Gwefan llywodraeth y DU

I bwy y mae hyn yn berthnasol?

Mae'r gyfradd TAW ostyngol yn gymwys i chi os ydych dros 60 oed a chaiff cymorth symudedd cymhwysol ei gyflenwi a'i osod yn eich cartref chi, neu gartref a rennir gyda ffrindiau a pherthnasau.

Nid oes rhaid i chi archebu na thalu am gyflenwi a gosod y cymorth eich hun. Gall rhywun arall wneud hyn, neu elusen, awdurdod lleol, cymdeithas dai neu unrhyw sefydliad arall. Fodd bynnag, ni allwch elwa ar y gyfradd ostyngol os yw'r gwaith yn cael ei wneud mewn cartref gofal preswyl neu sefydliad tebyg - rhaid i'r gwaith gael ei wneud mewn cartref preifat.

Rhaid i chi fod dros 60 oed ar yr adeg y caiff y gwaith cyflenwi a gosod ei wneud.

Ni fyddwch yn elwa ar y gyfradd ostyngol os byddwch ond yn prynu eitem cymwys - er mwyn cael gostyngiad rhaid i chi drefnu i'r eitem gael ei chyflenwi a'i gosod.

Pa nwyddau y gellir eu cyflenwi a'u gosod ar y gyfradd TAW ostyngol?

Byddwch yn talu cyfradd TAW ostyngol ar gyflenwi a gosod yr eitemau hyn:

• canllawiau bach
• rampiau
• lifftiau grisiau
• lifftiau bath
• seddau cawod gosodedig neu gawodydd sy'n cynnwys seddau cawod gosodedig
• baths cerdded i mewn â drysau y gellir eu selio

Ni chewch y gyfradd ostyngol os byddwch yn gorfod talu am unrhyw waith atgyweirio neu gael nwyddau newydd ar ôl iddynt gael eu gosod.

Ni chewch ychwaith y gyfradd ostyngol ar addasiadau cyffredinol a wneir yn eich cartref, fel lledu cyntedd neu adeiladu estyniad.

Fodd bynnag, os oes gennych salwch hirdymor neu os ydych yn anabl, ni fydd yn rhaid i chi dalu TAW ar nwyddau a gwasanaethau penodol rydych yn eu prynu neu'n dod â hwy i mewn i'r DU a hefyd efallai na chodir TAW ar waith adeiladu penodol a wneir gennych.

• TAW cyfradd sero ar nwyddau, gwasanaethau a cherbydau i bobl anabl

Sut y gallaf gael y gyfradd ostyngol?

Dylai eich cyflenwr wybod am y gyfradd ostyngol a'i chymhwyso'n awtomatig, ond bydd angen i chi ddangos eich bod yn gymwys.

Dylech roi datganiad ysgrifenedig iddo fel yr un isod. Efallai y bydd gan eich cyflenwr ffurflen i chi ei chwblhau.

Rhaid i'r datganiad hwn fod ar wahân i unrhyw anfoneb, archeb neu waith papur arall.

Datganiad: Cymhorthion symudedd i bobl hŷn
Rwyf i ...........................................................................
(enw llawn)
o .........................................................................
(y cyfeiriad lle y gwneir y gwaith gosod)
yn datgan fy mod yn 60 oed neu'n hŷn a bod y gwaith cyflenwi a gosod hwn yn gymwys ar gyfer y gyfradd TAW ostyngol yn unol â Gorchymyn Treth Ar Werth (Cyfradd Ostyngol) 2007.
Llofnod.............................................. Dyddiad.......................................

Os na allwch gwblhau a llofnodi hwn eich hun, yna bydd datganiad gan berthynas, partner neu berson cyfrifol arall yn dderbyniol.

Cysylltu â Chyllid a Thollau Ei Mawrhydi ynghylch TAW cyfradd ostyngol ar gymhorthion symudedd i bobl hŷn

I gael mwy o help ynghylch TAW cyfradd ostyngol ar gymhorthion symudedd i bobl hŷn gallwch gysylltu â Chyllid a Thollau Ei Mawrhydi drwy e-bost, dros y ffôn neu drwy'r post.

• Manylion Cyswllt ar gyfer Cyllid a Thollau Ei Mawrhydi Opens new window