Gwefan llywodraeth y DU

Cofiwch roi gwybod

Mae'n bwysig i chi roi gwybod i DVLA cyn gynted ag y byddwch yn gwerthu eich cerbyd neu chi fydd yn dal yn gyfrifol am dalu treth ar y cerbyd neu gosbau a all godi am beidio'i thalu. Efallai mai chi hefyd fydd yn cael gohebiaeth a fydd yn gysylltiedig â throseddau moduro a gyflawnir yn y cerbyd. Ar ôl rhoi gwybod i DVLA, dylech gael llythyr cydnabod o fewn pedair wythnos yn cadarnhau nad chi sy'n gyfrifol am y cerbyd mwyach.

Pwyntiau pwysig i’w hystyried wrth werthu cerbyd

Mae rhai camau syml y gallwch chi eu cymryd i warchod eich hun rhag dod yn ddioddefwr trosedd wrth werthu’ch cerbyd:

• mae'n werth cofio y gall lladron gymryd arnynt eu bod yn awyddus i brynu'ch cerbyd
• peidiwch byth â gadael i'r prynwr fynd am dro yn eich car heboch chi oherwydd mae'n bosib na ddaw yn ôl
• peidiwch â gadael yr allweddi yn y car gyda’r prynwr ar ei ben ei hun
• byddwch yn ofalus wrth dderbyn sieciau neu ddrafftiau banc, daliwch eich gafael ar eich car nes i chi fod yn siŵr bod y taliad yn ddilys - os oes gennych unrhyw amheuaeth, cysylltwch â'ch banc
• mae hefyd yn werth gofyn i'r prynwr am ryw fath o ddogfen sy'n cadarnhau pwy ydyw, a bod y ddogfen honno'n edrych yn un ddilys yn eich tyb chi, neu efallai y bydd y prynwr yn gofyn am weld prawf o bwy ydych chi
• gwybod ble mae’r rhif adnabod cerbyd oherwydd efallai y bydd y prynwr am weld hwn

Noder: mae DVLA wedi dod yn ymwybodol o nifer fach o achosion lle cynigwyd Archebion Talu DVLA ffug i dalu am gerbyd yn llawn neu'n rhannol. Ni ddylech ddisgwyl derbyn Archebion Talu DVLA gan gwsmeriaid preifat a dylech amau yn fawr iawn unrhyw un sy’n cynnig un i chi. Dim ond yn uniongyrchol i gwsmeriaid y mae DVLA yn rhoi’r rhain, fel arfer os oes ad-daliad yn ddyledus neu os oes gordaliad wedi cael ei wneud.

Tystysgrif cofrestru (V5C)

Bydd y prynwr am gael gweld y dystysgrif cofrestru (V5C) er mwyn gwneud yn siŵr bod manylion y cerbyd yn gywir. Efallai na fydd modd i chi werthu eich cerbyd heb dystysgrif cofrestru. Os ydych chi wedi'i cholli, fe allwch chi gael un newydd yn ei lle gan y DVLA.

• Cael dogfen neu dystysgrif gofrestru newydd yn lle un sydd ar goll neu wedi'i dwyn

Rhif cofrestru personol ar eich cerbyd

Bydd angen i chi drosglwyddo neu gadw’ch rhif cofrestru cyn i chi werthu’r cerbyd. Os na fyddwch chi’n gwneud hyn, byddwch chi’n colli’ch hawl i’r rhif cofrestru.

• Platiau cofrestru a rhif personol

• Download ‘Cais i drosglwyddo neu gadw rhif cofrestru cerbyd - V317' oddi ar y we (PDF, 136K)

• Cymorth gyda ffeiliau PDF

Gwerthu'r cerbyd yn breifat

Dylech bob amser gadw nodyn ar wahân o enw a chyfeiriad y prynwr. Dylech roi gwybod i DVLA ar unwaith gan ddefnyddio rhan briodol y dystysgrif cofrestru.

Tynnwch eich disg treth o'r cerbyd a gallwch hefyd wneud cais am ad-daliad treth cerbyd ar gyfer misoedd calendr cyflawn sy'n weddill ar y ddisg treth. Ni all y DVLA dalu eich ad-daliad nes y byddwch yn rhoi gwybod iddynt eich bod chi wedi gwerthu/trosglwyddo eich cerbyd.

