Gwefan llywodraeth y DU

Gwasanaethau iechyd meddwl cymunedol

Mae nifer fawr o wasanaethau ar gael yn y gymuned a ddarperir i fod yn gefn i'ch gofal meddygol - bydd eich gweithiwr/wraig iechyd yn gallu dweud wrthych a ydych chi'n gymwys ai peidio.

Efallai y bydd rhaid i chi dalu am rai o'r gwasanaethau hyn, neu gyfrannu tuag atynt. Pennir hyn drwy wneud 'prawf modd'. Bydd y gwasanaethau cymdeithasol yn gofyn cwestiynau i chi am eich incwm a'ch cyfalaf i weld a ddylech eu talu ai peidio.

Gall gweithwyr gofal yn y gymuned roi cyngor i chi am:

• sut i gael mynediad at waith, addysg neu waith gwirfoddol
• cymorth ariannol megis budd-daliadau
• pa gyfleusterau lleol sydd ar gael a sut i'w defnyddio

Gofal dydd

Canolfannau gofal dydd

Yn aml iawn, bydd y canolfannau hyn yn cael eu rhedeg gan fudiadau gwirfoddol ac maen nhw'n cynnig cefnogaeth a gweithgareddau cymdeithasol. Mae'n bosib y bydd eich meddyg teulu neu'ch cydlynydd gofal yn eich cyfeirio ar ôl asesiad neu bydd rhai llefydd yn gadael i chi 'ddod yno ar eich liwt eich hun'. Fe elwir hyn yn hunangyfeirio.

Cyfeillio - cefnogaeth un-ac-un

Caiff gwasanaethau cyfeillio eu rhedeg gan fudiadau gwirfoddol, lle bydd gwirfoddolwyr yn cael hyfforddiant arbennig i gynnig cymorth a chyfeillgarwch ar sail un-ac-un. Cewch ofyn am fod yn rhan o'r cynllun, does dim rhaid i chi gael eich cyfeirio.

Help gartref gyda thasgau beunyddiol

Gall cynghorau lleol ddarparu gwasanaethau megis gwasanaeth golchi dillad, pryd ar glud a chymorth cartref os yw'r gwasanaethau cymdeithasol o'r farn y bydd hynny'n help i chi aros yn eich cartref neu yn eich cymuned. Bydd rhaid i chi gael asesiad gofal yn y gymuned i fod yn gymwys ar gyfer y gwasanaethau hyn.

Y Rhaglen Cefnogi Pobl

Mae’r Rhaglen Cefnogi Pobl yn rhoi cefnogaeth a chyngor ynghylch gwasanaethau sy’n ei wneud yn haws i aros yn eich cartref eich hun, fel coginio, talu biliau neu gyllidebu.

Llety

Tai â chefnogaeth a chartrefi grŵp

Bydd y cynlluniau hyn yn darparu tai wedi’u dodrefnu i’r rheini sy’n gallu byw yn annibynnol ond byddai’n elwa o gael mynediad i weithwyr cefnogi.

Rhaid i chi gael asesiad gofal yn y gymuned i gael lle mewn un o’r cynlluniau hyn, ac mae’n bosib bydd rhaid i chi dalu (mae prawf modd ar gyfer hyn).

Cymunedau therapiwtig

Bydd y cymunedau hyn yn rhannu tŷ lle bydd pobl fel arfer yn aros am gyfnod y cytunir arno. Bydd y cymdogion hyn yn gallu gweld therapydd preswyl a chael cefnogaeth drwy gydol y cyfnod adsefydlu.

Rhaid i chi gael asesiad gofal yn y gymuned i gael lle mewn cymuned therapiwtig, ac mae'n bosib y bydd rhaid i chi dalu (mae prawf modd ar gyfer hyn).

Hosteli

Bydd hosteli'n cynnig cartref dros dro gyda'r nod o'ch annog i fod yn annibynnol tra'n rhoi cymorth i chi gyda'ch anghenion. Mae'r gweithwyr yn cynnwys nyrsys, gweithwyr cymdeithasol a gweithwyr cymorth iechyd meddwl.

Rhaid i chi gael asesiad gofal yn y gymuned i gael lle mewn hostel a gall fod rhaid i chi dalu (mae prawf modd ar gyfer hyn).

Cartrefi gofal

Gellir darparu gofal 24-awr gan weithwyr cymdeithasol preswyl, nyrsys a gweithwyr cymorth iechyd meddwl. Mae hyn ar gyfer pobl sydd ag angen lefel uchel o ofal ac sy'n ei chael hi'n anodd ymdopi yn eu cartref eu hunain, er gwaetha'r cynlluniau gofal cymunedol eraill sydd ar gael.

Rhaid i chi gael asesiad gofal yn y gymuned i gael lle mewn cartref gofal, ac mae'n bosib y bydd rhaid i chi dalu (mae prawf modd ar gyfer hyn).