Gwefan llywodraeth y DU

Y gyfraith ynghylch defnyddio ffonau yn y llaw a dyfeisiau tebyg wrth yrru

PWYLLWCH!

Mae amseroedd ymateb gyrwyr sy’n defnyddio ffonau yn y llaw 30 y cant yn arafach nag amseroedd ymateb gyrwyr sydd wedi bod yn yfed hyd at y terfyn cyfreithiol.

• Gwylio fideo am yrru a defnyddio ffôn symudol Opens new window

Mae’n anghyfreithlon defnyddio ffôn symudol yn y llaw wrth yrru cerbyd neu feic modur. Mae hyn hefyd yn berthnasol i unrhyw ddyfais debyg y mae’n rhaid ei dal ar ryw adeg i:

• anfon neu dderbyn negeseuon llafar neu ysgrifenedig, neu ddelweddau llonydd neu symudol
• defnyddio’r rhyngrwyd

Mae’r dyfeisiau hyn yn cynnwys ffonau clyfar neu Gynorthwywyr Digidol Personol (PDA).

Pan fyddwch chi’n gyrru, ni chewch ddefnyddio eich ffôn symudol, eich ffôn clyfar na'ch Cynorthwyydd Personol yn y llaw i wneud y canlynol:

• gwneud neu dderbyn galwadau
• anfon neu dderbyn negeseuon testun a llun
• defnyddio’r rhyngrwyd
• pan fyddwch wedi stopio wrth oleuadau traffig
• pan fyddwch mewn ciw mewn traffig

Mae hefyd yn anghyfreithlon defnyddio ffôn symudol yn y llaw wrth oruchwylio rhywun sy’n dysgu gyrru.

Os ydych chi’n gyflogwr, gallwch gael eich erlyn os byddwch chi’n gofyn i’ch gweithwyr wneud neu dderbyn galwadau wrth yrru.

Y cosbau am ddefnyddio eich ffôn wrth yrru

Os cewch chi eich dal yn defnyddio ffôn symudol yn y llaw neu ddyfais debyg wrth yrru, gallwch ddisgwyl cael hysbysiad cosb benodedig yn awtomatig. Mae hyn yn golygu y cewch chi dri phwynt cosb ar eich trwydded yrru, a bydd yn rhaid i chi dalu dirwy o £60.

Fodd bynnag, mae’n bosib y bydd eich achos yn mynd i'r llys. Os bydd yn mynd i’r llys, gallech hefyd gael eich gwahardd rhag gyrru yn ogystal â hyd at £1,000 o ddirwy. Os ydych chi’n yrrwr bws neu gerbyd nwyddau, gallech wynebu hyd at £2,500 o ddirwy.

• Gwaharddiadau rhag gyrru (adran moduro)

Os byddwch yn cael chwe phwynt cosb neu ragor o fewn dwy flynedd i basio'ch prawf, byddwch yn colli eich trwydded dan y Ddeddf Gyrwyr Newydd. Bydd angen i chi ailsefyll eich prawf gyrru i gael eich trwydded yn ôl.

• Y Ddeddf Gyrwyr Newydd (adran moduro)

Pam mae defnyddio eich ffôn wrth yrru yn beryglus

Bydd gwneud neu dderbyn galwadau ffôn wrth yrru yn tynnu eich sylw. Mae ymchwil yn dangos eich bod bedair gwaith yn fwy tebygol o gael damwain os byddwch chi’n defnyddio unrhyw fath o ffôn symudol wrth yrru. Mae eich amseroedd ymateb hefyd gryn dipyn yn arafach nag amseroedd ymateb rhywun sydd wedi bod yn yfed hyd at y terfyn cyfreithiol.

I gael gwybod pa mor anodd yw canolbwyntio ar sawl peth wrth yrru, rhowch gynnig ar y gêm Driving Challenge. Mae’r gêm ar-lein hon yn pwysleisio peryglon defnyddio eich ffôn wrth yrru.

• Rhoi cynnig ar Driving Challenge Opens new window

Pryd allwch chi ddefnyddio ffôn symudol yn y llaw yn eich cerbyd

Dim ond yn yr amgylchiadau canlynol y dylech chi ddefnyddio eich ffôn symudol mewn cerbyd:

• mae angen i chi ffonio 999 neu 112 mewn ymateb i argyfwng go iawn pan nad yw’n ddiogel neu’n ymarferol i chi stopio
• rydych wedi parcio mewn man diogel (ond peidiwch byth â stopio ar y llain galed ar y draffordd oni bai ei fod yn argyfwng)
• rydych chi’n deithiwr

• Beth i'w wneud os bydd eich car yn torri i lawr ar y draffordd

Defnyddio ffonau symudol llawrydd (handsfree), peiriannau llywio â lloeren a radios dwyffordd wrth yrru

Nid yw’n anghyfreithlon i chi ddefnyddio ffonau symudol llawrydd, peiriant llywio â lloeren (sat-nav) na radios dwyffordd wrth yrru, ond fe allant dynnu’ch sylw. Os bydd yr heddlu'n credu nad ydych yn rheoli'ch cerbyd yn briodol, byddwch yn wynebu'r un cosbau a phetaech yn defnyddio ffôn wrth yrru.

• Rheolau'r Ffordd Fawr 149-151: ffonau symudol a thechnoleg mewn cerbydau

Os byddwch chi’n ffonio rhywun sy’n gyrru ar y pryd

Os byddwch chi’n ffonio rhywun ac yn sylweddoli ei fod yn gyrru ar y pryd, trefnwch i siarad yn nes ymlaen a rhoi'r ffôn i lawr.

Os byddwch chi’n dal i siarad, mae perygl i’r gyrrwr gael damwain, ac rydych yn ei annog i dorri’r gyfraith.