Gwefan llywodraeth y DU

Cyfleu eich anghenion

Mae'n bwysig cofio bod gwledydd yn wahanol ac na fydd pob gwasanaeth a chyfleuster ar gael neu'n hwylus i chi. Os oes angen gwasanaeth neu gyfleuster penodol arnoch, dylech holi a ydynt ar gael cyn archebu.

Yn aml, nid yw nam yn amlwg i bobl eraill, felly gwnewch yn siŵr eich bod yn esbonio'ch gofynion yn glir. Peidiwch â thybio bod staff mewn swyddfeydd trefnu teithiau, swyddfeydd teithio neu feysydd awyr yn gwybod neu'n deall eich anghenion yn awtomatig.

Mae hyn yn arbennig o bwysig wrth archebu dros y ffôn, drwy'r post neu dros y rhyngrwyd.

Dod o hyd i wybodaeth

Yn y DU, rhaid i wybodaeth a ddarperir gan swyddfeydd teithio, trefnwyr teithiau, meysydd awyr a chwmnïau hedfan fod yn glir ac yn syml.

Dylent hefyd gymryd camau rhesymol i sicrhau bod eu gwasanaethau gwybodaeth ar gael yn hwylus i bobl anabl, er enghraifft gwybodaeth ar gael mewn fformatau hwylus, megis Braille, print bras neu dâp sain.

Y Ddeddf Gwahaniaethu ar Sail Anabledd

Nod Deddf Gwahaniaethu ar sail Anabledd 1995 yw rhoi diwedd ar y gwahaniaethu y mae llawer o bobl anabl yn ei wynebu. Mae rhan 3 y Ddeddf yn ymwneud â 'darparwyr gwasanaethau' sy'n cynnwys trefnwyr teithiau, cwmnïau gwyliau a busnesau sy'n darparu llety a gwasanaethau hamdden eraill.

Mae dyletswydd ar ddarparwyr gwasanaethau i sicrhau nad ydych, fel cwsmer anabl, yn cael eich trin yn llai ffafriol na chwsmeriaid eraill mewn modd anghyfiawn am reswm sy'n gysylltiedig â'ch anabledd.

Gellir dod o hyd i wybodaeth fanylach am hawliau mynediad, gan gynnwys ‘addasiadau rhesymol’, mewn ‘Mynediad i wasanaethau bob dydd’.

• Mynediad i wasanaethau bob dydd

• Twristiaeth a'r Ddeddf Gwahaniaethu ar sail Anabledd

Y Ddeddf Gwahaniaethu ar Sail Anabledd a theithio'n hwylus mewn awyren

Nid yw teithio mewn awyren yn dod o dan y Ddeddf Gwahaniaethu ar sail Anabledd. Ond mae'r Ddeddf yn berthnasol i'r defnydd o wasanaethau yn y DU, megis systemau archebu a gwasanaethau a chyfleusterau mewn maes awyr. Er enghraifft, mae siopau a chyfleusterau cofrestru yn y maes awyr yn dod o dan y Ddeddf ond nid y gwasanaethau a'r adloniant ar yr awyren.

Ers Gorffennaf 2007, mae hi'n anghyfreithlon i gwmni awyrennau, swyddfa drefnu teithiau neu gwmni gwyliau wrthod i rywun archebu lle ar sail anabledd, neu wrthod gadael i berson anabl fynd ar awyren pan fo ganddynt docyn dilys a lle wedi'i gadw. Mae hyn yn berthnasol i unrhyw awyren sy'n gadael maes awyr yn yr Undeb Ewropeaidd, yn ogystal ag i unrhyw gwmnïau awyrennau Ewropeaidd sy'n glanio yn yr UE.

Mae'r gyfraith hefyd yn cynnwys pobl â symudedd cyfyngedig, gan gynnwys y rheini sydd wedi colli symudedd dros dro.

Mewn amgylchiadau achlysurol dros ben efallai na fydd yr hawliau hyn yn berthnasol - er enghraifft, pan fydd rhesymau diogelwch neu resymau technegol dilys pam na all person anabl fynd ar yr awyren. Mewn achosion o'r fath, rhaid i chi gael gwybod y rhesymau, a rhaid iddynt gynnig dewis rhesymol arall i chi.

I rwystro pethau rhag mynd o chwith, os bydd arnoch angen cymorth yn y maes awyr neu ar yr awyren, mae'n bwysig eich bod yn gwneud hyn yn glir pan fyddwch yn archebu lle (neu heb fod yn hwyrach na 48 awr cyn gadael).

• Gwasanaethau meysydd awyr a chwmnïau hedfan ar gyfer teithwyr anabl

Cyngor am deithio dramor

Mae adran deithio gwefan y Swyddfa Dramor a Chymanwlad yn cynnwys cyngor am deithio i wledydd penodol ar gyfer unrhyw un sy'n cynllunio taith dramor.

• Gwefan y Swyddfa Dramor a'r Gymanwlad Opens new window