Gwefan llywodraeth y DU

Pryd gallwch gwyno i’r CSA

Gallwch gwyno am y gwasanaeth a gewch gan y CSA ar unrhyw bryd. Mae ffordd wahanol o wneud cwyn os ydych yn anghytuno gyda phenderfyniad a wnaed gan y CSA am swm y gynhaliaeth plant.

Cewch fwy o wybodaeth am beth i’w wneud os ydych yn anghytuno gyda phenderfyniad am swm y gynhaliaeth plant drwy ddefnyddio’r cyswllt isod.

• Os ydych yn anghytuno gyda phenderfyniad gan y CSA

Sut i wneud cwyn

Os ydych yn anhapus gyda’r gwasanaeth a gewch gan y CSA, dylech:

• dweud wrthynt beth yw’r broblem
• gofyn iddynt geisio datrys y broblem i chi

Y ffordd gyflymaf i wneud hyn yw dros y ffôn. Gallwch gael y manylion cyswllt sydd eu hangen arnoch ar ben unrhyw lythyr mae’r CSA wedi ei anfon atoch.

Gallwch hefyd gael manylion cyswllt eich swyddfa leol gan ddefnyddio’r cyswllt isod.

• Cysylltu gyda’r CSA Opens new window

Os ydych dal yn anhapus, gallwch wneud cwyn.

Gallwch e-bostio cwyn gan ddefnyddio’r ffurflen gwyno ar-lein.

• Ffurflen gwyno ar-lein y CSA Opens new window

Hefyd, gallwch gysylltu gyda’r CSA dros y ffôn neu’n ysgrifenedig. Bydd manylion cyswllt y CSA ar ben unrhyw lythyr rydych wedi ei gael gan y CSA.

Cewch wybod may am broses cwyno’r CSA drwy lawr-lwytho’r ddogfen ganlynol.

• Download Lawr-lwytho ‘Sut gallaf gwyno am y gwasanaeth a gaf gan y CSA’ (PDF, 291K)

• Help gyda ffeiliau PDF

Os ydych wedi mynd trwy’r broses cwyno ac rydych dal yn teimlo nad yw’r broblem wedi cael ei datrys, gallwch gysylltu gyda’r Archwilydd Achosion Annibynnol.

Yr Archwilydd Achosion Annibynnol (ICE)

Mae’r Archwilydd Achosion Annibynnol yn ymchwilio i gwynion am gyrff llywodraethol penodol, gan gynnwys y CSA. Dim ond ar ôl i chi fynd drwy broses cwyno’r CSA y byddant yn edrych i mewn i’ch achos cynhaliaeth plant.

Os hoffech i’r Archwilydd Achosion Annibynnol edrych i mewn i’ch cwyn, rhaid i chi gysylltu gyda hwy o fewn chwe mis o gael ateb terfynol gan y CSA.

Cewch wybod mwy am yr Archwilydd Achosion Annibynnol trwy ddefnyddio’r cyswllt isod.

• Yr Archwilydd Achosion Annibynnol (ICE) Opens new window

Yr Ombwdsmon Seneddol

Gallwch hefyd ofyn i’ch Aelod Seneddol i gael yr Ombwdsmon Seneddol a Gwasanaeth Iechyd i edrych i mewn i’ch achos.

Fel arfer, bydd yr Ombwdsmon ddim ond yn gweithredu ar gŵyn unwaith rydych:

• wedi bod trwy broses cwyno’r CSA
• wedi cael y gŵyn wedi ei hadolygu gan yr Archwilydd Achosion Annibynnol

Cewch wybod mwy am yr Ombwdsmon Seneddol a Gwasanaeth Iechyd drwy ddefnyddio’r cyswllt isod.

• Swyddfa’r Ombwdsmon Seneddol a Gwasanaeth Iechyd Opens new window

Beth fydd yn digwydd os bydd y CSA wedi gwneud camgymeriad?

