Gwefan llywodraeth y DU

Pam eich bod wedi derbyn ad-daliad Treth Incwm

Ad-daliad o dreth a ordalwyd gennych yw ad-daliad Treth Incwm. Felly, os ydych chi wedi talu gormod o dreth, er enghraifft drwy eich swydd neu'ch pensiwn, eleni neu yn ystod blynyddoedd blaenorol, bydd Cyllid a Thollau EM yn anfon ad-daliad atoch.

Fe gewch yr ad-daliad un ai drwy siec neu yn y post, drwy drosglwyddiad banc neu drwy'ch cyflog.

Ar hyn o bryd gall Cyllid a Thollau EM dalu treth a ordalwyd yn ôl i chi, hyd at y chwe blynedd diwethaf.

Pryd allech chi fod wedi talu gormod o dreth?

Efallai y byddwch wedi talu gormod o dreth:

• os oedd eich cyflogwr yn defnyddio'r cod treth anghywir
• os dechreuoch swydd newydd a chael cod treth brys am gyfnod
• os buoch yn gweithio am ran o'r flwyddyn yn unig
• os oedd gennych fwy nag un swydd ar yr un pryd
• os na wnaethoch ddweud wrth Gyllid a Thollau EM yn syth am newidiadau i'r buddion yr oeddech yn eu cael drwy eich gwaith
• os newidiodd eich amgylchiadau - efallai y cawsoch eich diswyddo neu y daethoch yn hunangyflogedig ac y bu i'ch incwm leihau o'r herwydd
• os gostyngwyd unrhyw incwm arall fel buddsoddiadau neu incwm o renti ond na ddywedwyd wrth Gyllid a Thollau EM
• os gwnaethoch gamgymeriad ar eich ffurflen dreth
• os yw Cyllid a Thollau EM wedi gwneud camgymeriad gyda'ch treth

Gall hyn i gyd, a rhesymau eraill, olygu eich bod wedi talu gormod o dreth.

Os ydych wedi talu gormod o dreth drwy eich swydd neu'ch pensiwn cwmni

Bydd eich Swyddfa Dreth yn rhoi cod treth i chi sy'n dweud wrth eich cyflogwr neu’ch darparwr pensiwn faint o dreth i'w thynnu o'ch cyflog neu'ch pensiwn cyn i chi gael eich talu. Os ydych chi wedi talu gormod o dreth eleni, efallai y bydd Cyllid a Thollau EM yn anfon cod treth newydd i chi a bydd eich cyflogwr neu'ch darparwr pensiwn yn talu'ch ad-daliad i chi gyda'ch cyflog neu'ch pensiwn.

Os ydych chi wedi talu gormod o dreth mewn blynyddoedd blaenorol bydd Cyllid a Thollau EM yn cyfrifo faint sy'n ddyledus i chi ac yn anfon ad-daliad atoch yn y post neu drwy drosglwyddiad banc.

• Rhagor o wybodaeth am godau treth

• Cael gwybod sut ydych yn talu treth trwy eich cyflogaeth

Os ydych chi wedi dod yn ddi-waith, wedi rhoi'r gorau i'ch gwaith er mwyn dychwelyd i astudio neu wedi ymddeol efallai y cewch chithau hefyd ad-daliad treth wrth Gyllid a Thollau EM.

• Hawlio ad-daliad treth pan fyddwch yn rhoi'r gorau i weithio

Os ydych chi wedi talu gormod o dreth drwy Hunanasesu

Os ydych chi wedi talu gormod o dreth drwy Hunanasesu gallwch ofyn am ad-daliad neu adael y gordaliad yn eich cyfrif Hunanasesu er mwyn ei ddefnyddio i leihau biliau treth yn y dyfodol. Gallwch ofyn i Gyllid a Thollau EM dalu'r ad-daliad i chi, eich asiant, neu berson neu elusen a enwebwyd gennych. O 6 Ebrill 2012 ni fyddwch yn gallu gwneud ad-daliadau rhagor i elusen am unrhyw flwyddyn. Ar ôl y dyddiad hwn, bydd unrhyw gais am ad-daliad i elusen yn cael ei anfon i chi.

Gallwch weld swm y gordaliad yn eich cyfrifiad treth Hunanasesu, eich Datganiad o Gyfrif, neu'ch Cyfrif Hunanasesu Ar-lein.

Bydd eich ad-daliad yn cynnwys unrhyw log sy'n ddyledus ar y swm a ordalwyd.

• Deall a gwirio eich cyfrifiad treth

• Deall eich Datganiad o Gyfrif Hunanasesu

• Rhagor am hawlio ad-daliadau Hunanasesu

Beth i’w wneud os ydych yn meddwl bod eich ad-daliad yn anghywir

Os ydych chi'n credu bod eich ad-daliad yn anghywir, mae'n bwysig cysylltu â Chyllid a Thollau EM yn fuan er mwyn i nhw allu unioni'r cam.

• Mwy o wybodaeth ar sut mae cywiro camgymeriadau yn eich treth

Mwy o ddolenni defnyddiol

• Rhoi gwybod am newidiadau a allai effeithio ar eich treth

• Sicrhau eich bod yn talu'r swm treth cywir

Cysylltiadau defnyddiol

• Cysylltiadau arian, treth a budd-daliadau

• Swyddfa Cyfraniadau Yswiriant Gwladol