Gwefan llywodraeth y DU

Galw'ch gorsaf heddlu leol

Cyn galw'r heddlu i roi gwybod bod eich cerbyd wedi'i ddwyn, sicrhewch fod gennych chi holl fanylion y cerbyd wrth law, h.y. rhif cofrestru, math, model a lliw'r cerbyd. Bydd yr heddlu yn rhoi cyfeirnod y trosedd i chi a bydd angen hwn arnoch wrth wneud cais am yswiriant a chais am ad-daliad ar eich disg dreth.

Ffonio'ch cwmni yswiriant

Bydd angen i chi gysylltu â'ch cwmni yswiriant ar unwaith i gael cyngor. Os na lwyddir i ddod o hyd i'ch cerbyd a bod eich cwmni yswiriant yn talu am y golled, yna dylech hysbysu'r DVLA am y dyddiad y derbyniwyd y taliad a rhoi enw a chyfeiriad y cwmni yswiriant.

Dylech gwblhau adran V5C/3 'hysbysu ynghylch gwerthu neu drosglwyddo' eich dogfen gofrestru. Os yw'ch cwmni yswiriant yn gofyn am y ddogfen neu'r dystysgrif gofrestru lawn, dylech roi gwybod i'r DVLA drwy lythyr gan nodi manylion y cwmni yswiriant a dyddiad yr hawliad.

Ad-dalu treth cerbyd

Gallwch wneud cais am ad-daliad ar eich treth cerbyd os yw'ch cerbyd wedi'i ddwyn a heb ei ganfod. Caiff llawer o gerbydau eu canfod o fewn ychydig ddyddiau i ladrad, felly fe'ch cynghorir i beidio â gwneud cais am ryw wythnos ar ôl y lladrad. Mae ffurflen gais V33 arbennig ar gael ar gyfer hyn. Bydd angen cyfeirnod y trosedd arnoch a roddir gan yr heddlu. Ceir rhagor o wybodaeth am wneud cais am ad-daliad o'r ddolen isod.

• Sut i wneud cais am ad-daliad ar eich treth cerbyd

Beth ddylech chi ei wneud os oes gennych chi rif cofrestru personol

Os oedd gan y cerbyd a gafodd ei ddwyn rif cofrestru personol, byddwch fel arfer yn gallu ei hawlio'n ôl os nad yw'r cerbyd wedi dod i'r fei ar ôl 12 mis, os gallwch fodloni rhai gofynion penodol.

• rhaid i chi fod wedi hysbysu'r heddlu bod y cerbyd wedi'i ddwyn a bod y DVLA wedi cofnodi bod y cerbyd wedi'i ddwyn ers o leiaf 12 mis
• pan gafodd y cerbyd ei ddwyn, rhaid bod ganddo dystysgrif MOT gyfredol
• pan gafodd y cerbyd ei ddwyn, rhaid bod ganddo ddisg dreth gyfredol
• mae'r DVLA yn gofyn am lythyr gan eich cwmni yswiriant yn cadarnhau nad oes ganddynt wrthwynebiad i ailgyflwyno'r rhif

Os caiff y cerbyd ei ganfod ar unrhyw adeg, gwnewch gais i gadw’ch rhif cofrestru yn syth. I gael gwybod sut i drosglwyddo neu gadw rhif cofrestru, dilynwch y dolenni isod.

• Trosglwyddo rhif cofrestru a sut i wneud cais

• Cadw rhif cofrestru a sut i wneud cais

Am ragor o wybodaeth neu am lythyr o awdurdodiad i drosglwyddo, ysgrifennwch at: Adran Rhifau Cofrestru Arbennig, DVLA, Abertawe, SA99 1BW