Gwefan llywodraeth y DU

Buddion Marwolaeth o Bensiwn y Wladwriaeth

Dim ond i chi y caiff Pensiwn sylfaenol y Wladwriaeth ei dalu, ac ni ellir ei drosglwyddo i rywun arall pan fyddwch chi'n marw. Fodd bynnag, os gwnaethoch chi ohirio cael eich Pensiwn y Wladwriaeth, efallai y bydd gan eich cymar neu bartner sifil sy’n goroesi'r hawl i ran o’r swm a ohiriwyd gennych y gwnaethoch ei gronni Pensiwn hwnnw.

Os ydych chi wedi cyfrannu at Bensiwn ychwanegol y Wladwriaeth, gall eich cymar neu bartner sifil gael rhywfaint o’r pensiwn ychwanegol hwn ar ôl i chi farw. Yr enw blaenorol ar Bensiwn ychwanegol y Wladwriaeth oedd Cynllun Pensiwn ar Sail Enillion y Wladwriaeth (SERPS) neu Ail Bensiwn y Wladwriaeth.

• Beth sy'n digwydd i'ch Pensiwn y Wladwriaeth pan fyddwch yn marw (adran pensiynau a chynllunio ar gyfer ymddeol)

Treth ar fuddion marwolaeth a gafwyd o Bensiwn y Wladwriaeth y sawl a fu farw

Bydd unrhyw gynnydd yn eich incwm yr ydych yn derbyn o ganlyniad i farwolaeth eich cymar neu bartner sifil yn cael ei ystyried yn rhan o’ch incwm trethadwy ar ôl ymddeol.

• Oes rhaid i chi dalu treth ar ôl ymddeol (adran pensiynau a chynllunio ar gyfer ymddeol)

• Incwm trethadwy ac incwm anhrethadwy yn fras

• A oes angen i chi lenwi ffurflen dreth?

Buddion marwolaeth o bensiwn cwmni, pensiwn personol neu bensiwn cyfranddeiliaid

Gan ddibynnu ar reolau'ch pensiwn, mae'n bosib y bydd nifer o fuddion yn daladwy pan fyddwch yn marw, gan gynnwys:

• cael y cyfraniadau a dalwyd gennych yn ôl
• taliad un-swm
• pensiwn ar gyfer eich cymar, eich partner sifil neu ddibynnydd arall

Fel arfer, bydd y rhan fwyaf o gynlluniau pensiwn yn talu buddion marwolaeth 'yn ôl disgresiwn', ac felly, ni fyddant yn rhan o'r ystad at ddibenion Treth Etifeddu. Mae ‘yn ôl disgresiwn’ yn golygu bod y darparwr pensiwn yn rhydd i benderfynu i bwy y mae am dalu’r buddion marwolaeth. Yn aml, bydd yn dilyn dymuniadau’r sawl a fu farw, ond nid oes rhaid iddo wneud hynny. Os nad yw'r taliad un-swm yn ddewisol, efallai y bydd rhaid talu Treth Etifeddu. Bydd eich darparwr pensiwn yn gallu rhoi manylion am eich pensiwn i chi. Ceir crynodeb isod o enghreifftiau eraill o atebolrwydd treth.

Treth ar fuddion marwolaeth o bensiwn cwmni

Os byddwch yn marw cyn dechrau cael eich pensiwn cwmni

Mae'r rhan fwyaf o bensiynau cwmni yn darparu budd ‘Marw tra bo rhywun yn Dal i Weithio’, sy'n debyg i bolisi yswiriant bywyd. Mae hyn yn golygu, os byddwch yn marw cyn i chi ddechrau cael eich pensiwn cwmni, bydd unigolyn o'ch dewis (a elwir yn 'fuddiolwr') yn cael taliad un-swm.

Gellir talu'r arian heb dynnu Treth Incwm ohono os nad yw'n fwy na'r 'lwfans oes' sydd ar gael i ddeiliad y pensiwn (£1.5 miliwn ym mlwyddyn dreth 2012-13). Bydd rhaid talu 55 y cant o dreth ar unrhyw swm sy’n uwch na’r lwfans oes. Y buddiolwr fydd yn talu'r dreth hon.

Os byddwch chi'n marw tra byddwch yn dal i weithio, mae rhai cynlluniau pensiwn yn talu pensiwn dibynyddion. Mae pensiwn dibynyddion yn cyfrif fel incwm trethadwy i'r buddiolwr.

• Rheolau pensiwn o fis Ebrill 2006 ymlaen (adran pensiynau a chynllunio ar gyfer ymddeol)

Os byddwch yn marw ar ôl dechrau cael eich pensiwn cwmni

Os byddwch yn marw ar ôl dechrau cael eich pensiwn cwmni, bydd unrhyw daliad un-swm gwarchod pensiwn neu warchod blwydd-dal a delir (fel rhan o'r budd marwolaeth) ar ôl i chi farw yn cael ei drethu fel taliad un-swm yn unol â chyfradd arbennig ar gyfer buddion marwolaeth. Y gyfradd Dreth Incwm yw:

• 35 y cant ar gyfer marwolaethau cyn 6 Ebrill 2011
• 55 y cant ar gyfer marwolaethau ar ôl 5 Ebrill 2011

Gweinyddwr y cynllun fydd yn talu’r dreth.

Os darperir pensiwn i ddibynnydd, mae hyn yn cyfrif fel incwm trethadwy ar gyfer y dibynnydd hwnnw.

