Gwefan llywodraeth y DU

Rôl y Swyddfa Dramor

Mae'r Swyddfa Dramor a Chymanwlad yn darparu gwybodaeth i berthynas agosaf am ddigwyddiadau ac argyfyngau dramor, er os bydd y digwyddiad yn cynnwys cwmni hedfan neu gorff swyddogol arall, byddai disgwyl iddyn nhw gymryd rhan yn y broses o ddarparu gwybodaeth. Os credir yr effeithwyd ar lawer o ddinasyddion Prydain, efallai y bydd y Swyddfa Dramor a Chymanwlad yn darparu rhif ffôn mewn argyfwng ar gyfer y digwyddiad yn y DU. Byddai'r rhif yn ymddangos ar fwletinau newyddion ar y teledu a'r radio ac yn y wasg, a byddai ar gael ar wefan y Swyddfa Dramor a Chymanwlad, gweler y ddolen isod.

Mae'n bosibl y bydd y Swyddfa Dramor a Chymanwlad hefyd yn agor rhan 'LLEOLI' arbennig ar ei gwefan er mwyn i chi allu cofrestru manylion unrhyw aelod o'r teulu yr ydych yn credu yr effeithwyd arno gan ddigwyddiad dramor ar-lein. Bydd staff y Swyddfa Dramor a Chymanwlad yn defnyddio'r manylion hyn i geisio dod o hyd i'r bobl yr effeithwyd arnynt a rhoi cymorth iddynt, ac i roi gwybod i chi a ydynt yn ddiogel.

Er y byddwch efallai'n teimlo'n gryf eich bod am fynd i'r wlad dan sylw i fod gyda'ch ffrind neu'ch perthynas, efallai na fydd yn ddiogel i chi wneud hynny. Mae gwefan y Swyddfa Dramor a Chymanwlad yn rhoi cyngor ar p'un a yw'n ddiogel teithio i fannau penodol ai peidio

• Cyngor gan y Swyddfa Dramor Opens new window

Cymorth i Ddinasyddion Prydain dramor

Mae'r Swyddfa Dramor a Chymanwlad yn cynnig cymorth i ddinasyddion Prydain yr effeithwyd arnynt gan argyfyngau dramor drwy ei staff is-gennad dramor a'i thîm rheoli argyfwng yn Llundain. Mae'r Swyddfa Dramor a Chymanwlad yn gweithio'n agos gyda'r Heddlu yn y DU, a'r Groes Goch Brydeinig, wrth gyflawni ei rôl.

Pan fydd argyfwng sy'n effeithio ar ddinasyddion Prydain yn digwydd dramor, megis ymosodiad terfysgol neu drychineb naturiol, bydd Grŵp Argyfwng Is-gennad y Swyddfa Dramor a Chymanwlad yn Llundain yn darparu cymorth cyflym i'r dinasyddion Prydeinig rheini yr effeithwyd arnynt. Efallai y byddant yn anfon Tîm Cyflwyno Cyflym (RDT) i helpu neu i agor yr Uned Ymateb mewn Argyfwng i ddarparu cyfleuster delio â galwadau.

Mae Timau Cyflwyno Cyflym yn cynnwys staff y Swyddfa Dramor a Chymanwlad sydd wedi'u dewis a'u hyfforddi'n arbennig, mae'r rhan fwyaf ohonynt yn swyddogion is-gennad. Bydd timau hefyd yn cynnwys swyddog y wasg, swyddog technegol a chynrychiolwyr o'r Groes Goch Brydeinig i ddarparu cefnogaeth ymarferol ac emosiynol i deuluoedd a dioddefwyr. Efallai y bydd aseswyr meddygol SOS hefyd yn ymchwilio i weld a yw'r cyfleusterau meddygol yn yr ardal yr effeithiwyd arni yn gallu ymdopi â maint y digwyddiad. Gallant hefyd roi'r wybodaeth hon i gwmnïau yswiriant teithio sy'n darparu yswiriant i'r bobl yr effeithiwyd arnynt.

Gellir cael mwy o wybodaeth am yr hyn y gall y Swyddfa Dramor a Chymanwlad ei wneud yn 'Support for British Nationals abroad, A Guide'.

• Taflen Support for British Nationals Abroad Opens new window

Marwolaethau dramor

Pan fydd damwain yn digwydd dramor a nifer o bobl wedi marw, gall timau heddlu Adnabod Dioddefwyr Trychineb arbenigol ffurfio rhan o Dîm Cyflwyno Cyflym Swyddfa Dramor a Chymanwlad i helpu gyda'r broses adnabod.

