Gwefan llywodraeth y DU

Cyfnodau amser ar gyfer ystyried eich cais am ‘amser i hyfforddi’

Cyn pen 28 diwrnod o gael eich cais, mae’n rhaid i’ch cyflogwr naill ai:

• dderbyn eich cais a rhoi gwybod i chi’n ysgrifenedig beth yw ei benderfyniad
• trefnu cyfarfod gyda chi i drafod eich cais, a rhoi gwybod i chi am ei benderfyniad cyn pen 14 diwrnod o’r cyfarfod hwnnw

Os yw’r unigolyn a fyddai fel arfer yn ystyried eich cais yn absennol o’r gwaith oherwydd gwyliau blynyddol neu salwch, caiff y cyfnod amser hwn ei ymestyn. Bydd y 28 diwrnod yn dechrau un ai:

• ar y diwrnod y bydd yr unigolyn yn dychwelyd i’r gwaith, neu
• 28 diwrnod ar ôl i’r cais ddod i law, os yw'r unigolyn yn dal yn absennol o’r gwaith

Gall cyfyngiadau amser ar gyfer cynnal cyfarfodydd a hysbysu am benderfyniadau ynghylch ceisiadau ac apeliadau gael eu hymestyn gyda’ch cytundeb chi. Os digwydd hynny, mae’n rhaid i’ch cyflogwr wneud y canlynol:

• cadarnhau’r estyniad yn ysgrifenedig gan nodi’r dyddiad
• nodi am ba mor hir fydd yr estyniad
• nodi pryd fydd yr estyniad yn dod i ben

Trefnu'r cyfarfod

Dylai eich cyflogwr drefnu unrhyw gyfarfod i drafod eich cais ar adeg ac mewn man sy'n gyfleus i bawb a fydd yn bresennol.

Dod â chydymaith gyda chi i’r cyfarfod

Gallwch ddod â chydweithiwr gyda chi i’r cyfarfod, a allai fod yn gynrychiolydd undeb llafur y gweithle sydd hefyd yn gweithio i’ch cyflogwr. Mae’n rhaid i’ch cyflogwr ganiatáu amser o'r gwaith, yn ystod oriau gwaith, i weithwyr fod yn gydymaith a sicrhau y cânt dâl am yr amser hwn.

Gall y cydymaith siarad â chi a siarad yn y cyfarfod, ond ni chaiff ateb cwestiynau heb drafod gyda chi.

Os na all eich cydymaith fynychu’r cyfarfod, gallwch gynnig amser newydd sy’n gyfleus i chi, i’ch cyflogwr ac i’ch cydymaith. Mae’n rhaid i gyfarfod a aildrefnir gael ei gynnal cyn pen saith niwrnod o'r diwrnod ar ôl i’r cyfarfod gwreiddiol gael ei ganslo.

Nid oes rhaid i’ch cyflogwr ganiatáu i chi ddod â rhywun gyda chi i’r cyfarfod os nad ydyw’n gweithio iddo. Fodd bynnag, os oes gennych chi anghenion arbennig a bod arnoch angen rhywun heblaw am gydweithiwr i ddod i'r cyfarfod, gallwch ofyn i'ch cyflogwr a fyddai hyn yn bosib, a bydd angen iddo ystyried hyn.

Trafod eich cais gyda’ch cyflogwr

Dylech fod yn barod i drafod pob agwedd ar eich cais gyda’ch cyflogwr, gan gynnwys y canlynol:

• sut y bydd yr hyfforddiant yn gwella eich perfformiad
• sut y bydd yr hyfforddiant yn gwella perfformiad y busnes
• sut y bydd yr hyfforddiant yn cael ei ddarparu
• sut y telir am yr hyfforddiant

Yn ystod y drafodaeth, mae’n bosib y bydd eich cyflogwr yn awgrymu rhai opsiynau hyfforddi gwahanol neu rai ffyrdd gwahanol o fodloni eich anghenion hyfforddi. Dylech fod yn agored i drafod y syniadau hyn gyda'ch cyflogwr. Mae’n debygol y bydd eich cyflogwr hefyd am drafod sut y gellir darparu ar gyfer yr hyfforddiant (e.e. drwy weithio’n hyblyg) a chostau’r hyfforddiant.

Peidio â mynd i'r cyfarfod

Os oes gennych chi reswm da pam na allwch fynychu'r cyfarfod, dylech gysylltu â’ch cyflogwr cyn gynted â phosib ac esbonio pam. Bydd eich cyflogwr yn mynd ati i aildrefnu’r cyfarfod.

Os byddwch yn methu mynd i’r cyfarfod (neu gyfarfod apelio) ar fwy nag un achlysur heb eglurhad rhesymol, gall eich cyflogwr drin eich cais fel cais sydd wedi cael ei dynnu’n ôl.

Tynnu cytundeb yn ôl

Efallai y bydd amgylchiadau lle y bydd eich cyflogwr yn dymuno tynnu ei gefnogaeth ar gyfer eich hyfforddiant yn ôl. Er enghraifft, os cynhelir y cwrs hyfforddi dros gyfnod hir.

Dylech fod yn agored i drafod hyn gyda’ch cyflogwr yn eich cyfarfod ac ystyried cytuno ar amgylchiadau lle y gallai dynnu ei gefnogaeth yn ôl. Mae’n bosib y bydd eich cyflogwr yn cadarnhau hyn yn ysgrifenedig wrth iddo dderbyn eich cais yn ysgrifenedig.