Gwefan llywodraeth y DU

Manylion biometrig mewn pasbortau Prydeinig

Mae'r sglodyn sydd y tu mewn i'r pasbort yn cynnwys gwybodaeth am wyneb y deiliad - megis y pellter rhwng ei lygaid, ei drwyn, ei geg a'i glustiau. Caiff y manylion hyn eu cymryd o'r llun pasbort yr ydych yn ei ddarparu. Yna gellir eu defnyddio i adnabod deiliad y pasbort. Mae'r sglodyn hefyd yn cynnwys yr wybodaeth a gaiff ei hargraffu ar dudalen manylion personol eich pasbort.

Sut y defnyddir y pasbort biometrig

Mae gan y sglodyn sy'n cynnwys y manylion biometrig a'r manylion personol antena sy'n golygu y gellir ei ddarllen yn electronig. Gall swyddogion rheoli ffiniau ddefnyddio profion biometrig, yn enwedig wrth ‘gatiau eBasbort’ (gatiau rheoli pasbort awtomataidd). Gall y Gwasanaeth Hunaniaeth a Phasbortau hefyd eu defnyddio er mwyn gwirio'r llun ar geisiadau adnewyddu pasbortau yn erbyn y lluniau a gofnodwyd.

• Cael gwybod mwy am gatiau eBasbort ym meysydd awyr y DU

Sut y caiff y data ei ddiogelu a sut y cedwir eich manylion yn ddiogel

Caiff y data ar y sglodyn ei ddiogelu yn y tair ffordd ganlynol:

• gyda 'llofnod digidol', sy'n dangos bod y data yn ddilys ac ym mha wlad y cyhoeddwyd y pasbort
• Rheoli Mynediad Sylfaenol, 'protocol sglodyn' sy'n rhwystro'r data rhag cael ei ddarllen heb yn wybod i ddeiliad y pasbort
• System Allwedd Gyhoeddus (PKI), techneg ddigidol sy'n cadarnhau mai'r Gwasanaeth Hunaniaeth a Phasbortau a ysgrifennodd y data ac nad yw wedi cael ei newid

Dim ond ychydig centimetrau oddi wrth ddarllenydd sglodion y gellir darllen y sglodion - felly ni ellir eu darllen yn ddamweiniol.

Cael gwybod beth gaiff ei gadw ar y sglodyn yn eich pasbort

Mae gan bob un o Swyddfeydd Rhanbarthol y Gwasanaeth Hunaniaeth a Phasbortau Ddarllenydd Pasbort Biometrig. Gallwch ddefnyddio hwn i weld yr wybodaeth bersonol a gaiff ei chadw ar y sglodyn yn eich pasbort. Bydd yr wybodaeth y byddwch yn ei gweld yr un fath â thudalen manylion personol y pasbort.

Mae hwn yn gyfleuster hunanwasanaeth am ddim yn ardal gyhoeddus bob Swyddfa Ranbarthol y Gwasanaeth Hunaniaeth a Phasbortau.

• Dod o hyd i’ch Swyddfa Pasbort Rhanbarthol agosaf Opens new window

• Dod o hyd i’ch Swyddfa Pasbort Rhanbarthol agosaf (Gogledd Iwerddon) Opens new window

Defnyddio eich pasbort presennol

Nid oes angen i chi newid eich pasbort presennol am un biometrig - gallwch ddefnyddio eich pasbort presennol nes bydd yn dod i ben. Mae'r hen basbortau nad ydynt yn rhai biometrig yn dal yn ddilys i'w defnyddio.

Os ydych am adnewyddu eich pasbort gallwch wneud hynny unrhyw adeg. Os oes unrhyw amser ar ôl ar eich hen basbort, bydd y Gwasanaeth Hunaniaeth a Phasbortau yn ei ychwanegu at y pasbort newydd. Ni ellir ychwanegu mwy na naw mis.

Gallwch gael mwy o wybodaeth ynghylch adnewyddu eich pasbort yn yr adrannau canlynol:

• 'Pwy gaiff wneud cais i adnewyddu pasbort oedolyn a phryd'
• 'Pwy gaiff wneud cais am basbort plentyn cyntaf a phryd'

Y tro nesaf y byddwch yn adnewyddu eich pasbort, rhoddir un biometrig i chi.

• Pwy all wneud cais i adnewyddu pasbort oedolyn a phryd

• Pwy gaiff wneud cais am basbort plentyn cyntaf a phryd

Teithio i UDA gyda phasbort nad yw'n un biometrig

Cewch ddefnyddio eich pasbort Prydeinig nad yw'n un biometrig i deithio i UDA.

Os yw modd i beiriant ddarllen eich pasbort Prydeinig, gallwch deithio i UDA heb fisa ar gyfer rhai mathau o deithiau. Mae hwn dan Raglen Ildio Fisa UDA (US VWP).

Os na all peiriant ddarllen eich pasbort, bydd angen i chi wneud cais am fisa os byddwch yn ymweld ag UDA.

Mae ffordd hawdd o weld a all peiriant ddarllen eich pasbort. Os gall, ar waelod y dudalen manylion personol bydd:

• dwy linell o nodau (rhifau a llythrennau)
• ceibrau (sy'n edrych fel hyn '>' neu fel hyn '<')

Nodwch fod gofynion eraill yn berthnasol i'r US VWP. Dylech ddarllen am y rhain ac, os ydych yn gymwys, dylech wneud cais i gael eich awdurdodi i deithio cyn i chi drefnu eich taith. I gael rhagor o wybodaeth ewch ar wefannau Adran Diogelwch y Famwlad UDA neu'r Swyddfa Dramor a Chymanwlad.

• Adran Diogelwch y Famwlad UDA - gwybodaeth am Ildio Fisa Opens new window

• Cyngor ar deithio i UDA gan y Swyddfa Dramor a Chymanwlad Opens new window