Gwefan llywodraeth y DU

Pryd gewch chi hawlio am blentyn

Fel rheol cewch chi hawlio Credyd Treth Plant am:

• babi newydd
• unrhyw blentyn sy'n byw gyda chi, tan 31 Awst ar ôl ei ben-blwydd yn 16
• plant dan 20, os ydynt mewn mathau penodol o addysg neu hyfforddiant

Os oes gennych chi fabi, gellir ôl-ddyddio eich taliadau i'r dyddiad y cafodd y babi ei eni – ond dim ond os byddwch yn hawlio o fewn un mis. Er enghraifft, os cafodd eich babi ei eni ar 1 Ionawr ond dim ond ar 1 Mehefin y derbynnir eich hawliad, dim ond o 1 Mai ymlaen y cewch eich talu.

• Sut i hawlio credydau treth

• Babi newydd - pa gredydau treth y mae gennych hawl iddynt?

Ar ôl 31 Awst ar ôl pen-blwydd eich plentyn yn 16, gallwch dal hawlio Credyd Treth Plant amdanynt ar yr amod:

• eu bod dan 20
• eu bod mewn addysg amser llawn sy’n cyfri ar gyfer Credyd Treth Plant

Bydd addysg neu hyfforddiant yn cyfri ar gyfer Credyd Treth Plant os yw’n addysg amser llawn nad yw’n ‘addysg uwch’, neu hyfforddiant ‘cymeradwy’. Er enghraifft, Safon Uwch neu Ddysgu Sylfaen.

• Gweld pa gyrsiau addysg neu hyfforddiant sy’n cyfri ar gyfer Credyd Treth Plant

Os nad chi yw rhiant y plentyn

Cewch hawlio Credyd Treth Plant os ydych chi'n gyfrifol am blentyn. Gallai hyn fod, er enghraifft:

• os yw'r plentyn yn byw gyda chi fel rheol
• os yw'r plentyn yn cadw ei deganau, ei ddillad ac ati yn eich cartref
• os rydych chi'n talu am eu prydau bwyd ac yn rhoi arian poced iddyn nhw

Ceir eithriadau i hyn. Er enghraifft, os yw plentyn o dramor yn byw gyda chi fel myfyriwr cyfnewid, ni allwch fel arfer hawlio Credyd Treth Plant ar ei gyfer. Mae hyn oherwydd nid yw fel arfer yn byw gyda chi a’i fod yn y DU am ei addysg yn unig.

Os nad ydych chi'n siŵr a ydych chi'n gyfrifol am blentyn, gallwch ffonio'r Llinell Gymorth Credyd Treth i gael cyngor.

• Cysylltu â’r Llinell Gymorth Credyd Treth

Rhieni sy'n mabwysiadu a rhieni sy'n maethu

Gall plentyn gael ei leoli gyda chi ar gyfer ei fabwysiadu neu ei faethu. Gallwch hawlio Credyd Treth Plant amdanynt ar yr amod nad ydych chi ddim yn cael arian gan:

• eich awdurdod lleol
• y Bwrdd Iechyd a Gwasanaethau Cymdeithasol

Os ydych chi'n cael arian gan unrhyw un o’r rhain, dylech ffonio'r Llinell Gymorth Credyd Treth i gael gwybod a allwch chi hawlio.

• Cysylltu â’r Llinell Gymorth Credyd Treth

Os ydy eich plentyn yn byw gyda mwy nag un person

Dim ond un cartref sy'n cael hawlio Credyd Treth Plant am blentyn.

Efallai y byddwch chi’n gofalu am blentyn sy'n byw gyda chi weithiau ac yn byw gyda rhywun arall weithiau. Ni all y ddau ohonoch gael Credyd Treth Plant am yr un plentyn, felly bydd yn rhaid i chi benderfynu pwy ddylai ei hawlio.

Chewch chi ddim hawlio Credyd Treth Plant os nad yw'r plentyn yn byw gyda chi o gwbl - hyd yn oed os ydych chi'n talu cynhaliaeth.

Os na allwch chi gytuno pwy fydd yn hawlio

Os na allwch chi gytuno pwy fydd yn hawlio, bydd y Swyddfa Credyd Treth yn penderfynu ar eich rhan. Byddant yn cysylltu â'r ddau ohonoch chi er mwyn iddynt allu gweithio allan pwy sydd â'r prif gyfrifoldeb dros y plentyn. Byddant yn edrych ar bethau sy'n cynnwys sawl diwrnod mae'r plentyn yn byw gyda chi a ble mae'r plentyn yn cadw'r rhan fwyaf o'i ddillad a'i deganau.

Os ydych eisoes yn cael credydau treth ar gyfer eich plentyn

Os yw rhywun arall yn hawlio am y plentyn rydych chi'n cael credydau treth ar ei gyfer, efallai y bydd y Swyddfa Credyd Treth yn gofyn i chi ddweud wrthynt pam eich bod yn meddwl mai chi sydd â'r prif gyfrifoldeb dros y plentyn hwnnw.

Os na allwch chi gytuno ar bwy ddylai hawlio, bydd y Swyddfa Credyd Treth yn penderfynu drosoch chi. Byddwch yn dal yn cael yr arian wrth iddyn nhw wneud eu penderfyniad.