• Sut i roi gwybod i'r DVLA os byddwch chi'n gwerthu'ch cerbyd

• Gwneud cais am ad-daliad treth cerbyd

Os nad oes gennych chi dystysgrif cofrestru, gallwch o hyd roi gwybod i DVLA nad yw'r cerbyd gennych chi mwyach. Er mwyn gwneud hyn rhaid i chi ysgrifennu at DVLA, Abertawe, SA99 1AR, gan nodi rhif cofrestru'r cerbyd, math a model y cerbyd, union ddyddiad ei werthu ac enw a chyfeiriad y ceidwad newydd.

Fodd bynnag, dylech nodi na fydd cofnodion DVLA yn gyflawn nes i'r ceidwad newydd roi gwybod i DVLA drwy lythyr. Tan hynny, efallai y bydd yr heddlu am gysylltu â chi os bydd yn rhaid iddynt wneud ymholiadau am y cerbyd.

Gwerthu eich cerbyd rhwng Prydain Fawr a Gogledd Iwerddon

Os byddwch yn gwerthu eich cerbyd i rywun sydd â chyfeiriad naill ai ym Mhrydain Fawr neu yng Ngogledd Iwerddon, dylech chi a'r prynwr lenwi a llofnodi Adran 6 ac 8 y dystysgrif cofrestru (V5C neu V5CNI).

Yna dylid trosglwyddo ffurflen V5C neu V5CNI i'r ceidwad newydd er mwyn iddo allu ailgofrestru'r cerbyd naill ai ym Mhrydain Fawr neu yng Ngogledd Iwerddon. Er y bydd y ceidwad newydd yn ailgofrestru'r cerbyd, bydd yn rhaid i chithau hefyd ysgrifennu at DVLA neu'r Asiantaeth Gyrwyr a Thrwyddedau (DVA). Mae'n dal yn ofynnol i chi roi gwybod i DVLA neu DVA (yr awdurdod y mae'r cerbyd yn ei gadael) bod y cerbyd wedi cael ei werthu, er mwyn gwneud yn siŵr nad chi sy'n gyfrifol am y cerbyd mwyach.

• Cysylltiadau moduro

Gwerthu i fasnachwr moduro

Os ydych chi'n trosglwyddo eich cerbyd i fasnachwr moduro a'ch bod yn meddu ar dystysgrif cofrestru, dylech roi gwybod i DVLA ar unwaith drwy ddefnyddio'r rhan V5C/3 a rhoi gweddill y ffurflen i'r masnachwr.

Ar ôl rhoi gwybod i DVLA, dylech gael llythyr cydnabod o fewn pedair wythnos yn cadarnhau nad chi sy'n gyfrifol am y cerbyd mwyach.

Tynnwch eich disg treth o'r cerbyd a gallwch hefyd wneud cais am ad-daliad treth cerbyd ar gyfer unrhyw fisoedd calendr cyflawn sy'n weddill ar y ddisg treth.

Ni all y DVLA dalu eich ad-daliad nes y byddwch yn rhoi gwybod iddynt eich bod chi wedi gwerthu/trosglwyddo eich cerbyd.

• Sut i roi gwybod i DVLA os byddwch chi'n gwerthu'ch cerbyd

• Gwneud cais am ad-daliad treth cerbyd

Yn y cyd-destun hwn, mae masnachwr moduron yn golygu:

• gwerthwr moduron
• arwerthwr cerbydau modur
• yswiriwr cerbydau modur sydd wedi cytuno â chi ynghylch hawliad am gyfanswm y golled
• datgymalwr cerbydau modur (iard sgrap)
• cwmni cyllid gyda budd ariannol yn y cerbyd

Darparu cyfraddau milltiroedd y cerbyd

Bydd nodi milltiroedd y cerbyd yn y blwch priodol ar y dystysgrif cofrestru yn help yn y frwydr yn erbyn 'clocio' cerbydau. Ystyr hyn yw pan fydd odomedr y cerbyd (y sbidomedr) yn cael ei droi'n ôl i dwyllo a lleihau nifer y milltiroedd sydd ar y cloc.