Gwefan llywodraeth y DU

Yr hawl i ofyn am 'amser i hyfforddi'

Os ydych chi'n gyflogai a'ch bod yn gweithio mewn sefydliad ac ynddo 250 neu ragor o gyflogeion, mae gennych hawl statudol (cyfreithiol) i ofyn am amser i astudio neu i hyfforddi. Gelwir yr amser hwn yn 'amser i hyfforddi'.

Does dim rhaid i chi ddefnyddio'r hawl ar gyfer pob cais i hyfforddi. Os oes gennych eisoes system gyda'ch cyflogwr ar gyfer gwneud ceisiadau am hyfforddiant, gallwch barhau i ddefnyddio'r system honno.

I wneud cais statudol am 'amser i hyfforddi' mae'n ofynnol eich bod:

• yn weithiwr cyflogedig
• wedi gweithio i'ch cyflogwyr yn ddi-dor am o leiaf 26 wythnos cyn gwneud cais

Ni fyddwch yn gallu gwneud cais am 'amser i hyfforddi' os ydych:

• yn weithiwr asiantaeth
• yn aelod o’r lluoedd arfog
• mewn oed ysgol gorfodol ('oed ysgol' yn yr Alban)
• yn unigolyn ifanc sydd eisoes yn meddu ar yr hawl statudol i amser o'r gwaith â thâl i astudio neu i hyfforddi
• yn 16-18 oed a bod disgwyl i chi gymryd rhan mewn addysg neu hyfforddiant yn barod

Mathau o hyfforddiant y gallwch wneud cais amdanynt

Dim ond ambell fath o hyfforddiant y mae gennych hawl i wneud cais am amser i'w gyflawni. Cyn i chi ystyried gwneud cais, dylech sicrhau bod gennych hawl i wneud cais am yr hyfforddiant yr ydych am ei ddilyn.

• Hyfforddiant y mae gennych hawl i ofyn amdano yn y gwaith

Gwneud eich cais

Os byddwch yn penderfynu gwneud cais am 'amser i hyfforddi', mae yna amryw o bethau y dylech feddwl amdanynt. Yna, mae'n rhaid i chi wneud yn siŵr eich bod yn cynnwys yr holl wybodaeth angenrheidiol yn eich cais.

• Gwneud cais 'amser i hyfforddi'

Trafod eich cais

Pan fyddwch wedi gwneud eich cais, bydd gan eich cyflogwr gyfrifoldebau penodol ynghylch sut i'w ystyried. Dylai wneud hyn o fewn cyfnod penodol a threfnu cyfarfod gyda chi os bydd am drafod eich cais.

• Trafod eich cais 'amser i hyfforddi'

Penderfyniad eich cyflogwr am eich cais

Mae gan eich cyflogwr ddyletswydd i ystyried eich cais. Rhaid iddo gael rheswm busnes da dros wrthod. Pan fydd wedi penderfynu, dylai ddilyn y broses gywir ar gyfer rhoi gwybod i chi beth ydyw.

• Penderfyniadau ynghylch eich cais 'amser i hyfforddi'

Apelio yn erbyn penderfyniad

Os nad ydych yn fodlon â phenderfyniad eich cyflogwr, ceir proses apelio y gallwch ei dilyn. Os ydych dal yn anfodlon ar ôl hynny, ceir camau pellach y gallwch eu cymryd. Fodd bynnag, mae bob amser yn syniad da datrys problemau gyda'ch cyflogwr mewn modd anffurfiol.

• Apelio yn erbyn penderfyniad am 'amser i hyfforddi'