Gwefan llywodraeth y DU

Hawl i weithio mewn aelod-wladwriaeth arall yn yr Undeb Ewropeaidd

Fel un o ddinasyddion yr Undeb Ewropeaidd (UE) neu Norwy, Gwlad yr Ia neu Liechtenstein (gwledydd yr AEE), mae gennych hawl i weithio mewn unrhyw aelod-wladwriaeth arall. Does dim angen trwydded waith arnoch chi. Bydd gennych chi hefyd yr un hawliau â dinasyddion y wlad dan sylw o ran amodau gwaith, cyflog a nawdd cymdeithasol.

• Yr Undeb Ewropeaidd (adran llywodraeth, dinasyddion a hawliau)

Dod o hyd i waith mewn aelod-wladwriaeth arall yn yr UE

Os ydych chi’n awyddus i ddod o hyd i waith mewn aelod-wladwriaeth arall yn yr UE, gallwch chwilio am swydd drwy ddefnyddio peiriant chwilio swyddi'r Ganolfan Byd Gwaith.

• Dod o hyd i swydd nawr

Mae gwybodaeth am weithio yn Ewrop ar gael gan y rhwydwaith swyddi Ewropeaidd, EURES (Gwasanaethau Cyflogi Ewrop). Gallwch hefyd ddefnyddio gwefan EURES i gofrestru'ch CV neu i chwilio am swyddi.

• EURES – y Porth Swyddi Ewropeaidd Opens new window

Gweithwyr sy'n cael eu hanfon i wlad arall i weithio

Os bydd eich cyflogwr yn eich trosglwyddo o un o aelod-wladwriaethau’r UE y mae gennych hawl i weithio ynddi i un o aelod-wladwriaethau eraill yr UE dros dro, mae hyn yn berthnasol i chi. Bydd telerau ac amodau eich cyflogaeth yn cael eu diogelu.

Efallai fod eich cyflogwr yn eich anfon i aelod-wladwriaeth arall yn yr Undeb Ewropeaidd am un o'r rhesymau canlynol:

• mae gan eich cyflogwr swyddfeydd mewn gwlad arall
• rydych yn cael eich trosglwyddo i gwmni cysylltiedig neu gwmni sy'n cael ei reoli gan eich cyflogwr (a elwir yn is-gwmni) mewn aelod-wladwriaeth arall yn yr Undeb Ewropeaidd
• mae gan eich cyflogwr gontract i gyflenwi neu ddarparu gwasanaethau mewn aelod-wladwriaeth arall yr Undeb Ewropeaidd
• rydych yn gweithio i fusnes cyflogaeth sy'n llogi gweithwyr i aelod-wladwriaeth arall yn yr UE, ond sy'n parhau i'ch cyflogi chi'n uniongyrchol

Gwarchodaeth i weithwyr sy'n cael eu hanfon i wlad arall i weithio

Rhaid i'ch cyflogwr gydymffurfio â'r telerau ac amodau cyflogaeth sylfaenol yn y wlad rydych wedi cael eich anfon iddi. Er enghraifft, os oes gan y wlad rydych yn cael eich anfon iddi isafswm cyflog uwch, bydd gennych hawl i gael isafswm cyflog y wlad honno.

Does dim yn rhwystro'ch cyflogwr rhag cynnig telerau ac amodau cyflogaeth mwy ffafriol i chi na'r isafswm a ddarperir gan y wlad rydych wedi cael eich anfon iddi.
Dyma'r telerau ac amodau sy'n berthnasol i weithwyr sy'n cael eu hanfon i wlad arall i weithio:

• uchafswm cyfnodau gwaith a lleiafswm cyfnodau egwyl
• isafswm gwyliau blynyddol â thâl
• yr Isafswm Cyflog Cenedlaethol
• iechyd a diogelwch yn y gwaith
• gwarchodaeth os ydych chi’n feichiog neu newydd roi genedigaeth
• rhaid i ddynion a menywod gael eu trin yn gyfartal a dylid sicrhau darpariaethau eraill i wneud yn siŵr na wahaniaethir yn erbyn neb

• Terfynau oriau gwaith (yr wythnos 48 awr)

• Amser o'r gwaith a gwyliau

• Cyfraddau'r Isafswm Cyflog Cenedlaethol

• Iechyd a diogelwch yn y gwaith

• Gwahaniaethu yn y gwaith

Cytundebau cenedlaethol ar y cyd

Mae hefyd yn bosib bod eich telerau ac amodau gwaith yn cael eu rheoleiddio gan gytundebau cenedlaethol ar y cyd a all fod yn berthnasol yn gyffredinol. Does dim ar waith yn y DU.

• Ymuno ag undeb llafur

Darpariaethau Yswiriant Gwladol a Threth

Nid yw'r warchodaeth a gynigir i weithwyr a anfonir i wlad arall i weithio yn ymdrin â darpariaethau Yswiriant Gwladol a threth.

Os ydych chi'n gweithio yn y DU, bydd angen i chi gofrestru at ddibenion treth. Os oes gennych ffurflen E101 o'r wlad sydd fel arfer yn eich cyflogi, gallai hynny olygu y gallwch barhau i dalu cyfraniadau nawdd cymdeithasol i'ch mamwlad.

I gael gwybod mwy am y ffurflen E101 neu am dreth a nawdd cymdeithasol os cewch eich anfon o'r DU neu i'r DU i weithio, bydd angen i chi gysylltu â Chyllid a Thollau EM.

• Cyllid a Thollau EM

Ble i gael cymorth

I gael mwy o wybodaeth ynghylch ble i gael cymorth gyda materion yn ymwneud â chyflogaeth, ewch i'r dudalen cysylltiadau cyflogaeth. Os ydych chi'n aelod o undeb llafur, gallwch gael cymorth, cyngor a chefnogaeth ganddyn nhw.

Os hoffech gael cyngor ynghylch dod o hyd i waith dramor, gallwch gysylltu â thîm Cyngor ynghylch Chwilio am Waith Rhyngwladol y Ganolfan Byd Gwaith.

Anfonwch e-bost at y tîm ar:
europarc.ija4@jobcentreplus.gsi.gov.uk

• Cysylltiadau cyflogaeth

• Undebau llafur