Gwefan llywodraeth y DU

Pwy all gael y cyfrifon newydd?

Gallwch agor cyfrif Porth Cynilo os ydych yn cael un o'r canlynol:

• Cymhorthdal Incwm
• Lwfans Ceisio Gwaith
• Budd-dal Analluogrwydd
• Lwfans Cyflogaeth a Chymorth
• Lwfans Anabledd Difrifol
• Lwfans Gofalwr – rhaid eich bod yn cael y lwfans, nid dim ond bod â hawl sylfaenol iddo
• Credydau treth – dim ond os oedd incwm eich cartref ar gyfer dyfarniad terfynol blwyddyn dreth 2009-10 yn llai nag £16,040

Hefyd, rhaid i chi fod yn preswylio’n arferol yn y Deyrnas Unedig (DU).
Mae preswylio’n arferol yn y DU yn golygu eich bod fel arfer yn byw yn y DU neu eich bod yn un o'r canlynol:

• un o ddinasyddion gwlad arall yn yr Ardal Economaidd Ewropeaidd (AEE) ac yn gweithio yn y DU
• un o Weision y Goron – mae hyn yn cynnwys aelodau’r lluoedd arfog sydd wedi’u lleoli y tu allan i’r DU
• yn bartner i un o Weision y Goron sydd wedi’i leoli y tu allan i’r DU
• rydych yn y DU am eich bod wedi cael eich anfon o wlad arall

Sut mae cael cyfrif?

Os ydych chi’n gymwys i gael cyfrif, bydd Cyllid a Thollau EM yn anfon llythyr atoch i gadarnhau hyn, ynghyd â manylion yn egluro sut a ble y gallwch gael cyfrif. Does dim angen i chi gysylltu â Chyllid a Thollau EM – caiff y llythyr ei anfon atoch yn awtomatig.

Anfonir y llythyr atoch ynghyd â manylion ynghylch ble y gallwch gael cyfrif. Mae hyn yn cynnwys manylion y 'darparwyr cyfrifon', megis banciau, cymdeithasau adeiladu, undebau credyd a Swyddfa’r Post. Ar ôl cael y llythyr, dylech gysylltu ag un o’r darparwyr cyfrifon hyn i wneud cais am gyfrif.

Peidiwch â phoeni os na chewch chi lythyr yn syth. Bydd Cyllid a Thollau EM yn anfon y llythyrau at bawb sy’n gymwys o fewn tua chwe mis. Byddwch yn dal i gael llythyr hyd yn oed os yw eich amgylchiadau wedi newid ers i'r Porth Cynilo gael ei lansio.

Sut y bydd y cyfrif yn gweithio

Ar ôl agor eich cyfrif cewch gynilo faint a fynnoch gyda’ch darparwr cyfrifon, hyd at £25 y mis. Ar ôl i’ch cyfrif fod ar agor am ddwy flynedd, bydd y llywodraeth yn rhoi 50 ceiniog i chi am bob £1 rydych wedi’i chynilo. Bydd eich darparwr cyfrifon yn talu’r arian hwn i chi – does dim angen i chi wneud cais i Gyllid a Thollau EM i gael yr arian.

Peidiwch â phoeni os yw £25 y mis yn swnio'n ormod – cewch gynilo faint bynnag o arian ag y dymunwch, a hynny pryd bynnag y dymunwch. Gallwch hefyd dynnu’ch arian o'r cyfrif os bydd arnoch angen gwneud hynny, a byddwch yn dal i gael arian gan y llywodraeth ar y swm rydych wedi'i gynilo.

Dim ond un cyfrif Porth Cynilo y cewch ei agor yn ystod eich oes, felly gwnewch yn siŵr eich bod yn ei agor ar yr adeg orau i chi.

Beth nesaf?

Bydd cyfrifon y Porth Cynilo ar gael o ddiwedd mis Gorffennaf 2010 ymlaen, a bydd Cyllid a Thollau EM yn ysgrifennu atoch os ydych chi'n gymwys.

Does dim angen i chi wneud dim byd, ond efallai y byddai’n werth holi i weld a ydych chi’n gymwys i gael unrhyw un o’r budd-daliadau neu’r credydau treth a grybwyllir uchod.

Mwy o ddolenni defnyddiol

• Dysgu mwy am gynilion a buddsoddiadau

• Dysgu sut mae cynllunio eich materion ariannol personol