Gwefan llywodraeth y DU

Beth i’w gynnwys

Bydd angen i chi rhoi swm unrhyw fudd-daliadau rydych chi wedi eu cael gan y wladwriaeth yn y flwyddyn dreth ddiwethaf sy’n drethadwy ar eich ffurflen hawlio. Mae blwyddyn dreth yn para o 6 Ebrill un flwyddyn i 5 Ebrill y flwyddyn ganlynol.

Mae angen i rai mathau o fudd-dal sy’n drethadwy gael eu rhoi yn y blwch ‘budd-daliadau nawdd cymdeithasol sy’n drethadwy’. Mae angen i eraill gael eu rhoi yn y blwch ‘incwm arall’.

Os cafodd unrhyw dreth eu didynnu o’ch budd-dal, dylech gynnwys y swm a oedd yn ddyledus i chi cyn treth.

Mae’r adrannau isod yn dweud wrthych beth i’w cynnwys a ble.

Beth i’w gynnwys yn ‘budd-daliadau nawdd cymdeithasol sy’n drethadwy’

• Lwfans Profedigaeth
• Lwfans Gofalwyr (Lwfans Gofal Analluedd oedd yr hen enw ar hwn - gan gynnwys unrhyw gynnydd Plant Dibynnol)
• Budd dal Analluogrwydd a delir ar ôl 28 wythnos gyntaf yr analluogrwydd, ynghyd ag unrhyw gynnydd Plant Dibynnol – ond peidiwch â’i gynnwys os wnaethoch ei hawlio cyn 1995 ac wedi’i dderbyn ers hynny
• Cymhorthdal Incwm sy’n drethadwy - dim ond os oeddech chi mewn cwpl mae hwn yn drethadwy a bod y sawl a oedd yn cael y Cymhorthdal Incwm ar streic
• Lwfans Cyflogaeth a Chymorth yn seiliedig ar gyfraniadau - peidiwch â'i gynnwys os yw'r lwfans ar sail incwm
• Lwfans Ceisio Gwaith yn seiliedig ar gyfraniadau - peidiwch â'i gynnwys os yw'r lwfans ar sail incwm

Beth i’w gynnwys yn ‘incwm arall’

Os ydych wedi hawlio unrhyw un o’r budd-daliadau sydd wedi’u rhestri isod, dylech gynnwys y cyfanswm yn y blwch ‘incwm arall’ – ond cofiwch gynnwys incwm arall hefyd:

• Pensiynau'r Wladwriaeth - gan gynnwys y Pensiwn Ymddeol
• Budd-dal Marwolaeth Ddiwydiannol
• Lwfans Mam Weddw
• Lwfans Rhiant Gweddw
• Pensiwn Gwraig Weddw

Os oedd cyfanswm yr incwm arall (yn cynnwys unrhyw un o’r budd-daliadau hyn) yn £300 neu’n llai, peidiwch â’i gynnwys ar eich ffurflen hawlio. Ond mae eithriadau i’r rheol hon – dilynwch y ddolen isod i gael gwybod sut i gyfrifo eich incwm arall.

• Cael gwybod sut mae cyfrifo eich incwm arall

Beth i beidio â'i gynnwys ar eich ffurflen hawlio

Peidiwch â chynnwys ar eich hawliad unrhyw fudd-daliadau a gewch nad ydynt yn drethadwy megis:

• Budd-dal Plant
• Lwfans Gweini
• Lwfans Byw i’r Anabl
• Budd-dal Tai
• Budd-dal Treth Cyngor

I gael help i gyfrifo pa fudd-daliadau i'w cynnwys, defnyddiwch y ddalen waith yn y nodiadau a ddaeth gyda'ch ffurflen hawlio credydau treth neu'r pecyn adnewyddu. Neu gallech ffonio’r Llinell Gymorth Credyd Treth.

• Manylion cyswllt y Llinell Gymorth Credyd Treth

• Lawrlwytho 'Getting your tax credits claim form right' (PDF, 4MB) Opens new window

• Cymorth gyda ffeiliau PDF

Effaith credydau treth ar Fudd-dal Tai a Budd-dal Treth Cyngor

Os ydych chi'n cael Budd-dal Tai neu Fudd-dal Treth Cyngor, bydd unrhyw gredydau treth a gewch yn cael eu hystyried fel incwm. Mae hyn yn golygu y bydd y swm a gewch yn cael ei leihau i ystyried yr incwm ychwanegol hwn - ond yn gyffredinol byddwch yn dal ar eich ennill.

Mae'n bwysig iawn dweud wrth eich awdurdod lleol faint rydych chi'n ei gael mewn credydau treth. Fel arall, efallai byddwch chi'n cael gormod o Fudd-dal Tai neu Fudd-dal Treth Cyngor ac wedyn yn gorfod ei dalu'n ôl.

• Manylion cyswllt eich cyngor lleol

Os ydych yn cael budd-daliadau nad ydynt yn dod o'r DU

Efallai eich bod yn cael budd-dal nawdd cymdeithasol o wlad arall, er enghraifft:

• Budd-dal Diweithdra
• Lwfans Plant

Yn ôl y math o fudd-dal rydych chi'n ei gael, bydd arnoch angen gwneud un o'r canlynol ar eich ffurflen hawlio.

Os yw’r budd-dal nad yw'n dod o'r DU rydych chi'n ei gael yn cael ei gyfrif fel 'incwm' bydd arnoch angen ei roi ar eich ffurflen hawlio dan 'incwm arall'. Mae enghreifftiau o fudd-daliadau sy'n cyfrif fel incwm yn cynnwys budd-daliadau sy'n cael eu talu oherwydd bod rhywun agos atoch chi wedi marw neu rydych chi'n ddi-waith.

Os yw’r budd-dal rydych chi’n ei gael yn ‘fudd-dal teulu’ er enghraifft Lwfans Plant neu Ategiad Incwm Teulu, does dim arnoch angen ei roi ar eich ffurflen hawlio. Dylech anfon nodyn ar wahân gyda’ch hawliad yn lle hynny.

• Cael gwybod mwy am fudd-daliadau nad ydynt yn dod o'r DU a chredydau treth

Mwy o ddolenni defnyddiol

• Gwybodaeth am gredydau treth os ydych yn rhoi'r gorau i gael budd-daliadau

• Budd-daliadau anabledd - sut y byddant yn effeithio ar eich taliadau credydau treth?

Cysylltiadau defnyddiol

• Llinell Gymorth Credyd Treth – manylion cyswllt