Gwefan llywodraeth y DU

Gwasanaethau estynedig trwy ysgolion

Efallai y bydd ysgolion yn cynnig ystod estynedig o wasanaethau i ddisgyblion a’u teuluoedd. Gall hwn gynnwys gofal plant cyn ac ar ôl ysgol a gweithgareddau fel brecwast, gwaith cartref a chlybiau chwaraeon.

Am wybodaeth ynghylch y gofal plant a gweithgareddau cyn ac ar ôl ysgol y mae ysgol eich plentyn o bosib yn eu cynnig, dylech gysylltu â’r ysgol yn uniongyrchol.

Costau

Bydd ysgolion yn ceisio cadw’r costau mor isel â phosibl, ond fel arfer, bydd angen i chi dalu am ofal plant ac am rai clybiau. Os ydych chi ar incwm isel, mae amrywiaeth o gymorth ariannol ar gael i’ch helpu i fforddio’r costau hyn.

• Budd-daliadau gofal plant a help i rieni sy'n mynd yn ôl i'r gwaith

Clybiau ar ôl ysgol

Yn aml, bydd clybiau ar ôl ysgol wedi’u lleoli ar dir yr ysgol, ond gallant hefyd fod wedi’u lleoli mewn clybiau ieuenctid, neuaddau pentref a chanolfannau cymunedol. Gallant gael eu cynnal gan yr ysgolion eu hunain, neu gan sefydliadau preifat neu wirfoddol.

Mae’r clybiau’n rhoi man diogel i chwarae, ymlacio a chymdeithasu. Gall rhai clybiau nad ydynt yn gysylltiedig ag ysgolion ddod i gasglu’r plant o’u hysgol ar ddiwedd y dydd.

Oriau agor

Fel arfer, bydd clybiau ar ôl ysgol ar agor o 3.30 pm tan 6.00 pm yn ystod tymor yr ysgol – er bod rhai hefyd ar agor yn ystod gwyliau’r ysgol.

Costau

Ar gyfartaledd, bydd clybiau ar ôl ysgol yn costio tua £7.00 y sesiwn, ond gall prisiau amrywio. Gallwch gael gwybod mwy am brisiau yn eich ardal drwy gysylltu â’ch Gwasanaeth Gwybodaeth i Deuluoedd lleol.

• Dod o hyd i’ch Gwasanaeth Gwybodaeth Teulu Opens new window

Clybiau brecwast

Mae clybiau brecwast yn rhoi pryd o fwyd iach a man diogel i blant aros i’r ysgol ddechrau. Bydd gofalwyr yn mynd â’ch plentyn i’r ysgol mewn pryd i gofrestru neu, os yw’r clwb wedi’i leoli yn ysgol eich plentyn, byddant yn gofalu amdanynt nes i’r gwersi ddechrau.

Oriau agor

Fel arfer gallwch adael eich plentyn mewn clwb brecwast unrhyw bryd ar ôl tua 7.30 am.

Costau

Mae costau clybiau brecwast yn dechrau o £2.00 y dydd, ond mae hyn yn amrywio.

• Clybiau brecwast - cael gwybod mwy

Cynlluniau chwarae/clybiau gwyliau

Fel arfer, cynigir y clybiau hyn fel rhan o wasanaethau estynedig ysgol, ond gallant hefyd gael eu cynnal gan sefydliadau preifat neu fudiadau gwirfoddol. Gallant fod wedi’u lleoli ar dir yr ysgol, neu mewn clybiau ieuenctid, neuaddau pentref a chanolfannau cymunedol. Maent yn cynnig amrywiaeth eang o weithgareddau chwarae yn ystod gwyliau’r ysgol.

Oriau agor

Fel arfer, bydd cynlluniau chwarae gwyliau ar agor o 8.00 am tan 6.00 pm yn ystod gwyliau’r haf. Efallai y bydd rhai hefyd ar agor dros wyliau’r Pasg a gwyliau hanner tymor.

Costau

Ar gyfartaledd, bydd cynlluniau chwarae gwyliau’n costio £20.00 y dydd, ond mae hyn yn amrywio.

• Cael gwybod am gynlluniau gwyliau ysgolion yn eich ardal chi Opens new window

Gwarchodwyr plant

Fel arfer, bydd gwarchodwyr plant yn gofalu am blant dan 12 yng nghartref y gwarchodwr plant, a byddant yn aml yn mynd i nôl plant o’r ysgol.

Oriau

Bydd y rhan fwyaf o warchodwyr plant yn gweithio o 8.00 am tan 6.00 pm, ond byddant fel arfer yn hyblyg.

Costau

Mae gwarchodwyr plant yn tueddu i godi unrhyw beth rhwng £2.50 a £7.50 yr awr.

• Dod o hyd i warchodwyr plant yn eich ardal Opens new window

Nanis a gofalwyr yn y cartref

Fel arfer, bydd nanis yn gofalu am blant yn eich cartref chi, a gallant ofalu am blant o unrhyw oed.

Oriau

Bydd nifer o nanis yn byw yng nghartref y teulu y maent yn gweithio iddynt. Ble bynnag y byddant yn byw, bydd eu horiau’n hyblyg fel arfer.

Costau

Bydd ffioedd nanis yn dechrau oddeutu £6.00 (neu £9.00 yn Llundain) yr awr, ond mae hyn yn tueddu i amrywio’n fawr. Bydd angen i chi hefyd dalu cyfraniadau treth ac Yswiriant Gwladol eich nani.

• Dod o hyd i nani - cyflwyniad