Gwefan llywodraeth y DU

Sut y byddwch yn ad-dalu'ch Benthyciad Proffesiynol a Datblygu Gyrfa

Byddwch yn dechrau talu'r benthyciad yn ôl ar ôl i chi adael eich cwrs. Pan fyddwch yn trefnu'r benthyciad, byddwch yn cytuno ar amserlen o ad-daliadau misol gyda'r banc.

Cofiwch ddweud wrth y banc os bydd eich manylion personol neu'ch amgylchiadau ariannol yn newid.

Llog ar Fenthyciadau Proffesiynol a Datblygu Gyrfa

Bydd y Cyngor Dysgu a Sgiliau yn talu'r llog ar eich Benthyciad Proffesiynol a Datblygu Gyrfa tra byddwch yn astudio – ac am fis ar ôl i chi adael eich cwrs.

Ar ôl hyn, byddwch chi'n talu'r llog ar y gyfradd a bennwyd wrth drefnu'r benthyciad yn y lle cyntaf. Caiff cyfraddau llog ar y benthyciadau eu pennu fel eu bod yn gystadleuol â benthyciadau personol eraill sydd 'heb eu gwarantu' ac sydd ar gael yn fasnachol.

Ar hyn o bryd, mae banciau yn cynnig Benthyciadau Proffesiynol a Datblygu Gyrfa ar gyfradd is i gwsmeriaid o 9.9% y flwyddyn, sy’n gyfatebol i gyfradd ganrannol flynyddol o 5.6% dros oes y benthyciad. Fodd bynnag, gall cyfraddau llog amrywio o fanc i fanc. Am fwy o wybodaeth, cysylltwch â’r banciau sy’n cymryd rhan.

Gwneud yn siŵr y gallwch fforddio'r ad-daliadau

Mae'n hollbwysig eich bod yn meddwl yn ofalus faint mae angen i chi ei fenthyg a faint y gallwch fforddio ei dalu'n ôl.

Casglwch fanylion eich incwm a'ch gwariant tebygol ar ôl i chi orffen eich cwrs, a'u defnyddio i lunio cyllideb. Byddwch yn realistig ynghylch faint o arian fydd gennych dros ben bob mis i wneud ad-daliadau.

Mae cyfryngau rhyngweithiol ar gael yn 'Cyllidebu' i'ch helpu i lunio cyllideb.

• Cyllidebu (adran arian, treth a budd-daliadau)

Os ydych chi'n cael trafferth gwneud ad-daliadau

Os ydych chi'n meddwl y bydd yn anodd i chi ad-dalu'r Benthyciad Proffesiynol a Datblygu Gyrfa (neu un o'r Benthyciadau Datblygu Gyrfa a oedd ar gael tan fis Mehefin 2009), mae'n bwysig eich bod yn siarad â'ch banc cyn gynted â phosib.

Gan ddibynnu ar eich amgylchiadau, mae'n bosib y bydd y banc yn fodlon gadael i chi ohirio'ch ad-daliadau – ond bydd angen i chi a'r banc gytuno ar hyn cyn y byddwch yn dechrau ad-dalu'r benthyciad.

• Rheoli dyled (adran arian, treth a budd-daliadau)

Os na fyddwch chi'n cwblhau eich cwrs

Byddwch yn dal yn gyfrifol am dalu'r benthyciad yn ôl hyd yn oed os na fyddwch yn cwblhau'ch cwrs. Mae hyn yn berthnasol beth bynnag yw'ch rheswm dros beidio â chwblhau'r cwrs, hyd yn oed nad chi wnaeth y penderfyniad (er enghraifft, oherwydd bod darparwr y cwrs wedi mynd i'r wal).

Felly, mae'n bwysig gwneud yn siŵr bod y cwrs yn addas i chi, a chanfod pwy yw darparwr y cwrs.

Gweler 'Sut i wneud cais am Fenthyciad Proffesiynol a Datblygu Gyrfa' i gael help i benderfynu a yw Benthyciad Proffesiynol a Datblygu Gyrfa yn addas i chi.

Cael pecyn cais

• Sut i wneud cais am Fenthyciad Proffesiynol a Datblygu Gyrfa

Mwy o ddolenni defnyddiol

• Benthyciadau heb eu gwarantu a ffyrdd eraill o fenthyg arian (adran arian, treth a budd-daliadau)