Gwefan llywodraeth y DU

Rôl y Gwasanaeth Gwybodaeth am Draffig Cenedlaethol

Mae'r Gwasanaeth Gwybodaeth am Draffig Cenedlaethol (NTIS) yn helpu'r Asiantaeth Priffyrdd i weithredu'r rhwydwaith ffyrdd strategol yn effeithiol. Mae'n gwneud hyn drwy gasglu gwybodaeth yn gyflym am y sefyllfa draffig ar y rhwydwaith a throi hynny'n wybodaeth ddefnyddiol.

Gall staff yr Asiantaeth Priffyrdd yn y Ganolfan Gweithrediadau Traffig Genedlaethol (NTOC) ddefnyddio'r wybodaeth hon i ymateb i ddigwyddiadau, damweiniau a llifau traffig. Er enghraifft drwy ddangos arwyddion gwyriadau traffig. Gallant hefyd drosglwyddo gwybodaeth amser real am draffig i'r cyfryngau newyddion i deithwyr, sefydliadau a defnyddwyr ffyrdd drwy:

• arwyddion negeseuon electronig wrth ymyl y ffordd
• gwefannau Traffic England a Cross & Stitch
• dyfeisiau symudol
• ffrydiau data a all gael eu hailddefnyddio'n hawdd, megis gwybodaeth am draffig ar fapiau Google
  

• Cynllunio eich taith

• Cael gwybodaeth am draffig pan fyddwch yn teithio

Yr NTOC a chanolfannau rheoli rhanbarthol

Mae'r NTOC yn cael gwybodaeth gan y saith canolfan reoli ranbarthol yn Lloegr. Ymhlith tasgau'r canolfannau hyn mae:

• derbyn galwadau o ffonau argyfwng wrth ymyl y ffordd
• anfon Swyddogion Traffig yr Asiantaeth Priffyrdd i ddigwyddiadau
• penderfynu ar lwybrau amgen
• gosod arwyddion ffyrdd electronig ar gyfer eu rhanbarth

Mae swyddogion yr heddlu a staff o blith contractwyr cynnal a chadw yr Asiantaeth Priffyrdd hefyd wedi'u lleoli mewn rhai Canolfannau Rheoli Rhanbarthol.

• Swyddogion Traffig yr Asiantaeth Priffyrdd

Sut y cesglir data ar draffig

Yn ogystal â defnyddio gwybodaeth a roddir gan Ganolfannau Rheoli Rhanbarthol a Swyddogion Traffig ar y ffyrdd, mae'r NTOC yn casglu data gan y canlynol:

• cyfarpar monitro llif traffig
• camerâu adnabod rhifau ceir yn awtomatig
• yr heddlu, awdurdodau lleol a sefydliadau eraill

Cyfarpar monitro llif traffig

Mae cyfarpar monitro llif traffig yn cynnwys:

• gorsafoedd monitro traffig sy'n cael eu gweithredu drwy ynni'r haul
• y system Canfod Digwyddiadau ar y Draffordd a Signalau Awtomatig (MIDAS)

Mae 1,500 o orsafoedd monitro traffig sy'n cael eu gweithredu drwy ynni'r haul ledled Lloegr. Maent yn mesur llif a chyflymder cyfartalog traffig ac yn anfon y data hwn yn ôl i'r NTOC bob pum munud.

Defnyddir MIDAS i ganfod ciwiau ar y rhannau prysuraf o draffyrdd. Pan fydd yn gweld bod ciw, mae hefyd yn rhybuddio gyrwyr drwy ddangos arwyddion negeseuon electronig uwchlaw ffyrdd.

• Arwyddion negeseuon electronig

Camerâu adnabod rhifau ceir yn awtomatig

Mae tua 1,100 o gamerâu adnabod rhifau ceir yn awtomatig mewn tua 500 o leoliadau yn Lloegr. Fe'u defnyddir i fonitro cyflymder cyfartalog, sy'n helpu'r NTOC i ganfod tagfeydd yn gyflym.

I gael rhagor o wybodaeth am y mathau o gamerâu a osodir ar brif ffyrdd a sut y caiff y data ei ddefnyddio, gweler 'Camerâu ar draffyrdd a chefnffyrdd'.

• Camerâu ar draffyrdd a chefnffyrdd

Yr heddlu ac awdurdodau lleol

Mae'r NTOC yn cadw mewn cysylltiad agos â'r heddlu ar draws y rhwydwaith a hefyd â 116 o awdurdodau lleol. Mae hyn yn sicrhau bod yr Asiantaeth Priffyrdd yn ymwybodol o ddigwyddiadau a gwaith ffordd a allai effeithio ar amseroedd teithio.

Sefydliadau eraill sy'n cyfrannu at ddata NTOC

Mae'r NTOC yn gweithio gydag amrywiaeth o sefydliadau eraill sy'n creu llif traffig. Mae hyn yn helpu'r Asiantaeth Priffyrdd i gynllunio ar gyfer digwyddiadau mawr a all achosi tagfeydd. Ymhlith y sefydliadau mae porthladdoedd, meysydd awyr, lleoliadau adloniant, clybiau pêl-droed a chanolfannau siopa.

Cysylltiadau defnyddiol

• Yr Adran Drafnidiaeth

• Transport for London