Gwefan llywodraeth y DU

Trefn yr hyfforddiant

Mae’r cwrs CBT wedi’i drefnu mewn modd sy’n golygu eich bod yn dilyn cyfres o elfennau. Ni fyddwch yn symud ymlaen i’r elfen nesaf nes bydd eich hyfforddwr yn fodlon eich bod wedi:

• dysgu’r theori angenrheidiol
• wedi dangos y sgiliau ymarferol hyd at lefel sylfaenol ddiogel

O fewn pob elfen, caiff yr hyfforddwr ddarparu’r hyfforddiant yn y drefn y mae’n teimlo fyddai fwyaf addas ar eich cyfer chi.

Faint o bobl y byddwch chi’n cael hyfforddiant gyda hwy

Yn ystod eich cwrs CBT, efallai y byddwch chi’n cael hyfforddiant gyda dysgwyr eraill, hyd at:

• bedwar dysgwr am bob hyfforddwr yn ystod elfennau ar y safle
• dau ddysgwr am bob hyfforddwr yn ystod elfennau ar y ffordd

Peidiwch â chymryd y cwrs CBT yn ysgafn – mae'r hyfforddwyr yn feicwyr modur profiadol, ac mae ganddynt gyngor gwerthfawr i'w rannu â chi.

Sut i gael gwybod mwy ynghylch CBT

Gallwch weld gwybodaeth fanylach am yr hyn ddylech ei ddisgwyl yn ystod eich hyfforddiant CBT yn y llyfr 'The official DSA guide to learning to ride'.

• Prynu 'The official DSA guide to learning to ride' ar-lein Opens new window

Elfen A – cyflwyniad i CBT

Bydd eich hyfforddwr yn egluro’r pethau sylfaenol, ac ni fydd yn sôn llawer am y materion cymhleth.

Lle bynnag y bo’n bosib, bydd eich hyfforddwr yn defnyddio enghreifftiau i helpu i egluro ei bwyntiau.

Byddant yn gwneud yn siŵr bod gennych chi hawl i yrru mopedau neu feiciau modur. Os bydd angen, bydd eich hyfforddwr yn egluro beth mae angen i chi ei wneud er mwyn cael yr hawl hon – er enghraifft, gwneud cais am drwydded beic modur dros dro.

Ar ddiwedd yr elfen hon, dylech chi ddeall pwrpas a chynnwys y cwrs CBT.

Beth fydd elfen A yn ei gynnwys

At ei gilydd, bydd yr elfen yn ymdrin â’r canlynol:

• golwg gyffredinol ar CBT
• offer a dillad diogelwch
• prawf golwg

• Y cerbydau y cewch chi eu gyrru a pha mor hen mae'n rhaid bod i'w gyrru

• Helmedau diogelwch a dillad diogelwch ar gyfer beicwyr modur

• Gofynion o ran golwg wrth yrru

Elfen B – hyfforddiant ymarferol ar y safle

Mae’r elfen hon yn eich cyflwyno i’r beic modur. Ni fyddwch yn dechrau gyrru’r beic modur yn yr elfen hon, ond byddwch yn cael hyfforddiant ymarferol.

Ar ddiwedd yr elfen hon:

• byddwch yn gallu dangos bod gennych chi wybodaeth am sut mae beic modur yn gweithio
• dylech gael teimlad o bwysau a chydbwysedd beic modur

Beth fydd elfen B yn ei gynnwys

At ei gilydd, bydd yr elfen yn ymdrin â’r canlynol:

• technegau rheoli beic modur
• profion diogelwch sylfaenol a defnyddio'r polion sefyll
• symud y brêc heb ei danio a brecio i stopio
• dechrau a diffodd yr injan

Elfen C – gyrru ymarferol ar y safle

Yn yr elfen hon, byddwch yn dechrau gyrru beic modur. Erbyn gorffen yr elfen hon, byddwch wedi meithrin digon o sgiliau sylfaenol i’ch galluogi i yrru beic modur dan reolaeth.

