Gwefan llywodraeth y DU

Beth yw ymddiriedolaeth gymysg?

Mae ymddiriedolaeth gymysg yn golygu ymddiriedolaeth lle mae’r incwm yn drethadwy ar fwy nag un sail. Mae’n bosib mai’r rheswm am hyn yw y ceir gwahanol rannau pendant i’r gronfa ymddiriedolaeth o’r dechrau, er mwyn i’r incwm gael ei gadw mewn ymddiriedolaethau gwahanol bob amser. Fodd bynnag, efallai eu bod nhw hefyd o ganlyniad i newidiadau yn amgylchiadau’r buddiolwyr, fel y gwelir yn yr enghraifft ganlynol.

Enghraifft

Mae dau blentyn yn cael budd o ymddiriedolaeth cronni. Yn ôl telerau’r ddogfen ymddiriedolaeth, mae gan y buddiolwyr hawl i incwm yr ymddiriedolaeth pan fyddant yn troi’n 18 oed. Mae Zoe yn troi’n 18 oed, ond dim ond 14 oed yw Sarah. Mae'r rhan o'r ymddiriedolaeth sydd o fudd i Zoe yn newid i fod yn ymddiriedolaeth buddiant mewn meddiant, ac mae'r rhan sydd o fudd i Sarah yn dal yn ymddiriedolaeth cronni nes bydd hi’n 18 oed. Yn syml, pan fydd Zoe yn troi'n 18 oed, bydd yr ymddiriedolaeth yn newid i fod yn ymddiriedolaeth gymysg.

Ymddiriedolaethau cymysg a Threth Incwm

Mewn ymddiriedolaethau cymysg, bydd yr incwm ar gyfer pob rhan o’r ymddiriedolaeth yn cael ei drethu dan y rheolau sy’n berthnasol i’r math hwnnw o ymddiriedolaeth. Er enghraifft, bydd yr elfen buddiant mewn meddiant mewn ymddiriedolaeth yn cael ei threthu felly, a bydd yr elfen ddisgresiwn yn cael ei threthu fel ymddiriedolaeth disgresiwn. Mae hyn yn berthnasol i gyfrifoldebau treth yr ymddiriedolwyr a’r buddiolwyr.

• Mathau o ymddiriedolaethau a'u goblygiadau treth

Ymddiriedolaethau cymysg a Threth Enillion Cyfalaf

Treth ar y cynnydd yng ngwerth asedau megis cyfranddaliadau, tir neu adeiladau yw Treth Enillion Cyfalaf. Mae’n bosib y bydd rhaid i ymddiriedolaeth dalu Treth Enillion Cyfalaf os caiff asedau eu gwerthu, eu rhoi i ffwrdd neu eu cyfnewid (os ceir gwared arnynt) a’u bod wedi cynyddu mewn gwerth ers iddynt gael eu rhoi mewn ymddiriedolaeth.

Dim ond os bydd gwerth yr asedau wedi cynyddu dros lwfans penodol, a elwir yn ‘swm eithriedig blynyddol’, y bydd rhaid i’r ymddiriedolaeth dalu’r dreth. Yr ymddiriedolwyr sy’n gyfrifol am unrhyw Dreth Enillion Cyfalaf sy’n ddyledus ar enillion.

Ni chaiff buddiolwyr eu trethu ar enillion sydd wedi dod i ran yr ymddiriedolaeth, ac ni fyddant yn cael credyd ar gyfer unrhyw dreth a delir gan yr ymddiriedolwyr.

• Ymddiriedolaethau a Threth Enillion Cyfalaf

Ymddiriedolaethau cymysg a Threth Etifeddu

Ni chaiff gwahanol rannau ymddiriedolaeth o fewn ymddiriedolaeth gymysg eu trin ar wahân at ddibenion Treth Etifeddu. Yn yr un modd ag ymddiriedolaethau disgresiwn, ymddiriedolaethau buddiant mewn meddiant ac ymddiriedolaethau cronni, mae’n bosib y bydd rhaid talu Treth Etifeddu:

• os caiff asedau eu rhoi mewn ymddiriedolaeth gymysg
• os bydd deg mlynedd yn mynd heibio ers sefydlu ymddiriedolaeth gymysg, a phob deg mlynedd ar ôl hynny
• os bydd asedau yn cael eu cymryd o ymddiriedolaeth gymysg neu os bydd yr ymddiriedolaeth yn dod i ben

Weithiau, bydd Treth Etifeddu yn defnyddio terminoleg wahanol ar gyfer ymddiriedolaethau. Mae’n bosib i ymddiriedolaethau cymysg ddod o dan yr hyn a elwir yn ymddiriedolaethau ‘eiddo perthnasol’.

• Ymddiriedolaethau a Threth Etifeddu

Cysylltiadau defnyddiol

• Cysylltu ag Ymddiriedolaethau ac Ystadau Cyllid a Thollau EM