Gwefan llywodraeth y DU

Dewis beic o'r maint cywir

Mae angen i chi fod yn gyfforddus ac mae'n bwysig i chi allu stopio'n ddiogel ar eich beic, felly gwnewch yn siŵr bod ei faint yn addas ar eich cyfer chi. Sefwch dros ffrâm y beic. Os yw ei faint yn gywir, dylech allu gwneud y canlynol yn hwylus:

• rhoi eich dwy droed yn fflat ar y llawr
• mynd ar y beic yn hawdd, a mynd oddi arno
• codi'r olwyn flaen o leiaf 5 centimetr oddi ar y llawr yn ddidrafferth

Uchder y sedd a'r bar llywio

Dylai eich sedd a'r bar llywio fod ar uchder sy'n gyfforddus i chi. Rhowch un sawdl ar y pedal. Dylai eich coes sythu pan mae'r pedal ar y pwynt pellaf o'r sedd. Gwnewch yn siŵr nad ydych yn codi'r sedd nes eich bod yn gweld y marc ar bostyn y sedd sy'n dangos na ellir codi dim mwy arni. Os oes angen i'r sedd fod mor uchel â hyn i chi allu eistedd yn gyfforddus, mae'n debygol bod y beic yn rhy fach i chi.

Gwneud yn siŵr bod eich beic yn addas i'w ddefnyddio

Dylech archwilio eich beic yn rheolaidd i wneud yn siŵr ei fod yn gweithio'n iawn.

Yr olwynion a'r teiar blaen

Gafaelwch ym mholyn y bar llywio i godi tu blaen y beic, yna:

• tarwch ben uchaf yr olwyn gyda'ch llaw i wneud yn siŵr nad yw'n disgyn o'r fforc nac yn symud o ochr i ochr
• gwnewch yn siŵr nad yw'r olwyn yn symud o ochr i ochr pan rydych chi'n ceisio'i siglo er mwyn sicrhau nad yw'r berynnau wedi gwisgo
• troellwch yr olwyn flaen – ddylai'r brêcs ddim rhwbio yn erbyn ochr yr olwyn
• gwasgwch ochrau'r teiar – os yw'n teimlo'n feddal rhowch fwy o wynt ynddo
• cadwch olwg am fylchau, toriadau neu ymchwyddiadau ar y teiars – mae'r rhain yn arwyddion bod y teiars wedi gwisgo a bod angen cael rhai newydd

Os oes gennych chi giard mwd blaen, dylid cael bwlch o 5 milimetr o leiaf rhwng y giard mwd blaen a'r teiar. Tynnwch y giard mwd os yw'n rhwbio yn erbyn blaen eich esgid pan rydych chi'n pedlo.

Gafaelwch yn y sedd er mwyn codi cefn y beic a gwnewch yr un archwiliadau eto ar yr olwynion cefn.

Brêcs

Defnyddiwch y brêc blaen. Gwnewch yn siŵr:

• bod y brêcs yn gweithio – gwthiwch y beic yn ei flaen gyda'r brêcs ymlaen
• bod y padiau brêc yn gorwedd yn gytbwys ar ymyl yr olwyn – ddylen nhw ddim cyffwrdd ar un pen ond ddim ar y llall
• nad yw'r ceblau y tu mewn i liferi'r brêc wedi breuo
• bod liferi'r brêc a'r gripiau llaw yn dynn ar y bar llywio, bod yr holl nytiau a'r sgriwiau yn sownd a bod y ddau ben i diwb y bar llywio wedi'u gorchuddio

Defnyddiwch y brêc ôl a gwneud yr un archwiliadau eto. Dylai'r teiar ôl lithro yn hytrach na rholio pan rydych yn defnyddio'r brêcs ac yn gwthio'r beic yn ei flaen.

Y bar llywio a'r system lywio

Dylai'r holl rannau ar y bar llywio fod yn dynn a dylech allu llywio'n ddidrafferth. Rhyddhewch y brêcs, sefwch o flaen yr olwyn flaen a'i dal rhwng eich pen-gliniau. Yna gwnewch yn siŵr nad oes dim yn rhydd pan fyddwch yn ceisio:

• troi'r bar llywio o ochr i ochr
• defnyddio'r brêcs ac yn ceisio troi'r bar llywio

Y sedd

Symudwch yn nes at gefn y beic a gafael yn dynn yn y sedd. Gwnewch yn siŵr nad ydych yn gallu ei symud i fyny ac i lawr nac o ochr i ochr. Os yw'n symud, dylech ei thynhau.

Y gadwyn, y gêrs a'r pedalau

Gofynnwch i rywun weithio'r pedalau gyda llaw tra rydych chithau'n codi'r olwyn ôl oddi ar y llawr drwy ddal y sedd. Wedyn:

• ewch drwy'r gêrs i gyd ar y sbroced ôl a'r newidydd gêrs blaen er mwyn gwneud yn siŵr bod y gadwyn yn aros yn ei lle ac yn symud yn esmwyth
• siglwch bob pedal o ochr i ochr er mwyn gwneud yn siŵr nad ydynt yn symud gormod – os ydyn nhw'n symud gormod, mae angen newid y berynnau yn y braced isaf

Gwnewch yn siŵr nad yw'r gadwyn yn hongian, wedi torri neu wedi rhydu. Rhowch olew ar y gadwyn os oes angen.

Os ydych yn ansicr ynghylch sut mae addasu eich beic

Os oes angen cymorth arnoch i gynnal a chadw eich beic, ewch i'ch siop feiciau leol am gyngor. Bydd modd i chi hefyd ddysgu sut mae archwilio'ch beic os byddwch chi'n cael rhywfaint o hyfforddiant beicio.

• Hyfforddiant beicio

Cael clo da

I gadw'ch beic yn ddiogel bydd angen dau glo gwahanol arnoch chi, megis clo D cadarn a chlo cryf ar gyfer y gadwyn. I gael cyngor ynghylch beth i edrych amdano pan fyddwch chi'n dewis clo a sut mae gwneud yn siŵr bod eich beic yn ddiogel, dilynwch y ddolen isod. Neu gwyliwch fideo Ymgyrch Beicio Llundain (LCC) i weld sut i beidio â chloi eich beic.

• Download 'Steer clear of theft - awgrymiadau ar gyfer diogelwch i feicwyr’ (PDF, 1030K)

• Cymorth gyda ffeiliau PDF

• Fideo 'Beat the thief: Sut i gloi eich beic’ – LCC Opens new window

Mwy o ddolenni defnyddiol

• Canllaw i gynnal a chadw eich beic – Ymgyrch Beicio Llundain Opens new window

• Diogelwch ar gefn beic (adran rhieni)

• Rheolau'r Ffordd Fawr – Rheolau i feicwyr

• Rheolau'r Ffordd Fawr – Arwyddion a marciau

• Rheolau'r Ffordd Fawr – Cynnwys llawn