Gwefan llywodraeth y DU

Neilltuo eich rhif cofrestru personol – y mathau o dystysgrifau

Pan fyddwch yn neilltuo eich rhif cofrestru personol i gerbyd, gallwch wneud cais am un o ddau fath o dystysgrif, sef:

• tystysgrif hawl (V750)
• dogfen cadw rhif (V778)

Bydd y dystysgrif hawl (V750) yn cynnwys enw’r prynwr ar frig y dystysgrif, a'r prynwr hwnnw fydd yn berchen ar yr hawl i’r rhif cofrestru.

Bydd y ddogfen cadw rhif (V778) yn cynnwys enw’r sawl a gaiff y caniatâd ar frig y dystysgrif, a'r unigolyn hwnnw fydd yn berchen ar yr hawl i’r rhif cofrestru.

Amodau ar gyfer neilltuo rhif cofrestru personol i gerbyd

Pan fyddwch yn neilltuo rhif cofrestru personol i gerbyd, ni chewch wneud i’r cerbyd edrych yn fwy newydd nag ydyw mewn gwirionedd. Er enghraifft, ni chewch roi rhif cofrestru 'Y' ar gerbyd sydd â rhif cofrestru 'T', ond cewch ddewis unrhyw lythyren rhwng 'A' a 'T'.

Mae hefyd yn rhaid i’r cerbyd fod wedi’i drwyddedu eisoes, neu ar fin cael ei drwyddedu, a’i gofrestru yn y DU.

Cerbydau gyda phlatiau rhif Q

Ni chewch roi rhif cofrestru personol ar gerbyd sy’n dangos plât rhif 'Q'.

Gwneud cais i neilltuo eich rhif cofrestru personol i gerbyd

Pan fyddwch yn gwneud cais i neilltuo eich rhif cofrestru personol i gerbyd, rhaid i chi anfon eich cais llawn i’ch swyddfa Asiantaeth Trwyddedu Gyrwyr a Cherbydau (DVLA) leol agosaf.

Bydd arnoch angen:

• y dystysgrif hawl (V750) neu’r ddogfen cadw rhif (V778) wedi’i llofnodi gan yr unigolyn y mae ei enw ar frig y dystysgrif
• y dystysgrif cofrestru (V5C) neu’r atodiad ceidwad newydd gyda ffurflen V62 ‘cais am dystysgrif cofrestru cerbyd V5C’ wedi’i llenwi
• tystysgrif prawf MOT ar gyfer ceir a beiciau modur dros dair blwydd oedd, neu gerbydau nwyddau trwm dros flwydd oed

Os yw'r atodiad ceidwad newydd wedi'i stampio gan swyddfa DVLA leol, bydd angen i chi lenwi ffurflen V62 a'i dychwelyd i DVLA Abertawe cyn i chi allu gwneud cais. Dylech ganiatáu tair wythnos i’r dystysgrif cofrestru (V5C) gael ei dychwelyd atoch ar ôl i chi wneud cais.

Ychwanegu enwebai i’ch rhif cofrestru personol

Os ydych chi am ychwanegu enwebai ar yr un pryd ag y byddwch yn neilltuo’r rhif cofrestru i gerbyd:

• dylech lenwi adran dau y V750 neu’r V778
• amgáu ffi’r enwebai, sef £25

Trethu eich cerbyd pan fyddwch yn neilltuo eich rhif cofrestru personol

Os bydd angen i chi drethu’r cerbyd, bydd arnoch angen:

• ffurflen V10 ‘cais am ddisg treth' wedi'i llenwi
• tystysgrif yswiriant neu nodyn yswiriant dros dro dilys ar gyfer y cerbyd
• siec ar gyfer y dreth cerbyd gywir

• Cost treth cerbyd

Mae swyddfeydd DVLA lleol ar agor rhwng 9.00am a 5.00pm o ddydd Llun i ddydd Gwener, ac mae maes parcio ar gael i gwsmeriaid.

• Dod o hyd i'ch swyddfa DVLA leol agosaf

Beth fydd yn digwydd nesaf

Ar ôl i’ch swyddfa DVLA leol gael eich cais, efallai y bydd angen iddynt archwilio’r cerbyd, a byddant yn cysylltu â chi i drefnu apwyntiad. Os na fydd angen archwilio eich cerbyd, byddant yn cymeradwyo eich cais o fewn pythefnos.

Ar ôl cymeradwyo eich cais, bydd y swyddfa DVLA leol yn anfon y canlynol atoch:

• disg treth newydd ar gyfer eich cerbyd yn dangos y rhif cofrestru newydd
• llythyr awdurdodi (V948) i chi gael creu eich plât rhif
• tystysgrif prawf MOT newydd ar gyfer ceir a beiciau modur dros dair blwydd oedd, a cherbydau nwyddau trwm dros flwydd oed

Nodwch os gwelwch yn dda, na fydd y dystysgrif prawf MOT yn cael ei hargraffu mewn gwyrdd bellach - bydd yn cael ei hargraffu mewn testun du ar gefndir gwyn yn lle hynny.

Dylech ganiatáu o leiaf pythefnos, ar ôl anfon eich cais, cyn cysylltu ag ymholiadau cwsmeriaid DVLA os na fyddwch yn cael y dogfennau hyn.

Bydd tystysgrif cofrestru newydd (V5C) ar gyfer eich cerbyd yn cael ei hanfon atoch hefyd, a bydd yn dangos y rhif cofrestru newydd. Dylai gyrraedd o fewn pedair wythnos ar ôl y llythyr cadarnhau. Gall gymryd hyd at chwe wythnos os defnyddiwyd ffurflen V62 i gefnogi’r cais.

• DVLA - Ymholiadau am Gofrestru a Threthu Cerbydau

Eich tystysgrif yswiriant cerbyd

Gan mai chi yw’r ceidwad cofrestredig, eich cyfrifoldeb chi yw rhoi gwybod i’ch darparwr yswiriant am eich rhif cofrestru newydd.

• Yswiriant cerbydau modur