Byddwch yn dysgu’r technegau hanfodol, gan gynnwys:

• cadw golwg y tu ôl i chi
• y drefn ‘cadw golwg – arwydd – symud’ (OSM)
• y drefn ‘lleoliad – cyflymder – edrych’ (PSL)

Byddwch wedyn yn ymarfer y sgiliau ymarferol hyn nes bod eich hyfforddwr yn fodlon y byddwch chi'n ddiogel pan fydd yn mynd â chi ar y ffordd.

Beth fydd elfen C yn ei gynnwys

At ei gilydd, bydd yr elfen yn ymdrin â’r canlynol:

• gyrru mewn llinell syth a stopio
• gyrru’n araf
• defnyddio’r breciau
• newid gêr
• gyrru siâp rhif wyth
• stopio mewn argyfwng
• cadw golwg y tu ôl i chi
• troi i’r chwith ac i’r dde
• tro pedol

Elfen D – hyfforddiant ymarferol ar y ffordd

Ar ôl cyflawni'r theori a'r hyfforddiant ymarferol oddi ar y ffordd, bydd eich hyfforddwr nawr yn eich paratoi ar gyfer elfen ar y ffordd CBT.

Bydd yr elfen hon yn ymdrin â'r wybodaeth y mae ei hangen arnoch i yrru’n gyfreithlon ac yn ddiogel ar y ffordd. Dyma fydd y sylfaen i'ch oes fel beiciwr modur.

Mae’n bosib y bydd rhannau o’r theori hon yn cael eu hatgyfnerthu yn elfen E mewn sefyllfaoedd ymarferol.

Beth fydd elfen D yn ei gynnwys

At ei gilydd, bydd yr elfen yn ymdrin â’r canlynol:

• gwneud yn siŵr bod defnyddwyr eraill y ffordd yn gallu eich gweld chi
• gofynion cyfreithiol
• pa mor agored i niwed yw beicwyr modur
• cyflymder
• Rheolau'r Ffordd Fawr
• rhagweld
• cadw golwg y tu ôl i chi
• lleoliad ar y ffordd
• pellter rhwng cerbydau
• amodau'r tywydd
• arwynebau ffyrdd
• alcohol a chyffuriau
• agwedd
• adnabod peryglon

• Rheolau’r Ffordd Fawr

Elfen E – gyrru ymarferol ar y ffordd

Dyma yw elfen olaf y cwrs CBT. Byddwch yn gyrru ar y ffordd gyda hyfforddwr ardystiedig, a chydag un hyfforddwr dan hyfforddiant arall o bosib, a hynny am ddwy awr o leiaf. Bydd gennych gyswllt radio â’r hyfforddwr.

Bydd yn rhaid i chi brofi y gallwch ymdopi’n ddiogel ag amrywiol amodau ffordd a thraffig.

Disgwyliwch i'ch hyfforddwr stopio weithiau i drafod rhai elfennau o’ch sgiliau gyrru. Bydd hefyd yn egluro sut y dylech roi'r theori rydych wedi'i dysgu ar waith.

Bydd eich hyfforddwr yn asesu eich sgiliau gyrru drwy’r amser. Bydd yn llofnodi tystysgrif cwblhau (DL196) pan fydd yn fodlon eich bod yn ddiogel i barhau i ddysgu ar eich pen eich hun.

Beth fydd elfen E yn ei gynnwys

At ei gilydd, bydd yr elfen yn ymdrin â’r canlynol:

• goleuadau traffig
• cylchfannau
• cyffyrdd
• croesfannau cerddwyr
• gyrru ar lethrau a gelltydd
• corneli
• rhwystrau
• tro pedol
• stopio mewn argyfwng

• Adnabod eich arwyddion traffig

Mwy o ddolenni defnyddiol

• Hyfforddiant sylfaenol gorfodol (CBT): sut mae ei ddilyn a phryd

• Egluro'r prawf theori

• Egluro'r prawf beic modur ymarferol

• Gofynion sylfaenol ar gyfer mopedau a beiciau modur sy'n gerbydau prawf