Gwefan llywodraeth y DU

Beth y mae angen i chi ei wybod

Rhaid i'r grantî lofnodi'r ddogfen cadw rhif (os yw ar gael). Os mai chi yw'r enwebai, bydd angen i chi gael llofnod y grantî ar y ddogfen cadw rhif.

Adnewyddu dogfen cadw rhif

Tua pedair wythnos diwrnod cyn y dyddiad y daw'r ddogfen i ben anfonir llythyr atgoffa at y grantî i ymestyn yr hawl cadw am flwyddyn, dwy flynedd neu dair blynedd.

Llenwch y ddogfen cadw rhif ac amgaewch ffi o £25 am flwyddyn, £50 am ddwy flynedd neu £75 am dair blynedd. Nid oes modd ad-dalu'r ffi.

Os yw'r ddogfen cadw rhif wedi dod i ben, rhaid i'r grantî ddychwelyd y ddogfen a'r ffi briodol gyda llythyr yn egluro pam mae'r cais yn hwyr. Bydd y cais yn cael ei ystyried.

Ychwanegu neu newid manylion enwebai

Gall y grantî ychwanegu neu newid manylion yr enwebai unrhyw adeg neu pan fydd yn aseinio'r rhif cofrestru personol i gerbyd yr enwebai yn un o swyddfeydd lleol DVLA.

Dylech lenwi'r ddogfen cadw rhif ac amgáu'r ffi o £25. Rhaid i'r grantî lofnodi'r ddogfen.

Newidiadau i enw a chyfeiriad y grantî oherwydd priodas neu ysgariad ayb

Bydd angen i'r grantî lenwi'r ddogfen a'i dychwelyd i DVLA gyda llythyr esboniadol gan amgáu unrhyw ddogfennau perthnasol i gefnogi'r newidiadau. Ni chodir tâl am hyn.

Camgymeriadau ar y ddogfen cadw rhif

Bydd angen i'r grantî ddychwelyd y ddogfen i DVLA gyda llythyr esboniadol yn rhoi manylion am y camgymeriadau, ee gwallau sillafu. Ni chodir tâl am hyn.

Cael dogfen cadw rhif newydd yn lle un sydd ar goll neu wedi'i dwyn

Bydd angen i'r grantî wneud cais am ddogfen arall yn ysgrifenedig. Ni chodir tâl am hyn

Beth y mae angen i chi ei anfon i DVLA

Dychwelwch y ddogfen cadw rhif:

• ar ôl llenwi'r adran briodol a sicrhau ei bod wedi'i llofnodi gan y grantî
• gyda'r ffi briodol os oes angen - dylid gwneud sieciau'n daladwy i 'DVLA, Abertawe'
• gyda llythyr esboniadol os oes angen, a hwnnw wedi'i lofnodi gan y grantî
• i'r Adran Trosglwyddo Rhifau Arbennig, A2, DVLA, Abertawe, SA99 1BW

Os nad yw'r ddogfen cadw rhif gennych am ba bynnag reswm, anfonwch lythyr esboniadol wedi'i lofnodi gan y grantî.

Pryd fydd eich dogfen cadw rhif newydd yn cyrraedd

Bydd dogfen cadw rhif newydd yn cael ei phostio at y grantî. Caniatewch dair i bedair wythnos iddi gyrraedd cyn cysylltu â gwasanaeth ymholiadau cwsmeriaid DVLA.

Os yw grantî neu enwebai yn marw

Os yw'r grantî wedi marw, gall yr ysgutor neu'r buddiolwr wneud y canlynol:

• gwneud cais am ildio'r ddogfen cadw rhif ac i'r ffi aseinio £80 gael ei had-dalu, neu
• gwneud cais am gael cadw'r rhif cofrestru ac ychwanegu eu manylion nhw ar y ddogfen cadw rhif
• gwneud y cais yn ysgrifenedig, gan amgáu'r ddogfen cadw rhif a chopi o'r dystysgrif marwolaeth a'r grant profiant

• ei anfon i'r Adran Trosglwyddo Rhifau Arbennig, A2, DVLA, Abertawe, SA99 1BW

• Os yw'r enwebai wedi marw, gall y grantî wneud cais i newid manylion yr enwebai.