Gwefan llywodraeth y DU

Defnyddio canhwyllau'n ddiogel yn eich cartref

Cofiwch yr awgrymiadau diogelwch isod pa bryd bynnag y byddwch chi'n defnyddio canhwyllau gartref:

Canhwyllau wedi’u cynnau - lle i’w rhoi

Y llefydd gorau i roi canhwyllau yw:

• ar arwyneb sy’n gwrthsefyll gwres - byddwch yn arbennig o ofalus gyda goleuadau nos a chanhwyllau bach crwn, sy'n poethi digon i losgi plastig
• mewn pethau dal canhwyllau priodol, fel na fyddant yn cwympo
• allan o gyrraedd plant ac anifeiliaid anwes
• allan o gyrraedd drafftiau a draw oddi wrth lenni, deunyddiau eraill neu ddodrefn, a allai fynd ar dân
• gydag o leiaf 1 metr (3 troedfedd) rhwng y gannwyll ac unrhyw arwyneb uwch ei phen
• gydag o leiaf 10 centimetr (4 modfedd) rhwng unrhyw ddwy gannwyll
• draw oddi wrth ddillad a gwallt - os oes unrhyw bosibilrwydd y gallech anghofio bod y gannwyll yno a phwyso ar ei thraws rhowch hi’n rhywle arall

Sicrhewch eich bod yn diffodd canhwyllau cyn eu symud, a pheidiwch â gadael i unrhyw beth ddisgyn i'r cŵyr poeth, megis coes matsis

Diffodd canhwyllau

Peidiwch byth â gadael cannwyll heb neb i gadw llygad arni. Sicrhewch eich bod yn gwneud y canlynol:

• diffodd canhwyllau cyn i chi adael ystafell a chyn i chi fynd i’ch gwely
• peidio byth â gadael cannwyll neu losgwr olew yn llosgi mewn ystafell wely plentyn
• defnyddio diffoddwr cannwyll neu lwy i’w diffodd - gall eu chwythu dasgu gwreichion a chŵyr poeth
• gwnewch yn hollol siŵr eu bod wedi’u diffodd yn llwyr ac nad ydynt yn dal i fudlosgi

Canhwyllau a dathliadau

Defnyddir canhwyllau a goleuadau nos yn aml mewn dathliadau ar gyfer y Nadolig, Diwali a gwyliau eraill. Sicrhewch nad ydych yn rhoi canhwyllau ar goeden Nadolig, planhigion, blodau na deiliant arall, nac yn agos atynt. Dylech hefyd fod yn ofalus â rhubanau, cardiau cyfarch ac addurniadau eraill, gan wneud yn siŵr nad ydynt yn agos at fflamau canhwyllau.

Gweler ‘Diogelwch tân gwyllt a’r gyfraith’ i gael gwybodaeth ynglŷn â defnyddio tân gwyllt yn ddiogel.

• Diogelwch tan gwyllt a'r gyfraith

Goleuadau addurniadol ac addurniadau yn ystod gwyliau

Ni fydd goleuadau bach a goleuadau a roddir ar goed Nadolig yn cael eu defnyddio'n aml iawn, felly dylech wneud yn siŵr eu bod yn gweithio'n iawn cyn eu defnyddio:

• sicrhewch fod maint y ffiws sydd yn y plwg yn gywir - edrychwch ar y bocs i weld beth yw'r ffiws uchaf ddylech chi ei ddefnyddio
• rhowch fylbiau newydd yn lle unrhyw rai sydd wedi chwythu
• peidiwch â gadael goleuadau ymlaen pan fyddwch yn mynd i'ch gwely neu'n gadael y tŷ
• peidiwch â gadael i'r bylbiau gyffwrdd ag unrhyw beth a all losgi'n rhwydd, megis papur neu ddeunyddiau ac addurniadau eraill ar y goeden Nadolig

Sicrhewch eich bod chi hefyd yn cadw addurniadau Nadoligaidd eraill wedi’u gwneud o bapur sidan neu gardfwrdd a chardiau cyfarch draw oddi wrth wresogyddion, goleuadau, llefydd tân a chanhwyllau.

Mwy o ddolenni defnyddiol

• Diogelwch tân ac offer trydanol