Weithiau, gall y CSA wneud camgymeriad wrth ddelio ag achos. Gelwir hyn yn ‘gamweinyddiaeth’. Weithiau, bydd y CSA yn talu iawndal i’r rheini hynny sydd wedi cael eu heffeithio. Gelwir y rhain yn ‘daliadau arbennig’.

Cewch wybod mwy am daliadau arbennig trwy lawr-lwytho’r ‘Canllaw Taliadau Arbennig’ gan ddefnyddio’r cyswllt canlynol.

• Download Lawr-lwytho’r ‘Canllaw Taliadau Arbennig’ (PDF, 250K)

• Help gyda ffeiliau PDF

Taliadau cynhaliaeth plant ymlaen llaw

Weithiau, gall camweinyddiaeth gan y CSA arwain at fethu casglu cynhaliaeth plant gan y rhiant dibreswyl ar yr amser cywir. Golyga hyn fod oedi wrth i’r rhiant â gofal gael cynhaliaeth plant.

Rhiant dibreswyl yw’r rhiant nad yw’r plentyn yn byw gyda hwy fel arfer. Rhiant â gofal neu’r person â gofal yw’r rhiant neu ofalwr y mae’r plentyn yn byw gyda hwy fel arfer.

Os oes unrhyw oedi, bydd y CSA yn gwneud taliad ymlaen llaw i’r rhiant â gofal. Bydd hyn tra y bydd y CSA yn casglu taliadau gan y rhiant dibreswyl.

Telir taliadau ymlaen llaw mewn cyfandaliad. Maent yn wahanol i daliadau arbennig oherwydd bod y CSA yn parhau i gasglu beth sy’n ddyledus gan y rhiant dibreswyl.

Pryd bydd y CSA yn gwneud taliadau ymlaen llaw

Bydd y CSA ddim ond yn gwneud taliadau ymlaen llaw pan fydd:

• tystiolaeth glir bod camweinyddiaeth gan y CSA wedi achosi’r oedi
• tystiolaeth glir i ddangos, os na fyddai camweinyddiaeth wedi digwydd, y byddai’r rhiant dibreswyl wedi talu neu wedi cael ei wneud i dalu
• y swm sy’n ddyledus oherwydd camweinyddiaeth yn fwy na £100
• yn mynd i gymryd mwy na 26 wythnos i’r rhiant dibreswyl dalu’r gynhaliaeth plant na chafodd ei chasglu oherwydd camweinyddiaeth
• yr oedi’n hirach na’r amser arferol i brosesu taliadau

Rhaid bod y rhiant â gofal:

• wedi gorfod aros yn hirach nag arfer am eu cynhaliaeth plant
• wedi dangos diddordeb mewn symud eu hachos ymlaen yn ystod cyfnod yr oedi, trwy gysylltu gyda’r CSA o leiaf unwaith bob tri mis
• yn cytuno y gall y CSA gadw’r taliadau sydd wedi cael eu hoedi unwaith cânt eu casglu gan y rhiant dibreswyl
• yn cytuno i ad-dalu unrhyw daliadau a wnaed yn uniongyrchol iddynt gan y rhiant dibreswyl yn lle eu taliadau sydd wedi cael eu hoedi

Rhaid bod y rhiant dibreswyl:

• wedi bod yn talu hyd at bwynt y camweinyddiaeth
• yn gwneud taliadau cynhaliaeth plant rheolaidd a thaliadau ôl-ddyledion ar y pwynt pryd gwnaed y cais am daliad ymlaen llaw

Y CSA sy’n penderfynu os gellir gwneud taliadau ymlaen llaw. Mae pob penderfyniad am daliadau ymlaen llaw yn cael eu gwneud fesul achos.

Cysylltiadau defnyddiol eraill

• Gwefan yr Archwilydd Achosion Annibynnol (ICE) Opens new window

• Gwefan yr Ombwdsmon Seneddol a Gwasanaeth Iechyd Opens new window

• Download Lawr-lwytho ‘Sut gallaf gwyno am y gwasanaeth a gaf gan yr Asiantaeth Cynnal Plant’ (PDF, 291K)

• Help gyda ffeiliau PDF