Gwefan llywodraeth y DU

Rheolau ar gyfer gyrwyr dan hyfforddiant

Cyn i chi ddechrau gyrru, rhaid i chi:

• gael trwydded yrru dros dro ddilys ar gyfer Gwledydd Prydain neu Ogledd Iwerddon
• sicrhau bod unrhyw gerbyd a yrrir gennych yn ddiogel i fynd ar y ffordd ac wedi'i drethu a'i yswirio'n briodol

Mae'n bwysig dysgu arferion gyrru diogel pan fyddwch chi'n dechrau gyrru am y tro cyntaf, gan ei bod yn anodd cael gwared ag arferion drwg.

Mae'n annhebygol y byddai gan unrhyw un heblaw am Hyfforddwr Gyrru Cymeradwy (ADI) y profiad, y wybodaeth a'r hyfforddiant i'ch dysgu chi'n iawn. Bydd dysgu arferion gyrru diogel o'r dechrau yn golygu eich bod chi a phobl eraill yn fwy diogel ar y ffordd.

Os byddwch chi am ymarfer gyrru gyda gyrrwr arall, rhaid i'r gyrrwr sydd gyda chi fod dros 21 oed ac wedi bod â thrwydded lawn (ac yn dal i fod â'r drwydded honno) ers tair blynedd.

Fel gyrrwr dan hyfforddiant, rhaid i chi arddangos platiau 'L' ('L' neu 'D' yng Nghymru) mewn man amlwg ar flaen a chefn y cerbyd rydych chi'n ei yrru.

* Nodwch os gwelwch yn dda – ni all deiliaid trwyddedau dros dro categori B dynnu ôl-gerbyd (naill ai gyda neu heb lwyth) nes eu bod wedi pasio’r prawf priodol.

Oedran ieuengaf er mwyn sefyll prawf

Fe allwch chi sefyll eich prawf theori unwaith y bydd eich trwydded dros dro yn ddilys.

Fel arfer, ar gyfer gyrwyr ceir, y dyddiad cynharaf y gall eich trwydded dros dro ddod yn ddilys yw ar eich pen-blwydd yn 17 oed. Gallwch wneud cais am y drwydded hyd at dri mis cyn eich pen-blwydd yn 17, fodd bynnag bydd dal angen i chi aros tan eich pen-blwydd cyn gallu sefyll eich prawf theori.

Am ragor o wybodaeth am wneud cais am drwydded dros dro, cliciwch ar y ddolen isod.

• Gwneud cais am drwydded yrru dros dro

Lwfans byw i'r anabl

Os ydych chi'n derbyn lwfans byw i'r anabl ar y gyfradd uwch bydd eich trwydded dros dro yn ddilys pan fyddwch chi'n 16 oed, ond gallwch chi wneud cais am y drwydded o fewn tri mis i'ch pen-blwydd yn 16.

Gyrwyr beiciau modur

Cynllun mynediad uniongyrchol

Cynllun yw mynediad uniongyrchol sy'n galluogi person dros 21 oed i osgoi'r gwaharddiad dwy flynedd/25 cilowat (kW) drwy sefyll prawf ar beiriant sydd ag o leiaf 35 kW (46.6 marchnerth brêc (bhp)). Bydd pasio'r prawf yn caniatáu i chi yrru beic o unrhyw faint. Os ydych chi'n hyfforddi ar beiriant sydd â manyleb fwy na'r fanyleb arferol ar gyfer beiciau modur i yrwyr dan hyfforddiant, dylai hynny fod wedi'i oruchwylio bob amser gan hyfforddwr beic modur cymeradwy sydd mewn cysylltiad dros radio. Dylech hefyd wisgo dillad llachar neu ddillad sy'n adlewyrchu golau, a dilyn pob cyfyngiad arall ar y drwydded dros dro.

Mynediad cyflym

Os yw gyrwyr beic yn 21 oed ond o fewn y cyfnod dwy flynedd lle mae'r cyfyngiad o 25 kW (33ph) ar beiriannau mewn grym, a hwythau'n dymuno gyrru beiciau mwy, rhaid iddynt basio prawf pellach ar feic modur sydd ag o leiaf 35 kW (46.6 bhp). Gallant ymarfer ar feiciau sydd dros 25 kW (33 bhp) o dan yr un amodau ymarfer â gyrwyr beic mynediad uniongyrchol. Byddwch yn dychwelyd i statws gyrrwr dan hyfforddiant tra'n ymarfer ar feic modur sydd â mwy na 25 kW (33 bhp), er na fydd methu'r prawf yn effeithio ar eich trwydded bresennol.

Mopedau a thractorau

Os ydych chi eisiau gyrru moped, fe gewch chi sefyll eich prawf theori pan fyddwch chi'n 16, ond eto mae'n rhaid i chi sicrhau bod gennych chi drwydded dros dro ddilys.

Os ydych chi'n 16 ac eisoes â thrwydded dros dro ar gyfer cerbyd amaethyddol neu foped, bydd hyn yn rhoi hawl dros dro i chi yrru car pan fyddwch chi'n 17.

• Ynghylch hyfforddiant sylfaenol gorfodol (CBT)

Mwy o ddolenni defnyddiol

• A oes angen i chi sefyll prawf gyrru theori?

• Egluro'r prawf theori

• Egluro'r prawf car ymarferol