Mae timau o'r fath yn sicrhau y cyflawnir y broses o adnabod cyrff at y safonau priodol ar gyfer y Crwner Prydeinig, ond ni allant weithredu heb awdurdod llywodraeth y wlad lle mae'r ddamwain wedi digwydd. Bydd Swyddogion Cyswllt Teulu yr Heddlu hefyd mewn cysylltiad yn y DU i sicrhau bod teuluoedd a ffrindiau'n cael gwybod am y gweithdrefnau ac i helpu i gasglu tystiolaeth ar gyfer adnabod.

Gallwch gael rhagor o wybodaeth am pan fydd rhywun yn marw dramor drwy ddefnyddio'r ddolen isod, er bod y wybodaeth yn gysylltiedig ag achosion o farwolaethau unigol dramor yn ogystal â damweiniau mawr.

• Pan fydd rhywun yn marw dramor

Cefnogaeth i ffrindiau a theuluoedd yn ôl yn y DU

Gellir cael gafael ar wasanaethau cwnsela drwy eich meddyg teulu lleol.

Gellir cael cyngor ar iechyd gan NHS Direct drwy'r llinell gymorth 24 awr 0845 4647 neu ar y wefan. Mae'n debygol y byddant yn ymwybodol o ddigwyddiadau o bwys.

Mae gan y Groes Goch Brydeinig wirfoddolwyr hyfforddedig ar gael i gynnig cefnogaeth a chysur ymarferol i bobl sydd wedi'u heffeithio gan drychinebau. Ei switsfwrdd yn y DU yw 0870 170 7000.

Elusen yw Disaster Action. Fe'i sefydlwyd gan bobl sydd wedi goroesi neu sydd wedi colli rhywun mewn trychinebau tramor. Mae'n darparu gwasanaeth eiriolaeth a chynghori annibynnol. Mae ei gwefan yn cynnig cefnogaeth, gwybodaeth a chyngor gan brofiadau personol gan bobl sydd wedi bod mewn profedigaeth a phobl sydd wedi goroesi, gan gynnwys erthygl am deithio dramor i chwilio am berthnasau ar ôl digwyddiad argyfwng.

Nid oes gan Disaster Action linell gymorth 24 awr, ond mae ganddo wasanaeth peiriant ateb ar 01483 799 066.

• Disaster Action Opens new window

Cefnogaeth Ariannol

Pan fydd digwyddiad terfysgol wedi digwydd dramor, efallai y bydd y Swyddfa Dramor a Chymanwlad yn rhoi Mesurau Cymorth Arbennig ar waith. Yn yr amgylchiadau hyn, mae'r Swyddfa Dramor a Chymanwlad yn talu am gostau ariannol uniongyrchol, fel costau dychweliad a chostau meddygol uniongyrchol, ar yr amod nad oes ffynonellau eraill ar gael (fel yswiriant, cynllun cyflogwr, y cwmni hedfan neu'r trefnwyr teithiau, llywodraeth y wlad lle digwyddodd y ddamwain). Dim ond fel y dewis olaf y byddai'r mesurau hyn ar gael, ac ni fyddent ar gael i bobl sydd wedi teithio yn erbyn cyngor teithio'r Swyddfa Dramor a Chymanwlad neu heb yswiriant teithio.

Bydd Cronfa Cymorth y Groes Goch Brydeinig i Ddioddefwyr Terfysgaeth Dramor y DU yn darparu cymorth ariannol i bobl sydd wedi'u hanafu'n ddifrifol neu mewn profedigaeth o ganlyniad i ddigwyddiadau o'r fath. Nid yw'r grantiau'n iawndal ar gyfer yr hyn y mae'r dioddefwyr wedi'i ddioddef.

Os bydd angen cefnogaeth ariannol ychwanegol arnoch gall Gwasanaethau Cymdeithasol eich Awdurdod Lleol ddarparu cyngor ar y budd-daliadau y gallech eu cael. Gallwch gael manylion cyswllt ar gyfer eich Awdurdod Lleol drwy ddilyn y ddolen isod.

Efallai y bydd y ddolen at 'Canllaw syml i fudd-daliadau' yn ddefnyddiol i chi hefyd.

• Cronfa Gymorth Y Groes Goch Brydeinig Opens new window

• Dod o hyd i'ch awdurdod lleol

• Canllaw syml i fudd-daliadau (adran arian, treth a budd-daliadau)