Gwefan llywodraeth y DU

Cael pecyn cais

Ffoniwch 0800 585 505 i gael pecyn cais, neu os oes gennych unrhyw gwestiynau ynghylch Benthyciadau Proffesiynol a Datblygu Gyrfa. Gallwch hefyd drefnu i gynghorydd eich ffonio'n ôl yn rhad ac am ddim, neu gysylltu dros yr e-bost.

• Trefnu i gael galwad ffôn yn ôl am ddim gan gynghorydd Benthyciadau Proffesiynol a Datblygu Gyrfa Opens new window

• Anfon e-bost at gynghorydd Benthyciadau Proffesiynol a Datblygu Gyrfa Opens new window

Ar ôl i chi lenwi'r ffurflen dylech ei hanfon i'r banc yr ydych wedi penderfynu gwneud cais iddo.

A yw Benthyciad Proffesiynol a Datblygu Gyrfa yn addas i chi?

Cyn i chi wneud cais, mae'n bwysig ystyried ai Benthyciad Proffesiynol a Datblygu Gyrfa yw'r dewis iawn i chi. Dylai'r camau isod eich helpu i benderfynu.

Cam un: gwnewch yn siŵr eich bod wedi ystyried eich holl opsiynau cyllid

Nid yw Benthyciad Proffesiynol a Datblygu Gyrfa yn addas i bawb: gwnewch yn siŵr eich bod wedi ystyried yr holl opsiynau cyllid.

Efallai y gallech gael cymorth ariannol nad oes yn rhaid i chi ei dalu'n ôl – y Grant Dysgu i Oedolion er enghraifft, neu gronfeydd cefnogi dewisol ar gyfer dysgwyr (sydd ar gael gan eich coleg o bosib).

• Cymorth gyda chostau dysgu: cyflwyniad

• Ariannu astudio ol-radd

Cam dau: ydych chi'n gymwys?

Er mwyn bod yn gymwys, mae angen i chi a'ch cwrs fodloni rhai amodau. Mae'r rhain yn seiliedig ar y math o gwrs y mae arnoch eisiau ei wneud, eich statws preswylio ac ar ychydig o ffactorau eraill. Gweler 'Benthyciadau Proffesiynol a Datblygu Gyrfa: beth ydyn nhw?' i gael manylion.

• Benthyciadau Proffesiynol a Datblygu Gyrfa: beth ydyn nhw?

Cam tri: gwnewch yn siŵr bod y cwrs yn addas i chi

Gan y bydd yn rhaid i chi dalu'ch benthyciad yn ôl hyd yn oed os na fyddwch yn cwblhau'ch cwrs, mae'n bwysig gwneud yn siŵr eich bod yn barod i ymrwymo iddo.

• Dewis y cwrs iawn

• Dod o hyd i le ar gwrs ôl-radd

Cam pedwar: gwnewch yn siŵr eich bod wedi holi ynghylch y darparwr dysgu

Gofynnwch i'ch darparwr dysgu a ydynt ar y Gofrestr Benthyciadau Proffesiynol a Datblygu Gyrfa ar gyfer darparwyr dysgu (neu a ydynt yn fodlon cofrestru ar gyfer y Gofrestr). Dylai darparwyr dysgu ffonio 0845 000 0045 i gael mwy o wybodaeth am gofrestru.

Ond mae'n bwysig cofio mai helpu i weinyddu'r benthyciadau yw pwrpas y gofrestr – nid yw'r ffaith bod darparwr dysgu wedi'i gynnwys ar y gofrestr yn gwarantu ansawdd na sefydlogrwydd ariannol.

Os na fyddwch chi'n cwblhau'r cwrs, bydd yn dal yn rhaid i chi dalu'r benthyciad yn ôl. Mae hyn yn berthnasol hyd yn oed os byddwch yn gadael y cwrs oherwydd eich bod yn anfodlon â'i ansawdd, neu os bydd darparwr y cwrs yn mynd i'r wal.

Felly cyn i chi ddewis darparwr dysgu, mae'n werth gofyn ychydig o gwestiynau amdanynt. Gallai’r rhain gynnwys:

• os mae cymwysterau yn cael eu cynnig, a ydynt yn rhai cydnabyddedig?
• beth yw polisi'r darparwr dysgu ar ad-daliadau (rhag ofn y bydd eich amgylchiadau'n newid ac y bydd angen i chi adael y cwrs – dros dro neu'n barhaol)?
• a gynigir lefel benodol o gefnogaeth gan diwtoriaid – ac a yw'r gefnogaeth yn cael ei darparu wyneb-yn-wyneb, dros yr e-bost ynteu dros y ffôn?
• a ydynt yn fodlon anfon rhai enghreifftiau o'u deunyddiau dysgu i chi?
• a ydynt yn gallu eich rhoi mewn cysylltiad â phobl sydd wedi cwblhau'r cwrs?

Cam pump: gwnewch yn siŵr y gallwch fforddio'r ad-daliadau

Cyfrifwch faint y byddai angen i chi ei fenthyg, a beth fyddai'r ad-daliadau ar ôl i chi adael y cwrs. Gwnewch yn siŵr y bydd gennych ddigon o arian ar ôl o'ch cyllideb fisol i wneud yr ad-daliadau.

• Ad-dalu Benthyciad Proffesiynol a Datblygu Gyrfa

Mae hefyd yn werth meddwl i ba raddau yr ydych yn disgwyl i'r cwrs wella'ch rhagolygon gyrfa er mwyn cyfiawnhau'r swm y mae arnoch eisiau ei fenthyg. Os byddwch angen trafod eich opsiynau gyrfa, mae digonedd o gyngor ar gael.

• Cael cyngor personol ar yrfaoedd a dysgu

Os ydych yn cael budd-daliadau

Os ydych yn cael budd-daliadau, gallai Benthyciad Proffesiynol a Datblygu Gyrfa newid yr hyn y mae gennych hawl iddo. Felly cyn i chi wneud cais, cysylltwch â'r swyddfa budd-daliadau berthnasol i gael gwybod sut y bydd yn effeithio ar eich hawliad.

• Canolfan Byd Gwaith

• Dod o hyd i'ch cyngor lleol

Pryd i wneud cais

Fel arfer, bydd y banc yn cymryd rhwng chwe wythnos a thri mis i brosesu eich cais – felly gwnewch yn siŵr eich bod yn cyflwyno'ch cais mewn da bryd.

Os bydd eich cais yn llwyddiannus, bydd y banc yn anfon cytundeb credyd atoch. Bydd angen i chi a'ch darparwr dysgu lofnodi hwn, felly bydd angen i chi wneud yn siŵr eu bod ar y Gofrestr Benthyciadau Proffesiynol a Datblygu Gyrfa ar gyfer darparwyr dysgu (neu eu bod yn fodlon cofrestru ar gyfer y gofrestr).

Os caiff eich cais ei wrthod, gallwch wneud cais i un o'r banciau eraill sy'n rhan o'r cynllun.

Os oes gennych Fenthyciad Datblygu Gyrfa yn barod

Os ydych wedi cael un o'r Benthyciadau Datblygu Gyrfa a oedd ar gael tan fis Mehefin 2009, ni allwch gael Benthyciad Proffesiynol a Datblygu Gyrfa ar gyfer yr un cwrs.

• Os oes gennych Fenthyciad Datblygu Gyrfa yn barod