Gwefan llywodraeth y DU

Dogfennau adnabod

Rhaid i chi gyflwyno dogfennau gwreiddiol. Ni fydd DVLA yn derbyn llungopïau na thystysgrifau wedi'u lamineiddio.

Pasport digidol y Deyrnas Unedig (DU)

Os oes gennych basport digidol (y llun a’r llofnod yn ymddangos ar yr un dudalen), gall DVLA gadarnhau pwy ydych chi gyda'r Gwasanaeth Hunaniaeth a Phasportau. Does dim rhaid i chi anfon eich pasport at DVLA.

Wrth wneud cais ar-lein, gofynnir i chi roi eich rhif pasport naw digid sy'n caniatáu i DVLA gadarnhau pwy ydych chi.

Os ydych chi’n gwneud cais drwy'r post, gan ddefnyddio ffurflen D1, 'cais am drwydded yrru', ysgrifennwch eich rhif pasport naw digid a'ch llofnod yn yr adran 'cadarnhau pwy ydych chi' ar y ffurflen D1.

Dogfennau adnabod eraill

Mae'r DVLA hefyd yn derbyn y dogfennau canlynol fel prawf o bwy ydych chi. Ond yn wahanol i'r pasport digidol, bydd angen i chi anfon eich dogfen adnabod gyda'ch cais:

• pasport dilys llawn cyfredol
• trwydded preswylio biometrig (y cerdyn adnabod i ddinasyddion tramor yn flaenorol)
• tystysgrif dinasyddio’r DU

Peidiwch ag anfon eich pasport os bydd ei angen arnoch o fewn y mis nesaf. Os yw hyn yn wir dylech ystyried oedi eich cais am drwydded nes y gallwch ei hanfon gyda’ch pasport at DVLA.

Os ydych wedi cyrraedd oedran Pensiwn y Wladwriaeth, gallwch ddarparu copïau gwreiddiol o un o’r canlynol yn eich enw:

• datganiad banc neu gymdeithas adeiladu diweddar (o fewn tri mis) yn dangos eich tâl pensiwn a’ch rhif Yswiriant Gwladol

llythyr BR2102, BR2103 neu BR5899 sy’n brawf eich bod yn gymwys i gael Pensiwn y Wladwriaeth

Tystysgrifau geni a mabwysiadu y DU

Gellir defnyddio tystysgrifau geni a mabwysiadu y DU hefyd, fodd bynnag, gan nad ydynt yn brawf llwyr o bwy ydych chi, rhaid cael un o'r canlynol gyda hwy:

• Cerdyn Yswiriant Gwladol neu lythyr gan yr Adran Gwaith a Phensiynau yn cynnwys eich rhif Yswiriant Gwladol
• llungopi o dudalen flaen llyfr budd-daliadau neu gopi gwreiddiol o lythyr hawlio budd-daliadau
• P45, P60 neu slip talu
• tystysgrif priodas neu bapurau ysgariad (dyfarniad amodol neu derfynol)
• cerdyn undeb coleg neu brifysgol neu gofnod ysgol

Os nad oes gennych chi dystysgrif geni neu fabwysiadu, neu os nad yw'r un sydd gennych yn dangos eich enw llawn neu wlad eich geni, cysylltwch â'ch swyddfa gofrestru leol.

• Tystysgrif genu a mabwysiadu – sut mae archebu un

Newid enw

Bydd angen i chi hefyd gyflwyno tystiolaeth os yw eich enw wedi newid a'i fod yn wahanol i'r enw ar y ddogfen hunaniaeth y byddwch yn ei darparu, e.e. tystysgrif priodas wreiddiol, dyfarniad amodol neu derfynol neu ddatganiad gweithred newid enw.

Rhaid i'r manylion a gyflwynwch ddangos cyswllt clir rhwng yr enw sydd ar eich dogfen adnabod a'ch enw presennol.

Anfon eich dogfennau adnabod yn ôl

Bydd y DVLA yn anfon eich dogfennau'n ôl o fewn 10 diwrnod gwaith, ar wahân i'ch trwydded, gyda phost dosbarth cyntaf. Os na fyddwch wedi eu cael o fewn yr amser hwn, cysylltwch â llinell ymholiadau cwsmeriaid y DVLA.

Os hoffech chi i DVLA anfon eich dogfennau adnabod yn ôl atoch drwy drefn cludiant arbennig, dylech gynnwys amlen barod ar gyfer cludiant arbennig. Gwnewch nodyn o’r rhif cyfresol er mwyn i chi allu cyfeirio ato.

Ni all DVLA warantu y bydd yn anfon eich dogfennau yn ôl atoch erbyn dyddiad penodol, er enghraifft, gwyliau.

Y gofynion ar gyfer y llun

Bydd angen i chi yrru llun sy'n bodloni safonau penodol er mwyn gallu ei ddefnyddio ar eich trwydded yrru. Efallai y bydd angen cael rhywun i arwyddo cefn y llun hefyd, er mwyn ei ardystio.

• Safonau ac ardystio sydd eu hangen ar gyfer y llun

Gwasanaeth Gwirio Premiwm

Gall cangen o Swyddfa'r Post® neu Swyddfa DVLA leol wirio'ch cais a’i hanfon at DVLA. Nid yw'r gwasanaeth hwn ar gael ar gyfer ceisiadau ar-lein.

• Gwasanaeth gwirio premiwm