Gwefan llywodraeth y DU

Cyn i chi fynd

Dylech gael pecyn cynefino neu becyn cyflwyno gan eich prifysgol neu’ch coleg, naill ai ymlaen llaw neu wrth gyrraedd yno.

Darllenwch hwn yn drylwyr, llenwch a dychwelwch unrhyw ffurflenni a chadwch gofnod o ble a phryd y mae angen i chi wneud pethau.

Efallai y bydd staff sy’n gyfrifol am wahanol bynciau wedi cynnwys gwybodaeth am waith darllen cefndir neu am y deunyddiau y bydd eu hangen arnoch. Efallai y gallwch gael gwybodaeth ychwanegol ynghylch sut mae paratoi ar gyfer eich cwrs drwy fynd i wefan y coleg ac edrych ar dudalennau’r adrannau.

Beth i fynd gyda chi

Mae’n debyg y bydd pecyn cynefino eich prifysgol neu’ch coleg yn cynnwys rhestr o bethau yr awgrymir i chi fynd gyda chi. Meddyliwch yn ofalus beth fydd eu hangen arnoch, beth allwch chi ei brynu ar ôl cyrraedd a faint y mae angen i chi ei bacio mewn gwirionedd.

Os ydych chi’n bwriadu mynd ag offer i edrych ar raglenni teledu neu eu recordio – fel teledu, cyfrifiadur neu ddyfais arall – bydd angen i chi gael trwydded deledu ddilys.

• Trwyddedau teledu: rheolau ar gyfer myfyrwyr

Ble i fynd

Os ydych chi’n mynd i fyw mewn neuadd breswyl, bydd eich prifysgol yn rhoi dyddiad i chi a syniad o ba bryd y dylech gyrraedd eich llety newydd. Mae’n debyg y byddwch yn cyrraedd yr un pryd â’r bobl a fydd yn gymdogion i chi am y flwyddyn nesaf – bydd yn gyfle gwych i wneud ffrindiau newydd.

Os ydych yn mynd i fyw mewn llety preifat, bydd angen i chi drefnu diwrnod ar gyfer symud i mewn gyda'ch landlord. Efallai y bydd y bobl a fydd yn cyd-fyw gyda chi yn cyrraedd yr un pryd, neu efallai y byddant yno’n barod.

Os gwnaethoch ymweld â’r brifysgol neu’r coleg ar ddiwrnod agored, efallai y byddwch yn gwybod ble mae rhai o’r prif adeiladau – os nad ydych yn gwybod lle maen nhw, mae’n werth dechrau dod i adnabod eich ardal newydd mor fuan ag y gallwch. Mae hefyd yn syniad da holi pryd y mae angen i chi gofrestru ar gyfer eich cwrs, ac yn lle y bydd angen i chi wneud hynny.

Os bydd angen i chi deithio i gyrraedd y brifysgol neu’r coleg, gallwch gynllunio’ch taith ar-lein. Gallech hyd yn oed drefnu i fynd yno cyn y diwrnod y byddwch yn symud er mwyn gweld ble yn union mae pethau a faint o amser y bydd yn ei gymryd i gyrraedd yno.

• Tai myfyrwyr

Setlo a chael cefnogaeth

Mae’r ychydig ddyddiau cyntaf mewn prifysgol neu goleg yn gyfnod prysur, wrth i chi setlo yn eich llety newydd (os ydych wedi symud oddi cartref i astudio), dod i adnabod yr ardal, cofrestru ar eich cwrs, a pharatoi yn gyffredinol.

Bydd angen i chi ymuno â llyfrgell y brifysgol, ac efallai y byddwch hefyd am ystyried ymuno ag undeb y myfyrwyr a banc lleol. Mae hefyd yn syniad da cofrestru â meddyg a deintydd lleol.

Erbyn diwedd y tymor neu’r semester cyntaf byddwch yn gwbl gyfarwydd â'ch man astudio, ond peidiwch â synnu os cewch broblemau wrth gynefino yn ystod yr ychydig wythnosau cyntaf. Caniatewch ddigon o amser i chi'ch hun, a buddsoddwch mewn map da.

Mae’n berffaith arferol i chi deimlo’n hiraethus os ydych wedi symud oddi cartref i astudio. Gall cynghorwyr lles myfyrwyr eich helpu os bydd arnoch angen rhywun i siarad â nhw.

• Cymorth, diogelwch a gwarchodaeth yn ystod eich cwrs

• Dod o hyd i wasanaethau iechyd yn eich ardal (adran ei wneud ar y we)

• Ffair y Glas ac ymgartrefu: cyngor gan y NUS Opens new window

Rheoli eich arian

Os byddwch yn cael problemau wrth reoli’ch arian, gall swyddfa gefnogi eich prifysgol neu’ch coleg roi cyngor i chi. Ceir hefyd lawer o lyfrau a gwefannau sy’n delio â materion ariannol. Gweler, er enghraifft, ‘Faint fydd mynd i’r brifysgol yn ei gostio?’ i gael cyngor am gyllidebu.

Os nad ydych wedi gwneud hynny’n barod, cofiwch y gallwch wneud cais am gyllid myfyrwyr hyd at naw mis ar ôl dechrau’r flwyddyn academaidd.