Gwefan llywodraeth y DU

Sut mae Cyllid a Thollau EM yn delio â budd cwmni yn eich cod treth

Mae Cyllid a Thollau EM yn ychwanegu gwerth y budd at unrhyw incwm di-dreth sydd gennych, ac yn tynnu cyfanswm yr incwm nad ydych wedi talu treth arno oddi ar gyfanswm eich lwfansau a'ch gostyngiadau. Y cyfanswm sydd gennych ar ôl yw'r incwm di-dreth y mae gennych yr hawl i'w gael yn y flwyddyn dreth gyfredol.

Enghraifft

Mae gennych hawl i gael y Lwfans Personol sylfaenol o £8,105 (y swm ar gyfer blwyddyn dreth 2012-13) ac mae eich cyflogwr wedi darparu gwerth £600 o yswiriant meddygol preifat i chi:

• mae cyfanswm eich lwfansau a'ch gostyngiadau yn £8,105 (eich Lwfans Personol)
• mae cyfanswm eich 'didyniadau' yn £600 (gwerth eich budd yswiriant meddygol)
• mae eich cyfanswm di-dreth yn £7,505 (£8,105 tynnu £600)

Felly, mae gennych incwm di-dreth o £7,505 a'ch cod treth yw 750L.

Mae'r un egwyddor yn berthnasol i'r holl fuddion cwmni eraill.

Bydd Cyllid a Thollau EM fel arfer yn anfon 'Hysbysiad Cod Talu Wrth Ennill' atoch, sy'n egluro sut yn union y maent wedi delio â'r budd yn eich cod treth.

• Gweld lwfansau Treth Incwm a therfynau incwm ar gyfer 2012-13 Opens new window

• Cael gwybod mwy am sut mae cyfrifo codau treth

Trosolwg o gofnodion budd cwmni yn eich Hysbysiad Cod Talu Wrth Ennill

Budd car

Mae'n rhaid i chi dalu treth ar y budd o ddefnyddio car cyflogwr at eich defnydd personol. Bydd Cyllid a Thollau EM yn cyfrifo gwerth y budd drwy ystyried llawer o bethau, gan gynnwys cost y car, y math o danwydd y mae'n ei ddefnyddio a'i allyriadau carbon deuocsid (CO2).

Budd fan

Mae'n rhaid i chi dalu treth os byddwch yn defnyddio fan eich cyflogwr at ddefnydd personol. Fel arfer codir tâl sylfaenol - sef £3,000 ar hyn o bryd - am hyn. O 6 Ebrill 2010 mae’r tâl sylfaenol wedi’i ostwng i ddim ar gyfer faniau electrig.

Budd tanwydd

Byddwch yn gweld y cod hwn os ydych yn cael tanwydd am ddim sydd ar gael at eich defnydd personol mewn car neu fan cwmni.

Tanwydd ar gyfer ceir: ar gyfer 2012-2013 mae'r 'lluosydd cost tanwydd' y mae Cyllid a Thollau EM yn ei ddefnyddio i gyfrifo gwerth eich budd tanwydd yn £18,000.

Tanwydd ar gyfer faniau: codir tâl unffurf o £550 ar gyfer y flwyddyn dreth 2012-13.

Gallwch ddefnyddio cyfrifiannell ar-lein Cyllid a Thollau EM i weld beth yw gwerth eich budd car a'ch budd tanwydd.

• Cyfrifo eich budd car a thanwydd Opens new window

Benthyca gan eich cyflogwr

Os bydd eich cyflogwr yn rhoi benthyg mwy na £5,000 i chi mae'n rhaid i chi dalu treth ar y budd o dalu dim llog neu log is na'r gyfradd llog swyddogol. Y swm a dynnir oddi ar eich cyflog di-dreth gan Gyllid a Thollau EM yw'r gwahaniaeth rhwng y llog yr ydych yn ei dalu a'r hyn y byddech yn ei dalu pe codwyd llog ar y gyfradd swyddogol.

• Cyfraddau llog swyddogol Opens new window

Yswiriant meddygol

Mae'n rhaid i chi dalu treth ar unrhyw yswiriant meddygol preifat y mae eich cyflogwr yn ei dalu neu'n ei ddarparu ar eich cyfer - felly bydd Cyllid a Thollau EM yn tynnu gwerth hyn o'ch cyflog di-dreth.

Buddion cyflogwr/cyflogwyr eraill

Byddwch yn gweld hyn pan fydd yn rhaid i chi dalu treth ar werth buddion neu dreuliau a ddarperir gan eich cyflogwr nad ydynt yn cael eu cynnwys yn y categorïau uchod.

Os byddwch yn dechrau neu'n rhoi'r gorau i gael budd cwmni trethadwy

Os byddwch yn dechrau cael buddion cwmni trethadwy - er enghraifft os byddwch yn newid swydd - dylech roi gwybod i Gyllid a Thollau EM ar unwaith fel na fyddwch yn cael bil treth mawr ar ddiwedd y flwyddyn. (Does dim rhaid i gyflogwyr ddweud wrth Gyllid a Thollau EM am unrhyw fuddion y byddwch yn eu cael gan y cwmni tan ddiwedd y flwyddyn dreth, oni bai ei fod yn gar cwmni.)

Bydd Cyllid a Thollau EM yn addasu eich rhif cod ac yn dechrau casglu rhywfaint neu'r holl dreth ychwanegol yn gynt - gweler yr adran 'Buddion cwmni newydd a'ch cod treth' isod i gael rhagor o fanylion am sut mae hyn yn gweithio.

Dylech hefyd roi gwybod i Gyllid a Thollau EM os byddwch yn rhoi'r gorau i gael buddion cwmni trethadwy. Gallant wedyn newid eich cod treth a sicrhau nad ydych yn talu gormod o dreth. Y naill ffordd neu'r llall, os byddant yn newid eich cod treth dylech gael Hysbysiad Cod Talu Wrth Ennill newydd wrthynt.

• Cysylltu â Chyllid a Thollau EM Opens new window

Buddion cwmni newydd a'ch cod treth

Os byddwch yn cael budd cwmni trethadwy newydd bydd Cyllid a Thollau EM yn newid eich cod treth er mwyn ystyried:

• y swm 'gwirioneddol' a gafwyd yn ystod y flwyddyn dreth gyfredol
• y swm 'blynyddol' yn y flwyddyn dreth nesaf

Os mai dim ond am ran o'r flwyddyn y byddwch yn cael y budd, bydd Cyllid a Thollau EM yn rhannu'r budd gwirioneddol gyda 12 (misoedd) ac yn casglu'r swm sy'n ddyledus o'r dyddiad y bydd y cod yn newid - golyga hyn na fyddwch wedi talu digon o dreth ar ddiwedd y flwyddyn. Byddant yn casglu'r dreth sy'n ddyledus gennych y flwyddyn nesaf ynghyd â'r swm blynyddol sy'n ddyledus ar gyfer y flwyddyn honno. Bwriad hyn yw lledaenu eich taliadau fel nad oes yn rhaid i chi dalu'r swm llawn ar unwaith.

• Mwy o wybodaeth am sut i ad-dalu'r dreth nad ydych wedi'i thalu

Mwy o ddolenni defnyddiol

• Dysgu mwy am dreth ar fuddion cwmni

• Beth i’w wneud os ydych yn meddwl bod eich cod treth yn anghywir

• Deall eich Hysbysiad Cod Talu Wrth Ennill

Cysylltiadau defnyddiol

• Cysylltiadau arian, treth a budd-daliadau

• Swyddfa Cyfraniadau Yswiriant Gwladol