Gwefan llywodraeth y DU

A oes angen i chi lenwi Ffurflen Dreth Ymddiriedolaethau ac Ystadau?

Does dim rhaid i chi lenwi Ffurflen Dreth Ymddiriedolaethau ac Ystadau os yw’r ystad yn gymharol syml. Er enghraifft, os yw cyfanswm y Dreth Incwm a’r Dreth Enillion Cyfalaf sy’n ddyledus ar gyfer y cyfnod gweinyddu i gyd yn llai na £10,000, ni fydd angen i chi lenwi’r ffurflen. Bydd angen i chi gysylltu â’r Swyddfa Dreth a fu'n delio â materion treth y sawl a fu farw. Byddan nhw'n dweud wrthych sut i dalu unrhyw dreth sy'n ddyledus.

Os oes angen i chi lenwi Ffurflen Dreth Ymddiriedolaethau ac Ystadau, bydd angen i chi gysylltu â Swyddfa Ymddiriedolaethau yn gyntaf. Gweler yr adran isod ‘Cael help a chyngor’ i gael gwybod sut.

Cyfrifo’r Dreth Incwm a’r Dreth Enillion Cyfalaf sy’n ddyledus

Pan fyddwch chi'n cyfrifo cyfanswm y dreth, cofiwch y bydd rhywfaint o incwm yr ystad wedi cael ei drethu'n barod ac na fydd rhagor o dreth i'w thalu, er enghraifft:

• llog banc neu gymdeithas adeiladu
• difidendau ar gyfranddaliadau cwmnïau

Efallai y bydd rhaid i chi dalu treth ar yr incwm canlynol:

• llog ar rai cyfrifon neu fondiau cynilion cenedlaethol
• rhent o eiddo
• incwm o fuddsoddiadau tramor

Os ydych chi wedi gwerthu neu wedi cael gwared ar asedau’r ystad mewn ffordd arall, cofiwch y bydd angen i chi gyfrifo a oes rhaid talu Treth Enillion Cyfalaf. Er enghraifft, os mai chi yw cynrychiolydd personol yr ystad, efallai eich bod wedi gwerthu neu wedi cael gwared ar y canlynol:

• eiddo neu dir
• stociau a chyfranddaliadau
• asedau busnes, er enghraifft eiddo busnes

• Treth Enillion Cyfalaf

• Incwm trethadwy ac incwm anhrethadwy – cipolwg Opens new window

Llenwi'r Ffurflen Dreth Ymddiriedolaethau ac Ystadau

Os oes angen i chi lenwi Ffurflen Dreth Ymddiriedolaethau ac Ystadau, gallwch wneud hynny ar-lein, neu gallwch lenwi ffurflen bapur (SA900). Os byddwch chi’n llenwi ffurflen dreth ar bapur, efallai y bydd angen rhai tudalennau ychwanegol arnoch chi, gan ddibynnu ar eich amgylchiadau. Dilynwch y ddolen SA900 isod i lwytho'r rhain i lawr.

Os byddwch chi’n anfon y ffurflen ar-lein, mae gennych fwy o amser i gyflwyno’ch ffurflen na phetaech yn anfon ffurflen bapur – mae amryw o fanteision eraill hefyd. Yn gyntaf, bydd angen i chi brynu meddalwedd fasnachol a chofrestru gyda Gwasanaethau Ar-lein Cyllid a Thollau EM.

• Cael SA900 Ffurflen Dreth Ymddiriedolaethau ac Ystadau Opens new window

• Meddalwedd Hunanasesu gan gyflenwyr masnachol Opens new window

• Cofrestru ar gyfer Hunanasesu Ar-lein Opens new window

Beth sy’n digwydd os nad oes gennych chi’r union ffigurau?

Os nad oes gennych chi’r union ffigurau, gallwch ddefnyddio:

• amcangyfrif – ffigur yr ydych am i Gyllid a Thollau EM ei dderbyn fel eich ffigur terfynol
• ffigur dros dro – ffigur yr ydych am ei ddefnyddio nes gallwch gadarnhau'r union swm (rhaid i chi ddweud wrth Gyllid a Thollau EM pryd fydd yr union ffigurau ar gael)

Defnyddiwch yr adran ‘Gwybodaeth Ychwanegol’ ar y ffurflen dreth i ddweud sut cawsoch chi’r ffigurau hyn a pham na allwch ddefnyddio'r union ffigurau. Os byddwch yn gwneud newidiadau yn nes ymlaen a chithau heb dalu digon o dreth, efallai y bydd yn rhaid i chi dalu llog a chosbau ariannol.

Osgoi camgymeriadau cyffredin

Gall anfon eich ffurflen dreth ar-lein eich helpu i osgoi gwneud camgymeriadau.

Os ydych yn anfon ffurflen dreth bapur:

• sicrhewch eich bod yn llofnodi’r ffurflen ac yn nodi’r dyddiad arni
• gwnewch yn siŵr eich bod wedi llenwi ac wedi cynnwys unrhyw dudalennau ychwanegol angenrheidiol
• peidiwch â chynnwys nodiadau ar y ffurflen, fel ‘yn y cyfrifon’ neu ‘gwybodaeth i ddod’

Pryd i anfon y ffurflen dreth

Os gofynnir i chi lenwi Ffurflen Dreth Ymddiriedolaethau ac Ystadau ar gyfer y cyfnod gweinyddu, bydd rhaid i chi ei dychwelyd erbyn:

• 31 Hydref yn dilyn y flwyddyn dreth berthnasol os ydych chi’n anfon y ffurflen bapur
• 31 Ionawr yn dilyn y flwyddyn dreth berthnasol os ydych chi’n anfon y ffurflen ar-lein

Os ydych am ddod â’r cyfnod gweinyddu i ben cyn hyn, gofynnwch i Gyllid a Thollau EM anfon ffurflen dreth bapur atoch. Ni fydd modd i chi ei llenwi ar-lein.

