Gwefan llywodraeth y DU

Ceisiadau am ‘amser i hyfforddi’ sy’n cael eu derbyn

Os bydd eich cyflogwr yn cytuno i’ch cais, bydd yn rhaid iddo amlinellu’r canlynol ar bapur:

• pwnc eich astudiaeth neu’ch hyfforddiant
• ymhle fydd yr hyfforddi’n digwydd a phryd
• pwy fydd yn ei ddarparu neu’n ei oruchwylio
• enw’r cymhwyster y bydd yn arwain ato (os bydd yn arwain at gymhwyster o gwbl)
• sut y caiff amser yr hyfforddiant ei neilltuo – er enghraifft, a fydd yn cael ei dalu, a fydd yn ddi-dâl, neu a fyddwch yn gweithio’n hyblyg
• sut bydd costau'r hyfforddiant yn cael eu talu

Dylech gadw copi o’r llythyr hwn.

Ceisiadau am ‘amser i hyfforddi’ sy’n cael eu derbyn yn rhannol

Gall eich cyflogwr benderfynu cytuno ag un rhan o’ch cais a gwrthod rhan arall. Er enghraifft, os ydych chi wedi gofyn am fwy nag un math o hyfforddiant. Yn yr achosion hyn, bydd yn rhaid i’ch cyflogwr ysgrifennu atoch gan nodi'r pwyntiau uchod i gyd a chynnwys y canlynol:

• pa ran o’r cais y mae’n cytuno iddi
• pa ran o’r cais y mae wedi ei gwrthod, y rhesymau dros hyn, a manylion y drefn apelio

Cytuno ar hyfforddiant gwahanol

Gallwch chi a’ch cyflogwr gytuno ar fath gwahanol o hyfforddiant sydd heb ei gynnwys yn y cais gwreiddiol neu ar fodloni'ch anghenion hyfforddi mewn ffordd wahanol. Bydd ar eich cyflogwr angen eich cytundeb ysgrifenedig ar gyfer y newid hwn. Yna, dylai ysgrifennu atoch gan nodi'r holl bwyntiau a amlinellwyd yn yr adran uchod am 'Geisiadau am 'amser i hyfforddi' sy'n cael eu derbyn'.

Os gwrthodir eich cais

Gall eich cyflogwr wrthod eich cais am un neu ragor o’r rhesymau canlynol:

• ni fyddai’r hyfforddiant yn gwella eich effeithiolrwydd yn ei fusnes
• ni fyddai’r hyfforddiant yn gwella perfformiad ei fusnes
• y costau ychwanegol
• byddai’n cael effaith niweidiol (negyddol) ar ei allu i fodloni galw cwsmeriaid
• ni all ad-drefnu eich gwaith ymhlith y staff eraill
• ni all recriwtio staff ychwanegol
• byddai’n cael effaith niweidiol ar ansawdd
• byddai’n cael effaith niweidiol ar berfformiad y busnes
• nid oes digon o waith yn ystod y cyfnodau rydych chi’n cynnig gweithio
• mae’n gwrthdaro â newidiadau strwythurol arfaethedig

Pan fydd yn ystyried eich cais, dylai eich cyflogwr sicrhau nad yw’n gwahaniaethu yn eich erbyn.

Os bydd eich cyflogwr yn gwrthod eich cais, bydd yn rhaid iddo ysgrifennu atoch gan nodi pa rai o'r rhesymau uchod sy'n berthnasol a pham. Dylai egluro’n gywir, mewn modd perthnasol, y ffeithiau allweddol ynglŷn â pham bod y rheswm hwn yn berthnasol yn eich achos chi.

Tystiolaeth o bresenoldeb

Mae’n rhaid i chi roi gwybod i’ch cyflogwr yn ysgrifenedig, mewn llythyr â’r dyddiad arno, os ydych chi'n gwneud y canlynol:

• peidio â dechrau ar yr hyfforddiant
• rhoi’r gorau i fynychu’r hyfforddiant
• gwneud unrhyw beth sy’n wahanol i’r hyfforddiant rydych wedi cytuno arno

Os na fyddwch yn mynychu’r hyfforddiant y gwnaethoch gytuno arno heb roi gwybod i’ch cyflogwr, gallai gymryd camau disgyblu yn eich erbyn.

Os byddwch yn newid eich meddwl ynghylch mynychu'r hyfforddiant ar ôl i'ch cyflogwr gytuno i'ch cais, dylech drafod hyn gyda'ch cyflogwr.