Gwefan llywodraeth y DU

Camerâu ar gyfer monitro llif y traffig

Defnyddir y camerâu hyn i gasglu gwybodaeth am sut mae’r traffig yn symud. Bydd y Canolfannau Rheoli Traffig Rhanbarthol a Chenedlaethol yn Lloegr yn defnyddio'r wybodaeth hon i ymateb yn gyflym i ddigwyddiadau a thagfeydd ac i sicrhau bod y traffig yn dal i symud.

• Canolfan Rheoli Traffig Genedlaethol Lloegr

Teledu Cylch Cyfyng (CCTV)

Mae camerâu CCTV yr Asiantaeth Priffyrdd yn monitro llif y traffig ar fannau allweddol ar y rhwydwaith, a hynny 24 awr y dydd, bob dydd.

Defnyddir yr wybodaeth i wneud y canlynol:

• monitro’r modd y defnyddir y rhwydwaith
• trefnu llwybrau gwyriadau gyda’r heddlu
• amddiffyn y rhwydwaith rhag cael ei gamddefnyddio/fandaleiddio
• sicrhau diogelwch modurwyr agored i niwed a monitro galwadau gan ffonau argyfwng ar ochr y ffordd
• darparu gwybodaeth am y traffig i’r cyhoedd, gan gynnwys crynodeb byw gan gamerâu CCTV

Caiff yr heddlu wneud cais am gael gweld y delweddau er mwyn gorfodi'r gyfraith.

Mae’r delweddau a ddarlledir ar wefan yr Asiantaeth Priffyrdd yn bodloni’r safonau diogelu data cyfredol. Nid ydynt yn dangos manylion personol megis gwybodaeth a allai ddatgelu pwy yw’r modurwyr na phlatiau rhif y ceir.

Camerâu darllen platiau rhif yn awtomatig

Gellir adnabod y camerâu hyn yn ôl eu casyn gwyrdd llachar, ac ar hyn o bryd fe’u defnyddir mewn oddeutu 500 o safleoedd ar hyd a lled Lloegr. Maent yn gweithio fesul pâr i helpu’r Ganolfan Rheoli Traffig Genedlaethol (NTCC) i fonitro amseroedd teithio. Bydd un camera yn tynnu llun o’r plât rhif wrth i'r car yrru heibio. Bydd y camera nesaf yn darllen y plât rhif ac yn nodi’r amser a gymerodd eich car i deithio rhwng y ddau gamera.

Caiff y data ei gasglu’n awtomatig a’i anfon i’r Ganolfan Rheoli Traffig Genedlaethol bob pum munud. Nid yw'r platiau rhif yn cael eu cofnodi ac ni fydd staff y Ganolfan Rheoli Traffig Genedlaethol fyth yn eu gweld.

Camerâu diogelwch (cyflymder)

Gosodir y camerâu hyn er mwyn gwneud yn siŵr nad yw pobl yn gyrru'n gyflymach na'r cyfyngiad cyflymder. Fel arfer, caiff yr wybodaeth ei phrosesu gan bartneriaethau camerâu diogelwch lleol, awdurdodau lleol, yr heddlu a’r llysoedd. Os cewch eich dal yn goryrru ar y camerâu hyn, bydd yr heddlu’n anfon ‘Hysbysiad o'r bwriad i erlyn’ atoch.

Os hoffech gael mwy o wybodaeth am y rheolau ar gyfer camerâu diogelwch a beth sy'n digwydd os cewch eich dal yn goryrru, dilynwch y ddolen isod.

• Camerâu ar draffyrdd a chefnffyrdd

Camerâu cyflymder cyfartalog

Mae’r rhain yn mesur y cyflymder rhwng dau bwynt er mwyn gwneud yn siŵr nad yw gyrwyr yn gyrru'n gyflymach na'r cyfyngiad cyflymder cyfartalog. Byddant yn cael eu gosod yn aml ger gwaith ffordd sylweddol lle mae cyfyngiadau cyflymder dros dro ar waith.

Camerâu diogelwch mewn un lle

Bydd y camerâu hyn yn mesur cyflymder cerbydau wrth iddynt basio un lle. Byddant yn cael eu gosod yn aml ger gwaith ffordd sylweddol neu mewn ardaloedd ar y rhwydwaith lle ceir hanes o ddamweiniau.

Camerâu gorfodi digidol

Fel rheol, caiff camerâu gorfodi digidol eu defnyddio i orfodi cyfyngiadau cyflymder newidiol a ddangosir ar arwyddion uwchben rhai traffyrdd. Bydd y cyfyngiadau cyflymer hyn yn newid mewn ymateb i’r amodau traffig. Os bydd gyrwyr yn cadw atynt, maent yn gwella llif y traffig ac yn lleihau amseroedd teithio.

• Rheoli tagfeydd ar y draffordd

Mwy o ddolenni defnyddiol

• Cyfyngiadau cyflymder – sut cânt eu pennu (adran y cartref a’r gymuned)

• Ardystiadau a phwyntiau cosb (adran moduro)

• Cynllunio’ch siwrnai

Cysylltiadau defnyddiol

• Yr Adran Drafnidiaeth

• Transport for London (TfL)