Gwefan llywodraeth y DU

Cam un: gwneud cais am le

Fel arfer, byddwch yn gwneud cais yn y flwyddyn academaidd cyn y bwriadwch fynd i'r coleg. Y cynharaf y gallwch gyflwyno cais wedi'i gwblhau yw'r mis Medi cyn i chi ddechrau eich cwrs (oni bai eich bod yn gwneud cais am ohirio'ch lle tan y flwyddyn ganlynol).

Os nad ydych wedi cwblhau’ch arholiadau erbyn hyn, bydd eich cais yn cael ei seilio ar y graddau y mae’ch athrawon neu’ch darlithwyr yn rhagweld y byddwch yn eu hennill.

I gael gwybod sut i wneud cais, ac ynghylch y dyddiadau cau y bydd angen i chi gwrdd ag hwy, ewch i ‘Llenwi’ch ffurflen gais UCAS’.

• Llenwi’ch ffurflen gais UCAS

Cam dau: cyfweliadau

Ar ôl i chi wneud cais i UCAS, bydd eich cais yn cael ei drosglwyddo i'r sefydliadau a ddewiswyd gennych.

Bydd gan bob prifysgol neu goleg eu trefn ymgeisio'u hunain. Fe all rhai ofyn i chi ddod am gyfweliad ac mae'n bosib hefyd y gofynnir i chi sefyll prawf. Efallai y bydd eraill yn cynnig lle i chi ar sail y wybodaeth sydd ar eich cais.

Cam tri: gwneud cais am gymorth ariannol

Wedi i chi gyflwyno'ch cais i UCAS, gallwch wneud cais am gymorth ariannol cyn gynted ag y bydd eich ceisiadau am gyllid myfyrwyr yn agor. Does dim angen i chi aros am gynnig.

I gael gwybod faint allech chi ei gael, a sut mae gwneud cais ar-lein - gweler adran 'Cyllid myfyrwyr'.

Cam pedwar: cael cynnig

Os byddwch chi'n cyflwyno'ch ffurflen gais i UCAS erbyn y dyddiad cau perthnasol, fel arfer, byddwch yn cael cynigion gan eich prifysgolion erbyn diwedd mis Mawrth. Er hynny, gyda rhai cyrsiau poblogaidd, mae'n bosib na chlywch chi ddim tan fis Mai.

Os cewch gynnig gan sefydliad nad ydych wedi ymweld ag ef, fe allai diwrnod agored fod o fudd i chi benderfynu a ydych am astudio yno ai peidio.

• Cael cynnig gan brifysgol neu goleg

• Prosbectws a diwrnodau agored prifysgolion

Os na chewch chi gynnig

Os na chewch chi gynnig gan y prifysgolion neu'r colegau ar eich rhestr, neu os byddwch chi'n gwrthod neu'n canslo'ch dewisiadau, gallai gwasanaeth UCAS Extra roi ail gyfle i chi sicrhau lle.

Os na chewch chi gynnig drwy'r gwasanaeth Extra, fe allwch fynd drwy'r drefn Glirio, lle bydd prifysgolion a cholegau'n hysbysebu – a llenwi - llefydd gwag hwyr ar gyrsiau.

• UCAS Extra: eich ail gyfle i gael lle

• Clirio: llefydd munud olaf mewn prifysgol neu goleg

Cam pump: derbyn cynnig

Bydd y cynigion naill ai'n amodol (yn dibynnu ar gael graddau penodol ar eich cwrs cyfredol) neu'n ddiamod (os ydych eisoes wedi ennill y cymwysterau y mae'n rhaid eu cael).

Os nad ydych wedi sefyll eich arholiadau eto, gallwch wneud un dewis pendant ac un dewis ‘wrth gefn’.

• Cael cynnig gan brifysgol neu goleg

Cam chwech: cael eich canlyniadau

Os cewch chi'r graddau y mae eu hangen arnoch ar gyfer cynnig amodol, bydd eich prifysgol neu'ch coleg yn cadarnhau eich lle. Bydd UCAS yn anfon llythyr cadarnhau ffurfiol atoch.

Os cewch ganlyniadau sy’n well na’r disgwyl

Os byddwch nid yn unig yn cyrraedd holl gyflyrau’ch dewis pendant, ond yn rhagori ynddynt (er enghraifft, drwy gael graddau uwch nag sydd angen arnoch), gallwch ddefnyddio ‘Adjustment’ i edrych ar opsiynau eraill.

Mae ‘Adjustment’ yn wasanaeth newydd sy’n eich gadael chi i chwilio am gyrsiau eraill am amser byr tra bod eich lle gwreiddiol sydd wedi’i gadarnhau yn cael ei ddal.

Yr ydych yn cofrestru am ‘Adjustment’ drwy ddefnyddio’r gwasanaeth Trywydd ar wefan UCAS.

• Cael gwybod am ‘Adjustment’ ar wefan UCAS Opens new window

Os na chewch chi’r graddau y mae eu hangen arnoch

Os na chewch chi'r graddau y mae eu hangen arnoch ar gyfer cynnig amodol, mae'n bosib na fydd eich prifysgol neu'ch coleg yn gallu cadarnhau eich cynnig. Os bydd hyn yn digwydd, efallai y gwnaiff eich ail ddewis eich derbyn. Os na fydd yn eich derbyn, fe gewch gyfle arall i gael lle drwy'r drefn Glirio.

• Clirio: llefydd munud olaf mewn prifysgol neu goleg

• Ar ôl eich canlyniadau arholiad: cwestiynau poblogaidd

Pan fyddwch wedi cael eich lle

Pan fydd eich lle wedi’i drefnu, gallwch ddechrau paratoi ar gyfer bywyd myfyriwr.

• Paratoi i fynd i brifysgol neu goleg