Os ydy eich plentyn yn byw'r tu allan i'r DU

Efallai byddwch chi'n gallu hawlio Credyd Treth Plant ar gyfer eich plentyn os ydych chi’n byw yn y DU ac os bydd unrhyw un o'r canlynol yn berthnasol i chi:

• rydych chi'n dod o wlad yn Ardal Economaidd Ewrop neu’r Swistir ac yn gweithio yn y DU, neu'n cael Lwfans Ceisio Gwaith yn seiliedig ar gyfraniadau
• mae eich plentyn yn byw gyda chi fel rheol, ond mae'n treulio rhywfaint o amser dramor, er enghraifft, mae'n astudio yn rhywle arall yn y byd ac yn dod adref yn ystod gwyliau'r ysgol
• mae eich partner yn un o Weision y Goron wedi’i leoli i unrhyw le dramor ac mae eich plentyn yn byw gyda nhw

Os ydych chi a’ch plentyn yn byw y tu allan i’r Deyrnas Unedig, nid ydych yn gallu hawlio credydau treth fel arfer. Ond weithiau y mae rheolau arbennig yn gymwys sy’n golygu ei bod yn dal yn bosib i chi hawlio Budd-dal Plant. Er enghraifft, os yw eich partner yn un o Weision y Goron wedi’i leoli dramor, ac rydych chi wedi mynd yno gyda nhw, neu os ydych chi’n cael budd-daliadau neu Bensiwn y Wladwriaeth yn y DU.

• Nid yw’ch teulu’n byw yn y DU – allwch chi gael credydau treth?

• Allwch chi hawlio credydau treth os ydych chi’n byw y tu allan i’r DU?

Gwledydd yn Ardal Economaidd Ewrop

Y gwledydd sydd yn Ardal Economaidd Ewrop ynghyd â'r DU yw'r Almaen, Awstria, Bwlgaria, Cyprus, Denmarc, yr Eidal, Estonia, y Ffindir, Ffrainc, Groeg, Gwlad Belg, Gwlad yr Iâ, Gwlad Pwyl, Hwngari, yr Iseldiroedd, Iwerddon, Latfia, Liechtenstein, Lithwania, Lwcsembwrg, Malta, Norwy, Portiwgal, Romania, Sbaen, Slofacia, Slofenia, Sweden a'r Weriniaeth Tsiec.

Rhoi'r wybodaeth ddiweddaraf i'r Swyddfa Credyd Treth

Newidiadau mae'n rhaid rhoi gwybod amdanynt cyn pen mis

Rhowch wybod i'r Swyddfa Credyd Treth cyn pen mis os bydd eich plentyn:

• yn gadael cartref
• yn mynd i fyw gyda rhywun arall
• yn marw
• yn gadael addysg neu hyfforddiant sy’n cyfri ar gyfer Credyd Treth Plant
• yn dechrau ar hyfforddiant a ddarperir fel rhan o'i swydd
• yn cael swydd gyflogedig a'i fod yn cael cyflog am weithio 24 awr yr wythnos neu fwy fel arfer – a’i fod wedi gadael addysg neu hyfforddiant sy’n cyfri ar gyfer Credyd Treth Gwaith
• yn dechrau hawlio budd-daliadau neu gredydau treth ei hun

Os na fyddwch chi'n rhoi gwybod am y newidiadau hyn, efallai y byddwch chi'n cael gormod o gredydau treth. Os bydd y Swyddfa Credyd Treth yn rhoi gormod o arian i chi, fel rheol bydd yn rhaid i chi dalu'r arian yn ôl. Efallai byddan nhw hefyd yn codi cosb arnoch chi.

• Cysylltu â’r Llinell Gymorth Credyd Treth

Newidiadau mae'n rhaid rhoi gwybod amdanynt cyn gynted â phosib

Rhowch wybod i’r Swyddfa Credyd Treth cyn gynted â phosib os:

• byddwch yn dechrau gofalu am blentyn – gallech golli allan os ydych yn oedi, dim ond i fyny at un mis gall unrhyw daliadau ar gyfer y plentyn gael eu hôl-ddyddio
• mae’ch plentyn yn parhau mewn addysg neu hyfforddiant sy’n cyfri ar gyfer Credyd Treth Gwaith ar ôl iddynt gyrraedd 16 oed – Os na fyddwch chi'n gwneud hynny, dim ond y credydau treth ar ei gyfer tan 31 Awst ar ôl ei ben-blwydd yn 16 fyddwch chi'n eu cael
  

Newid mae'n rhaid rhoi gwybod amdanynt cyn pen tri mis

Rhowch wybod i'r Swyddfa Credyd Treth cyn pen tri mis os bydd eich plentyn yn 16 neu 17, ac y mae’r ddau’r canlynol yn digwydd:

• yn gadael addysg neu hyfforddiant sy’n cyfri ar gyfer Credyd Treth Plant
• yn cofrestru gyda gwasanaeth gyrfaoedd – fel Connexions

Os na fyddwch yn gwneud hynny, gallech golli allan ar gyfnod ychwanegol o Gredyd Treth Gwaith ar gyfer eich plentyn, o hyd i at 20 wythnos.

• Manylion cyswllt y Llinell Gymorth Credyd Treth

• Credydau treth: newidiadau y mae angen i chi roi gwybod amdanynt, a phryd y mae angen i chi wneud hynny

Mwy o ddolenni defnyddiol

• Cymorth gyda chostau gofal plant - ydych chi'n gymwys i gael credydau treth ychwanegol?

• Plant ag anableddau - allwch chi gael Credyd Treth Plant ychwanegol

• Gweld a ydych yn gymwys am Fudd-dal Plant

Cysylltiadau defnyddiol

• Llinell Gymorth Credyd Treth – manylion cyswllt