Gwefan llywodraeth y DU

Beth yw Diploma?

Cymhwyster newydd i bobl ifanc rhwng 14 a 19 oed yw'r Diploma, sy'n cynnig ffordd fwy ymarferol o ennill y sgiliau a'r wybodaeth hanfodol y bydd cyflogwyr a phrifysgolion yn chwilio amdanynt. Ei nod yw cynyddu'r dewisiadau sydd ar gael i bobl ifanc a'u hannog i aros ym myd addysg am fwy o amser.

O fis Medi 2008 ymlaen, mae Diplomâu mewn pum maes pwnc ar gael mewn ysgolion a cholegau dethol ledled y wlad – a bydd rhagor o feysydd pwnc ar gael yn y blynyddoedd nesaf.

Beth sy'n wahanol am Ddiploma?

Cynlluniwyd y Diploma mewn partneriaeth â chyflogwyr a phrifysgolion, ac fe all arwain at ragor o astudio - neu i fyd gwaith.

Mae'r Diploma'n cynnwys profiad ymarferol yn ogystal â dysgu yn yr ystafell ddosbarth. Nod y cyfuniad hwn yw annog myfyrwyr i feithrin sgiliau sy'n berthnasol i waith - yn ogystal â'u gallu mewn Saesneg, mathemateg a TGCh - mewn ffordd greadigol a phleserus.

Bydd myfyrwyr wedi'u lleoli yn eu hysgol neu eu coleg eu hunain, ond efallai y cânt gyfle i ddysgu mewn lleoliad gwahanol - ysgol arall, coleg lleol, neu yn y gweithle. Byddant yn cael syniad o sut beth yw byd gwaith mewn gwirionedd, a fydd yn eu helpu i wneud penderfyniadau ynghylch y dyfodol ac yn cadw eu hopsiynau'n agored o ran gyrfa.

Mae'r Diploma yn hyblyg, felly gall myfyrwyr ei gyfuno â chyrsiau TGAU a Safon Uwch. Bydd pobl ifanc yn astudio ar gyfer Diploma ar y cyd ag unrhyw bynciau gorfodol - er enghraifft Saesneg, mathemateg, gwyddoniaeth ac addysg gorfforol ym Mlynyddoedd 10 ac 11.

Pa feysydd pwnc fydd Diplomâu'n ymdrin â nhw?

O fis Medi 2009 ymlaen, mae Diplomâu mewn pum maes pwnc ar gael mewn ysgolion a cholegau dethol o amgylch y wlad:

• Gweinyddiaeth Busnes a Chyllid
• Adeiladu a'r Amgylchedd Adeiledig
• Creadigol a Chyfryngau
• Peirianneg
• Astudiaethau Amgylcheddol ac yn Seiliedig ar dir
• Astudiaeth Gwallt a Harddwch
• Lletygarwch
• Technoleg Gwybodaeth
• Cymdeithas, Iechyd a Datblygiad

Ychwanegir rhagor o feysydd pwnc dros y blynyddoedd nesaf, a bydd yr amrywiaeth eang o 17 ar gael i bob myfyriwr erbyn 2013.

Elfennau gorfodol

Bydd yn rhaid i bob myfyriwr Diploma gwblhau nifer o elfennau gorfodol a dewisol.

Er enghraifft, bydd rhannau gorfodol y Diploma mewn Peirianneg yn ymdrin â'r canlynol:

• byd peirianneg
• technoleg peirianneg
• dyfodol peirianneg

Hefyd, bydd myfyrwyr yn dal i astudio Saesneg, mathemateg a TGCh - ac yn meithrin sgiliau eraill megis gweithio mewn tîm, meddwl yn feirniadol a hunanreolaeth.

Elfennau dewisol

Yn ogystal â'r elfennau gorfodol, gall myfyrwyr Diploma ddewis o ystod o opsiynau. Gallant ymchwilio i un o feysydd eu diploma mewn mwy o fanylder, neu ddilyn pwnc y mae ganddynt ddiddordeb ynddo nad yw'n gysylltiedig â'u Diploma.

Er enghraifft, efallai y bydd myfyriwr sy'n astudio Diploma mewn Adeiladu a'r Amgylchedd Adeiledig yn gallu dewis cwrs arbenigol mewn tirfesur, rheoli neu adfywio cymunedol - neu opsiwn anghysylltiedig megis iaith neu wyddoniaeth.

Prosiect a phrofiad gwaith

Bydd myfyrwyr Diploma yn cwblhau prosiect sy'n ymchwilio i bwnc sydd o ddiddordeb iddynt, er mwyn dangos eu bod yn deall yr hyn maen nhw wedi'i ddysgu ac yn gallu ei ddefnyddio mewn ffordd ymarferol. Byddant hefyd yn treulio o leiaf deg diwrnod yn gweithio gyda chyflogwr.

Sut mae Diplomâu'n cyd-fynd â chymwysterau eraill?

Gall myfyrwyr sy'n dewis astudio ar gyfer Diploma wneud hyn yn lle dilyn cyrsiau TGAU neu Safon Uwch (er ei bod yn bosibl iddynt gynnwys rhai cyrsiau TGAU a Safon Uwch fel rhan o raglen eu Diploma).

Mae'r Diploma ar gael ar dair lefel, a bydd pob un ohonynt yn cymryd dwy flynedd i'w cwblhau:

• Diploma Sylfaen - cymhwyster lefel 1, sy'n cyfateb i bump TGAU ar radd D i G
• Diploma Uwch - cymhwyster lefel 2, sy'n cyfateb i saith TGAU ar radd A* i C
• Diploma Pellach - cymhwyster lefel 3 i bobl dros 16 oed, sy'n cyfateb i dri chwrs Safon Uwch a hanner

Dewis arall i'r rheini dros 16 oed yw'r Diploma Cynnydd (sydd hefyd yn gymhwyster lefel 3). Bydd hwn yn addas i fyfyrwyr nad ydynt am gwblhau Diploma cyfan.

Gall myfyrwyr Diploma Sylfaenol ac Uwch barhau â'u haddysg neu ddefnyddio'u sgiliau newydd mewn swydd sy'n cynnig rhagor o hyfforddiant. Gall y rheini sy'n penderfynu aros ym myd addysg symud ymlaen at y lefel Diploma nesaf, neu ddilyn math gwahanol o gymhwyster - megis TGAU, Safon Uwch neu Brentisiaeth.

Gall Diplomâu Pellach arwain at gwrs prifysgol neu at yrfa.

Sut allwch chi gael gwybod mwy am y Diploma?

Dilynwch y ddolen isod i gael gwybod mwy am y Diploma. Gallwch hefyd gael mwy o wybodaeth gan yr ysgolion a'r colegau sydd yn cymryd rhan.

• Cael gwybod mwy am Ddiplomâu Opens new window

Ble gall pobl ifanc gael gwybodaeth am yr opsiynau sydd ar gael iddynt yn 14-19 oed?

Mae gwybodaeth am yr opsiynau sydd ar gael i bobl ifanc i'w chael drwy ddilyn y dolenni isod.

• Pa ffordd nawr? Blynyddoedd 10-11

• Chi biau'r dewis: opsiynau ar ôl 16