Gwefan llywodraeth y DU

A yw pob ysgol yn cynnig gwasanaethau estynedig?

Yr ysgolion eu hunain sy’n penderfynu pa wasanaethau estynedig maent am eu cynnig. I gael gwybodaeth ynghylch pa wasanaethau y mae ysgol eich plentyn yn eu cynnig, dylech gysylltu â’r ysgol yn uniongyrchol.

Mathau o wasanaethau estynedig sydd ar gael

Dyma enghreifftiau o’r mathau o wasanaethau estynedig y gallai ysgolion eu cynnig:

• cyfleoedd dysgu y tu allan i’r diwrnod ysgol, megis cefnogaeth astudio neu glybiau gwaith cartref
• gwasanaethau cymorth i rieni neu wasanaethau mwy arbenigol megis gwasanaethau iechyd, gwaith cymdeithasol neu anghenion addysgol arbennig
• gweithgareddau chwaraeon a chelfyddydol
• gwasanaethau gofal plant cyn ac ar ôl ysgol
• cyfle i’r gymuned ddefnyddio cyfleusterau'r ysgol, er enghraifft ar gyfer dysgu oedolion a dysgu fel teulu, chwaraeon a Thechnoleg Gwybodaeth a Chyfathrebu

A all ysgolion godi ffi am weithgareddau gwasanaethau estynedig?

Gall ysgolion godi ffi am weithgareddau gwasanaethau estynedig fel clybiau brecwast, clybiau y tu allan i’r ysgol (gan gynnwys clybiau gwaith cartref) a gofal plant. Gall y ffioedd hyn dalu am bethau fel costau staff dysgu neu staff eraill sy’n arwain gweithgareddau, neu athro cyflenwi a fydd yn dod i gynnal clwb. Ni ddylai cyfanswm y ffioedd fod yn uwch na chost darparu'r gweithgaredd, ac ni ddylid gofyn i unrhyw riant dalu am gostau plant eraill.

Hyd yn oed os cânt eu cynnal y tu allan i oriau’r ysgol, ni all ysgolion godi ffi am weithgareddau os ydynt yn rhan o’r canlynol:

• y Cwricwlwm Cenedlaethol
• maes llafur ar gyfer arholiad cyhoeddus y mae’r ysgol yn paratoi’r disgyblion ar ei gyfer
• cwricwlwm sylfaenol yr ysgol ar gyfer addysg grefyddol
  

Cymorth ariannol i dalu am wasanaethau estynedig

Os ydych yn gweithio ac yn talu i’ch plentyn fynychu clybiau y tu allan i’r ysgol, efallai y gallwch gael credydau treth i'ch helpu gyda'r costau. Bydd swm y credydau treth a gewch chi yn dibynnu ar incwm y rhieni. Er hynny, er mwyn bod yn gymwys, mae'n rhaid bod y clwb, neu'r clybiau, wedi cofrestru ag Ofsted ar un o’r canlynol:

• y gofrestr orfodol ar gyfer plant rhwng pump a saith oed
• y gofrestr wirfoddol ar gyfer plant wyth oed a hŷn

Nid oes rhaid i glybiau sy’n cael eu rhedeg yn uniongyrchol gan yr ysgol gofrestru.

Gallwch gael help â chostau’r gofal plant a ddarperir drwy’r gwasanaethau estynedig drwy elfen gofal plant y Credyd Treth Gwaith. I weld a ydych chi’n gymwys, dilynwch y ddolen isod.

• Help gyda chostau gofal plant – ydych chi'n gymwys i gael credydau treth ychwanegol?

Mwy o ddolenni defnyddiol

• Gofal plant