Gwefan llywodraeth y DU

Sut mae’r cynllun yn gweithio

Mae’r archwiliad IVA yn gwirio’ch cerbyd i sicrhau ei fod wedi’i ddylunio a’i adeiladu i fodloni safonau diogelwch ac amgylcheddol modern ar gyfer ei ddefnyddio ar ffyrdd y DU.

Mae archwilwyr o’r Asiantaeth Gwasanaethau Cerbydau a Gweithredwyr yn cynnal archwiliadau mewn safleoedd cymeradwy ym Mhrydain Fawr. Yr Asiantaeth Gyrwyr a Cherbydau sy’n cynnal archwiliadau yng Ngogledd Iwerddon.

Os bydd eich cerbyd yn pasio archwiliad IVA, bydd yr archwilydd yn rhoi Tystysgrif Cymeradwyaeth Unigol i chi. Wedyn, bydd modd i chi gofrestru’r cerbyd â’r Asiantaeth Trwyddedu Gyrwyr a Cherbydau gan ddefnyddio’r dystysgrif.

Pwy all ddefnyddio'r cynllun hwn?

Gallwch chi ddefnyddio’r cynllun os ydych chi:

• yn adeiladu, yn dylunio neu’n gwerthu ceir cit
• yn mewnforio ceir o'r tu allan i'r Undeb Ewropeaidd – yn enwedig y Dwyrain Pell a Gogledd America
• yn ailadeiladu ceir hŷn gan wneud newidiadau sylweddol
• yn arbenigo mewn newid cerbydau newydd yn gerbydau sy'n hwylus i gadeiriau olwyn
• yn cynhyrchu nifer fach o gerbydau
• yn cynhyrchu neu’n mewnforio ôl-gerbydau
• yn cynhyrchu neu’n mewnforio cerbydau teithwyr
• yn cynhyrchu neu’n mewnforio cerbydau nwyddau

Gallwch gael gwybod mwy am y cynllun hwn ac am fathau eraill o gynlluniau cymeradwyo math cerbyd ar wefan Business Link.

• businesslink.gov.uk Opens new window

Cerbydau sy’n gymwys ar gyfer y cynllun

Mae’r cynllun yn berthnasol i'r mathau canlynol o gerbydau, gan gynnwys cerbydau at ddefnydd personol:

• ceir teithwyr a cherbydau nwyddau ysgafn
• cerbydau mwy sy'n cludo teithwyr, fel bysiau a bysiau moethus
• cerbydau nwyddau o faint trwm a chanolig, fel tryciau a cherbydau nwyddau trwm
• ôl-gerbydau

Dyddiadau cychwyn y cynllun

Bydd y cynllun yn cymryd lle’r cynllun Cymeradwyaeth Cerbyd Sengl (SVA) dros yr ychydig flynyddoedd nesaf.

Bydd y cynllun yn cael ei gyflwyno ar ddyddiadau gwahanol ar gyfer gwahanol gerbydau, ond bydd dewis ar gael i’w ddefnyddio yn lle cynlluniau eraill tan y dyddiad cyflwyno.

Dyddiad dechrau’r cynllun	Math o gerbyd
29 Ebrill 2009	Ceir teithwyr
29 Hydref 2010	Cerbydau mwy sy’n cludo teithwyr
29 Hydref 2011	Cerbydau nwyddau ysgafn – bydd y rhain yn dal i gael eu harchwilio dan y cynllun Cymeradwyaeth Cerbyd Sengl (SVA) nes caiff ei ddisodli gan y cynllun IVA
29 Ebrill 2012	Cerbydau at ddibenion arbennig, megis cerbyd sydd â darpariaeth arbennig i gludo cadair olwyn
29 Hydref 2012	Cerbydau nwyddau canolig a thrwm ac ôl-gerbydau

Os ydych chi’n defnyddio'r cynllun SVA ar gyfer ceir teithwyr neu gerbydau nwyddau ysgafn ar hyn o bryd, bydd angen i chi ddechrau defnyddio'r cynllun IVA ar yr adeg briodol.

• Dod o hyd i orsaf brawf IVA

• Dod o hyd i restr o ffurflenni cais IVA Opens new window

• Y cynllun Cymeradwyaeth Cerbyd Sengl (SVA)

• Llwytho ‘Ffioedd prawf Cymeradwyaeth Cerbyd Unigol’ oddi ar y we (PDF, 249K) Opens new window

• Cymorth gyda ffeiliau PDF