Gwefan llywodraeth y DU

Pam fod sgiliau mor werthfawr?

Mae cael y sgiliau cywir yn bwysicach nawr nag erioed o'r blaen. Y rheswm am hyn yw mewn llai na deng mlynedd, ychydig iawn o swyddi na fydd angen sgiliau o gwbl ar eu cyfer fydd ar gael.

Yn ogystal â rhoi hwb i'ch rhagolygon gyrfa, gall gwella eich sgiliau hefyd helpu os ydych yn bwriadu astudio ymhellach.

Mae sgiliau hefyd yn ddefnyddiol ym mhob math o sefyllfaoedd mewn bywyd, a gallant roi mwy o hyder i chi. Gallwch hefyd ennill cymwysterau newydd ar yr un pryd.

Cael cyngor diduedd, am ddim

Os nad ydych yn siŵr ble i ddechrau, gellir cael digon o gyngor diduedd, am ddim gan wasanaethau fel Cyngor Gyrfa a nextstep.

Byddant yn gallu rhoi gwybod i chi am eich dewisiadau ac am unrhyw arian am ddim y gallech ei gael i helpu i dalu am eich dysgu.

Gallwch gwrdd â chynghorydd hyfforddedig wyneb-yn-wyneb, cael sgwrs dros y ffôn neu gysylltu â chynghorydd dros e-bost.

• Cael cyngor personol ar yrfaoedd a dysgu

Rhoi hwb i’ch sgiliau sylfaenol

Os oes angen help arnoch i ddarllen, ysgrifennu neu i wneud mathemateg, mae digon o gymorth ar gael.

Mae llawer o ffyrdd hefyd o loywi eich sgiliau cyfrifiadurol, p'un ai a ydych yn ddechreuwr llwyr, neu am wella eich sgiliau presennol.

• Gloywi'ch sgiliau darllen, ysgrifennu a rhifedd

• Gloywi'ch sgiliau cyfrifiadurol a'ch sgiliau Technoleg Gwybodaeth

Dysgu mewn ffordd sy'n addas i chi

Os byddwch yn penderfynu gwella eich sgiliau drwy fynd ar gwrs, mae bron i filiwn o gyrsiau i ddewis ohonynt yn y DU. Felly, rydych yn siŵr o ddod o hyd i un sydd o ddiddordeb i chi ac sy'n cyd-fynd â'ch ymrwymiadau gartref ac yn y gwaith.

Gallwch ddewis lle a phryd y gallwch ddysgu - nid oes yn rhaid i chi eistedd mewn ystafell ddosbarth. Er enghraifft, efallai y gallwch gael hyfforddiant yn y gwaith. Gallwch ddysgu amser llawn neu ran-amser, am ychydig o oriau neu am nifer o flynyddoedd - beth bynnag sydd fwyaf addas i chi.

• Dewis y cwrs iawn

• Cael hyfforddiant yn y gwaith

Cael eich talu i wella eich sgiliau

Os byddwch yn penderfynu eich bod am wella eich siliau, ond eich bod yn poeni faint fydd hyn yn ei gostio, nid oes angen i chi boeni. Mae llawer o gymorth ariannol ar gael. Bydd yr union swm y gallwch ei gael yn dibynnu ar eich amgylchiadau personol.

Gallech gael cymorth ariannol drwy nifer o wahanol raglenni fel y Grant Dysgu i Oedolion a'r Benthyciadau Datblygu Gyrfa. Gallech gael cymorth gyda chostau gofal plant hefyd.

• Cymorth gyda chostau dysgu: cyflwyniad

Ydych chi’n ystyried addysg uwch?

Gall ennill cymhwyster addysg uwch wella eich rhagolygon gyrfa a'ch cyfleoedd mewn bywyd. Bydd hefyd yn rhoi'r cyfle i chi brofi pethau newydd a chwrdd â phobl newydd.

Nid dim ond cael gradd sy'n bwysig. Ceir hefyd lawer o gyrsiau gwahanol megis cymwysterau HNC a HND, neu Raddau Sylfaen sy'n cyfuno astudio gyda dysgu yn y gweithle. Gallwch ddysgu mewn coleg neu brifysgol, amser llawn neu ran-amser.

Mae amrywiaeth hefyd o grantiau, benthyciadau a bwrsarïau i'ch helpu i dalu am y costau. Os byddwch yn cael help drwy grant neu fwrsari, nid oes yn rhaid i chi eu talu'n ôl.

• Beth all addysg uwch ei wneud i chi?

• Cymwysterau addysg uwch