Ffurflenni treth ar ôl i'r cyfnod gweinyddu ddod i ben

Bydd y cyfnod gweinyddu’n dod i ben pan fydd materion ariannol y sawl a fu farw wedi cael eu setlo. Bydd y Swyddfa Ymddiriedolaethau yn anfon Ffurflen Dreth Ymddiriedolaethau ac Ystadau atoch ar gyfer y cyfnod terfynol.

Ni fydd angen i chi barhau i lenwi ffurflenni treth oni bai y sefydlir ymddiriedolaeth gyda’r cyfan neu ran o’r hyn sy’n weddill o’r ystad. Os ydych chi’n ymddiriedolwr i’r ymddiriedolaeth honno, bydd rhaid i chi lenwi Ffurflenni Treth Ymddiriedolaethau ac Ystadau tra bydd yr ymddiriedolaeth yn bodoli os oes angen talu Treth Incwm neu Dreth Enillion Cyfalaf.

• Ffurflenni treth i ymddiriedolwyr

Cael help a chyngor

Cael help a chyngor gyda materion treth y sawl a fu farw

Dylech gysylltu â Chyllid a Thollau EM cyn gynted â phosib ar ôl i’r person farw. Bydd Cyllid a Thollau EM yn gallu eich helpu drwy drafod â chi yr hyn y mae angen i chi ei wneud.

Ffoniwch y Llinell Gymorth Materion Treth neu gysylltu â'r Swyddfa Dreth a fu'n delio â materion treth y sawl a fu farw. Os nad ydych chi’n gwybod gyda pha Swyddfa Dreth y dylech chi gysylltu, defnyddiwch y ddolen isod.

• Dod o hyd i Swyddfa Dreth Opens new window

• Ffonio neu ysgrifennu at Gyllid a Thollau EM Opens new window

Delio â’r ystad

Os oes angen gwybodaeth gyffredinol arnoch am faterion Treth Incwm neu Dreth Enillion Cyfalaf sy’n gysylltiedig â’r cyfnod gweinyddu, gallwch ffonio'r Llinell Gymorth ar gyfer Ystadau Pobl sydd wedi Marw. Ond os yw’ch cwestiwn yn ymwneud yn benodol â materion treth y sawl a fu farw, dylech gysylltu â'i Swyddfa Dreth neu'r Llinell Gymorth Materion Treth.

• Llinell Gymorth ar gyfer Ystadau Pobl sydd wedi Marw Opens new window

Cael cyngor ynghylch Hunanasesu

Os oes angen help arnoch chi, gallwch ffonio’r Llinell Gymorth Hunanasesu – byddant yn gallu eich cynghori ynghylch llenwi eich ffurflen dreth a rhoi cyngor cyffredinol am Hunanasesu.

• Cysylltu â'r Llinell Gymorth Hunanasesu Opens new window

Cysylltu â Swyddfa Ymddiriedolaethau ac Ystadau Cyllid a Thollau EM

Os byddwch chi'n llenwi Ffurflen Dreth Ymddiriedolaethau ac Ystadau, Swyddfa Ymddiriedolaethau ac Ystadau Cyllid a Thollau EM fydd yn delio â’r ffurflen fel rheol yn hytrach na Swyddfa Dreth y sawl a fu farw.

Mae’r Swyddfa Ymddiriedolaethau ac Ystadau hefyd yn delio ag ymholiadau cyffredinol ynghylch Treth Incwm neu Dreth Enillion Cyfalaf sy’n gysylltiedig ag ymddiriedolaethau.

Defnyddiwch y ddolen isod i ddod o hyd i fanylion cyswllt Swyddfa Ymddiriedolaethau ac Ystadau Cyllid a Thollau EM.

• Ymddiriedolaethau ac Ystadau Cyllid a Thollau EM

Cael help proffesiynol

Gall delio ag ystad rhywun fod yn gymhleth, felly efallai yr hoffech gael cyngor proffesiynol gan gynghorydd treth neu dwrnai.

• Dod o hyd i dwrnai ar wefan Cymdeithas y Cyfreithwyr Opens new window

• Dod o hyd i dwrnai – Cymdeithas y Cyfreithwyr yr Alban Opens new window

• Dod o hyd i gynghorydd treth ar wefan Chartered Institution of Taxation Opens new window

• Dod o hyd i gyfrifydd Opens new window

• Dod o hyd i gyfrifydd siartredig ar wefan ICAEW Opens new window

• Institute of Chartered Accountants (yr Alban) Opens new window

Mwy o ddolenni defnyddiol

• Cael trefn ar faterion treth rhywun ar ôl iddynt farw (adran llywodraeth, dinasyddion a hawliau)

• Cyflwyniad i ymddiriedolaethau

• Marwolaeth a phrofedigaeth (adran llywodraeth, dinasyddion a hawliau)

Cysylltiadau defnyddiol

• Hunanasesu a’ch ffurflen dreth