• Bylchau dros dro mewn gwaith - sut y gallant effeithio ar Gredyd Treth Gwaith

Os byddwch yn gadael gwaith â thâl - neu'n newid eich oriau

Efallai na fyddwch yn gallu cael Credyd Treth Gwaith os byddwch:

• yn gadael gwaith neu'n dechrau gweithio llai na'r nifer ofynnol o oriau bob wythnos ar gyfer eich amgylchiadau
• yn gadael eich swydd ac yn cael tâl yn lle rhybudd am na fyddwch yn cael eich cyfrif fel eich bod mewn gwaith at ddibenion Credyd Treth Gwaith yn ystod y cyfnod hwnnw - ond os byddwch yn cael swydd arall yn ystod y cyfnod hwnnw, efallai y byddwch yn gymwys o hyd ar sail eich swydd newydd

Os ydych eisoes yn cael Credyd Treth Gwaith, efallai y bydd eich taliadau'n parhau am gyfnod byr. Dywedwch wrth y Swyddfa Credyd Treth ar unwaith os bydd eich amgylchiadau gwaith yn newid. Mae angen gwneud hyn fel y gall wneud yn siŵr na fyddwch yn cael gormod o gredydau treth neu ddim digon.

• Newidiadau i'ch oriau gwaith a chredydau treth

• Manylion cyswllt ar gyfer y Llinell Gymorth Credyd Treth

Mwy o ddolenni defnyddiol

• Mynnwch wybod mwy am gael plant a chael credydau treth

• Mae gennych anabledd - allwch chi gael Credyd Treth Gwaith?

• Cael gwybodaeth am yr Isafswm Cyflog Cenedlaethol