Treth ar fuddion marwolaeth o bensiwn personol neu bensiwn cyfranddeiliaid

Os byddwch yn marw cyn cael unrhyw fuddion

Os byddwch yn marw cyn cael unrhyw fuddion, fel arfer bydd y buddion marwolaeth yn cael eu talu fel taliad un-swm. Mae hwn fel arfer yn cynnwys adenillion y gronfa bensiwn ynghyd ag enillion o unrhyw gynllun yswiriant bywyd.

Os yw’r taliad un-swm – yn ogystal â gwerth unrhyw fuddion o gynllun pensiwn cofrestredig arall – yn fwy na’r Lwfans Oes (£1.5 miliwn ym mlwyddyn dreth 2012-13), bydd y swm dros ben yn cael ei drethu ar gyfradd o 55 y cant. Y buddiolwr fydd yn gorfod talu’r dreth hon.

Hefyd, yn hytrach na chael buddion marwolaeth fel taliad un-swm, gellir eu defnyddio i ddarparu pensiwn i ddibynyddion. Os darperir pensiwn i ddibynnydd, mae hyn yn cyfrif fel incwm trethadwy ar gyfer y dibynnydd hwnnw.

Os byddwch yn marw ar ôl cael buddion

Os byddwch yn marw ar ôl cael buddion, bydd unrhyw fuddion marwolaeth a delir fel incwm pensiwn i ddibynnydd yn cael eu trethu fel incwm yn y ffordd arferol.

Os oedd y cynllun pensiwn yn darparu taliad un-swm, bydd y taliad hwn yn cael ei drethu ar y cyfraddau canlynol:

• 35 y cant ar gyfer marwolaethau cyn 6 Ebrill 2011
• 55 y cant ar gyfer marwolaethau ar ôl 5 Ebrill 2011

Gweinyddwr y cynllun fydd yn talu’r dreth hon.

• Buddion marwolaeth – gwefan Y Gwasanaeth Cynghori ar Bensiynau Opens new window

Treth ar fuddion marwolaeth o Bensiynau wedi'u Sicrhau mewn Ffordd Arall

Yr oedd Pensiynau wedi’u Sicrhau mewn Ffordd Arall ar gael o 6 Ebrill 2006 fel opsiwn arall ar wahân i brynu blwydd-dal erbyn y byddwch yn 75 oed.

Yr oedd Pensiwn wedi’i Sicrhau mewn Ffordd Arall yn eich galluogi i fuddsoddi eich cynilion pensiwn ac i dynnu incwm o’ch cronfa o fewn cyfyngiadau penodol y cytunwyd arnynt fel rhan o delerau’r Pensiwn hwnnw. Yr oedd yr incwm hwn yn cael ei drethu fel incwm pensiwn yn y ffordd arferol.

Ar 6 Ebrill 2011 daeth Pensiynau wedi’u Sicrhau mewn Ffordd Arall i ben a ddaeth yn fath o Bensiwn Tynnu Incwm (drawdown pension).

Ar gyfer marwolaethau ar 6 Ebrill 2007 neu ar ôl hynny hyd at (ac yn cynnwys) 5 Ebrill 2011, fel arfer ni fydd rhaid talu treth ar unrhyw gronfeydd Pensiynau Wedi’u Sicrhau mewn Ffordd Arall os oes un o’r canlynol yn berthnasol:

• maent yn cael eu defnyddio i ddarparu pensiynau i ddibynyddion
• maent yn cael eu rhoi i elusen am nad oes dibynyddion

Fodd bynnag, bydd Treth Incwm yn cael ei thynnu o bensiwn y dibynnydd yn y ffordd arferol.

Ond, os bydd unrhyw un o’r cronfeydd yn cael eu trosglwyddo at ddibenion etifeddu – er enghraifft, i drosglwyddo cyfalaf nas defnyddiwyd ar ôl y farwolaeth i’r plant a’r wyrion – bydd rhaid talu Treth Incwm ar gyfradd o hyd at 70 y cant. Caiff rhywfaint o’r swm hwn ei dalu gan y sawl a fydd yn ‘etifeddu'r’ arian, a rhywfaint gan weinyddwr y cynllun.

Mae'n bosib y bydd rhaid talu Treth Etifeddu ar yr arian hefyd. Bydd unrhyw Dreth Etifeddu ar Bensiynau wedi'u Sicrhau mewn Ffordd Arall yn cael ei chyfrifo ar ôl gosod gweddill ystad y sawl a fu farw yn erbyn y trothwy Treth Etifeddu. Os oes rhywfaint o’r trothwy heb ei ddefnyddio o hyd, bydd rheolau Treth Etifeddu arbennig yn berthnasol.

• Treth ar bensiynau cwmni, pensiynau personol neu bensiynau tramor

• Treth ar flwydd-daliadau ymddeol

• Pensiynau wedi'u Sicrhau mewn Ffordd Arall – gwefan Y Gwasanaeth Cynghori ar Bensiynau Opens new window

Mwy o ddolenni defnyddiol

• Delio â materion treth rhywun ar ôl marwolaeth

• Treth pan fyddwch yn etifeddu arian, asedau neu eiddo

• Treth Etifeddu

• Treth ar eich Pensiwn y Wladwriaeth

• Treth os byddwch yn hawlio Pensiwn y Wladwriaeth yn nes ymlaen

• Beth sy'n digwydd i'ch pensiwn cwmni pan fyddwch chi'n marw (adran pensiynau a chynllunio ar gyfer ymddeol)

• Buddion marwolaeth – Y Gwasanaeth Cynghori ar Bensiynau Opens new window

Cysylltiadau defnyddiol

• Cysylltiadau arian, treth a budd-daliadau