Gwefan llywodraeth y DU

Cerbydau sydd wedi eu hadeiladu gan ddefnyddio cyfuniad o ddarnau newydd neu ail-law

Er mwyn cadw rhif cofrestru gwreiddiol car neu fan ysgafn sydd wedi cael ei hailadeiladu, bydd angen i chi ddefnyddio un o’r canlynol:

• y siasi gwreiddiol heb ei addasu neu’r corff heb ei newid
• siasi neu gorff ungragen newydd (y corff a’r siasi yn un uned – ungragen) o’r un fanyleb â’r gwreiddiol gyda thystiolaeth gan y cwmni a werthodd y car neu’r gwneuthurwr i ategu hynny (e.e. derbynneb)

Bydd gofyn bod gennych ddwy brif gydran arall o’r cerbyd gwreiddiol hefyd.

Gall y cydrannau hyn gynnwys unrhyw un o’r canlynol:

• yr hongiad (blaen ac ôl)
• cydosodiad y llyw
• y ddwy echel
• y trawsyriant
• injan

Os defnyddir siasi neu gorff ungragen ail-law, rhaid i'r car neu'r fan ysgafn basio prawf Cymeradwyaeth Cerbyd Unigol (IVA) neu Gymeradwyaeth Cerbyd Sengl (SVA). Os bydd eich cerbyd yn pasio, caiff rif cofrestru â ‘Q’ yn llythyren flaen. Os bydd y cerbyd yn methu, ni ellir ei gofrestru.

Ni fydd modd i gerbyd cyflenwi â Thystysgrif Dinistrio gael ei ailgofrestru dan y rheolau ynghylch ailadeiladu.

• Y Cynllun Cymeradwyaeth Cerbyd Unigol

• Beth yw'r cynllun Cymeradwyaeth Cerbyd Sengl?

Beiciau modur sydd wedi cael eu hadeiladu gan ddefnyddio cyfuniad o ddarnau newydd neu ail-law

Os hoffech chi gadw rhif cofrestru gwreiddiol eich beic modur, bydd angen i chi ddefnyddio ffrâm heb ei haddasu (gwreiddiol neu newydd). Bydd gofyn bod gennych ddwy brif gydran arall o’r cerbyd gwreiddiol hefyd.

Gall y cydrannau hyn gynnwys unrhyw rai o’r canlynol:

• ffyrch
• olwynion
• injan
• blwch gêr

Os defnyddir ffrâm ail-law, bydd yn rhaid i’r cerbyd basio’r prawf Cymeradwyaeth Cerbyd Sengl i Feiciau Modur (MSVA). Os bydd y beic modur yn pasio, caiff rif cofrestru â ‘Q’ yn llythyren flaen. Os bydd y beic modur yn methu, ni ellir ei gofrestru.

• Y Cynllun Cymeradwyaeth Cerbyd Sengl i Feiciau Modur (MSVA)

Rhifau Adnabod Cerbyd a rhifau cofrestru ‘Q’

Yn ôl y gyfraith, mae’n rhaid i bob cerbyd a ddefnyddir ar ffyrdd cyhoeddus gael Rhif Adnabod Cerbyd (VIN) a rhif cofrestru. Yn yr erthygl ganlynol, cewch wybod mwy am y rhif adnabod cerbyd ac am rifau cofrestru, yn ogystal â sut mae cael rhai newydd.

• Rhifau adnabod cerbyd a rhifau cofrestru ‘Q’

Cerbydau sy’n cael rhifau cofrestru gwahanol

Os bydd cerbydau cofrestredig yn cael rhifau cofrestru gwahanol, bydd angen iddynt basio Prawf Cymeradwyaeth Cerbyd Unigol (IVA), cynllun Cymeradwyaeth Cerbyd Sengl (SVA) neu gynllun Cymeradwyaeth Cerbyd Sengl i Feiciau Modur (MSVA). Bydd y math o brawf, a’i lefel, yn dibynnu ar y cerbyd.

• Y Cynllun Cymeradwyaeth Cerbyd Unigol

• Beth yw'r cynllun Cymeradwyaeth Cerbyd Sengl?

• Y Cynllun Cymeradwyaeth Cerbyd Sengl i Feiciau Modur (MSVA)

Beth fydd ei angen arnoch i gofrestru eich cerbyd

Mae pa ddogfennau y bydd eu hangen arnoch i gofrestru eich cerbyd yn dibynnu ar nifer o bethau, megis a oedd angen i’r cerbyd gael prawf IVA. Bydd angen i chi fynd â’r canlynol i’ch swyddfa DVLA leol:

• ffurflen V55/5 wedi’i llenwi – cais am drwydded ar gyfer cerbyd modur ail-law a datganiad ar gyfer cofrestru
• treth cerbyd cywir (lle bo’n briodol)
• ffurflen V627/1 wedi’i llenwi – adroddiad archwilio cerbyd sydd wedi’i ailadeiladu (i'w gyflawni cyn yr archwiliad)
• tystysgrif IVA, SVA neu MSVA (os bydd angen)
• tystysgrif MOT (os yw'r cerbyd dros 3 oed)
• tystysgrif yswiriant
• ffi cofrestru o £55 (os oes angen)
• derbynebau swyddogol ar gyfer y cerbyd ac unrhyw gydrannau a ddefnyddiwyd wrth ei adeiladu
• dogfennau sy’n cadarnhau eich enw a’ch cyfeiriad
• tystysgrif cofrestru’r cerbyd (os defnyddir cerbyd cyflenwi)

• Cost treth cerbyd

• Ffi cofrestru cerbyd am y tro cyntaf

• Sut mae cofrestru eich cerbyd a phrofion adnabod

• Gwasanaeth archebu ffurflenni DVLA Opens new window

Eich cyfrifoldeb chi, fel ceidwad y cerbyd, yw gwneud yn siŵr bod y cerbyd yn cydymffurfio â Rheoliadau Cerbydau’r Ffordd (Gwneuthuriad a Defnydd) 1986 (fel y'u diwygiwyd) os yw'n cael ei ddefnyddio ar y ffordd.

I gael mwy o wybodaeth am y rheoliadau hyn, cysylltwch â’r Adran Drafnidiaeth.

• Cysylltiadau moduro