Gwefan llywodraeth y DU

Pa warchodaeth a gynigir gan Fudd-dal Plant?

Mae eich Pensiwn y Wladwriaeth yn seiliedig ar faint o ‘flynyddoedd cymhwyso’ y byddwch chi'n eu cronni yn ystod eich bywyd gwaith. Ystyr blwyddyn gymhwyso yw pan fyddwch chi'n ennill digon mewn blwyddyn i dalu cyfraniadau Yswiriant Gwladol. Felly os nad ydych chi'n gweithio neu ddim yn ennill digon i dalu cyfraniadau Yswiriant Gwladol, gallai'ch pensiwn ddioddef o'r herwydd.

Ar gyfer pob wythnos y byddwch chi'n cael Budd-dal Plant, gallech fod yn gymwys i gael y canlynol:

• credydau Yswiriant Gwladol wythnosol i ddiogelu’ch hawl i gael Pensiwn sylfaenol y Wladwriaeth yn y dyfodol
• credydau Ffactor Enillion wythnosol i ddiogelu’ch hawl i gael Ail Bensiwn y Wladwriaeth yn y dyfodol

Gallwch gyfuno'r credydau wythnosol â chredydau a chyfraniadau Yswiriant Gwladol er mwyn cronni blwyddyn o hawl ar gyfer Pensiwn Sylfaenol y Wladwriaeth.

Mae’n rhaid i’ch credydau a’ch cyfraniadau gael eu gwneud yn yr un flwyddyn dreth er mwyn i chi allu eu cyfuno fel hyn.

Pwy sy’n gymwys i gael y credydau?

Gallwch gael y credydau os ydych chi'n cael Budd-dal Plant ar gyfer plentyn dan 12 oed. Byddwch yn dal i gael credydau nes bydd eich plentyn ieuengaf yn 12 oed.

Cyfnodau Budd-dal Plant sy'n cyfrif tuag at y credydau

Gallwch fod yn gymwys i gael y credydau am unrhyw gyfnod pan fyddwch chi’n cael Budd-dal Plant.

Os oes gennych werth llai na blwyddyn dreth lawn o gredydau, gallwch gyfuno’r credydau sydd gennych â chredydau eraill a chyfraniadau Yswiriant Gwladol er mwyn cael blwyddyn gymhwyso.

Bydd blwyddyn dreth yn dechrau ar 6 Ebrill ac yn dod i ben ar 5 Ebrill yn y flwyddyn ganlynol.

Os oeddech yn cael Budd-dal Plant cyn 6 Ebrill 2010

Os oeddech yn cael Budd-dal Plant ar gyfer plentyn dan 16 oed cyn 6 Ebrill 2010, roddech yn gymwys yn awtomatig ar gyfer cynllun o’r enw Diogelwch Cyfrifoldebau Cartref (HRP), a oedd yn helpu i ddiogelu'ch Pensiwn sylfaenol y Wladwriaeth. Erbyn hyn, mae’r cynllun hwn wedi’i ddisodli gan y credydau Yswiriant Gwladol wythnosol ar gyfer rhieni a gofalwyr a'r credyd Ffactor Enillion.

Ni fyddwch yn colli unrhyw warchodaeth rydych wedi'i chronni'n barod. Os byddwch yn cyrraedd oedran Pensiwn y Wladwriaeth ar 6 Ebrill 2010 neu ar ôl hynny, bydd unrhyw flynyddoedd treth cyflawn a oedd gennych o ran y cynllun Diogelwch Cyfrifoldebau Cartref (hyd at uchafswm o 22 mlynedd) yn cael eu trosi i flynyddoedd credydau cyflawn sy'n cyfrif tuag at Bensiwn sylfaenol y Wladwriaeth.

Os oeddech chi'n cael Budd-dal Plant ar gyfer plentyn dan 6 oed, rydych wedi cronni hawl i gael pensiwn ychwanegol drwy Ail Bensiwn y Wladwriaeth yn awtomatig.

Rhagor o wybodaeth

I gael mwy o wybodaeth gallwch ffonio Llinell Gymorth y Gwasanaeth Pensiwn ar 0845 606 0265 neu ddefnyddio'r ffôn testun ar 0845 606 0285.

Gallwch hefyd ffonio'r Llinell Gymorth Yswiriant Gwladol ar 0845 302 1479 rhwng 8.00 am a 5.00 pm.

Mwy o ddolenni defnyddiol

• Sut mae hawlio Budd-dal Plant

• Credydau Yswiriant Gwladol Opens new window

• Darllen mwy am gael credydau tuag at Bensiwn y Wladwriaeth (adran pensiynau a chynllunio ar gyfer ymddeol)

• Dod i wybod rhagor am ddeall Pensiwn ychwanegol y Wladwriaeth (adran pensiynau a chynllunio ar gyfer ymddeol)

• Dod i wybod rhagor am ddeall Ail Bensiwn y Wladwriaeth (adran pensiynau a chynllunio ar gyfer ymddeol)

Cysylltiadau defnyddiol

• Cysylltiadau arian, treth a budd-daliadau