Gwefan llywodraeth y DU

Sut mae Rhoi drwy'r Gyflogres yn gweithio

Mae Rhoi drwy'r Gyflogres yn eich galluogi chi i roi cyfraniadau i elusen yn syth o'ch cyflog neu’ch pensiwn personol/cwmni. Gwneir y cyfraniadau ar ôl i’ch cyfraniadau Yswiriant Gwladol gael ei gyfrifo ond cyn cyfrifo a didynnu’r Dreth Incwm. O ganlyniad, dim ond ar yr hyn sydd ar ôl y byddwch chi'n talu treth.

Mae hyn yn golygu eich bod yn cael gostyngiad treth ar eich cyfraniad yn syth, a hynny ar eich cyfradd dreth uchaf.

Enghraifft – y gyfradd dreth sylfaenol a Rhoi drwy’r Gyflogres

Rydych yn talu treth ar y gyfradd sylfaenol o 20 y cant, ac yn awdurdodi cyfraniad misol o £10. Mae hynny’n golygu y byddwch yn arbed £2 o dreth (20 y cant o £10). Gwir gost y cyfraniad i chi yw £8.

Enghraifft – y gyfradd dreth uwch a Rhoi drwy’r Gyflogres

Rydych yn talu treth ar y gyfradd uwch o 40 y cant, ac yn awdurdodi cyfaniad misol o £10. Mae hynny’n golygu y byddwch yn arbed £4 (40 y cant o £10). Gwir gost y cyfraniad i chi yw £6.

Pwy sy'n gallu Rhoi drwy'r Gyflogres?

Gallwch Roi drwy'r Gyflogres os yw’r ddau amod canlynol yn berthnasol:

• rydych yn gyflogai ac yn cael eich talu’n wythnosol neu’n fisol drwy’r system Talu Wrth Ennill
• rydych yn cael pensiwn cwmni a/neu bersonol ac mae eich darparwr yn didynnu treth drwy’r system Talu Wrth Ennill

Hefyd, mae angen i’ch cyflogwr neu ddarparwr pensiwn weithredu Cynllun Rhoi drwy’r Gyflogres. Os nad ydynt yn, gallech ofyn iddynt ystyried gwneud hynny. Gallant gael gwybod mwy ynghylch Rhoi drwy’r Gyflogres a manylion cyswllt am Asiantaethau Rhoi drwy ddilyn y ddolen ar ddiwedd yr adran hon.

Neu gallant ffonio’r llinell gymorth Elusennau Cyllid a Thollau EM a dewis opsiwn 6 ar gyfer Rhoi drwy’r Gyflogres.

• Rhoi drwy’r Gyflogres – gwybodaeth i gyflogwyr a darparwyr pensiwn Opens new window

• Cysylltu â’r Llinell gymorth Elusennau Opens new window

Sut mae gwneud cyfraniad gan ddefnyddio Rhoi drwy'r Gyflogres

Gallwch wneud cyfraniad drwy awdurdodi eich cyflogwr neu’r sawl sy’n talu’ch pensiwn i ddidynnu swm penodol o’ch cyflog neu’ch incwm pensiwn.

Bydd eich cyflogwr neu’r sawl sy’n talu’ch pensiwn yn trosglwyddo'ch cyfraniad i asiantaeth Rhoi drwy'r Gyflogres a gymeradwyir gan y llywodraeth, a fydd wedyn yn trosglwyddo'r arian i'r elusen o'ch dewis. Nid oes rhaid i chi ddweud wrth eich cyflogwr neu’r sawl sy'n talu'ch pensiwn pa elusennau rydych chi'n eu cefnogi. Yn hytrach, gallwch lenwi ffurflen syml ar gyfer yr asiantaeth Rhoi drwy'r Gyflogres er mwyn dweud wrthynt i ble y dylent anfon eich cyfraniadau. Gallwch roi’n anhysbys - nid oes rhaid i’r elusen o’ch dewis gwybod eich manylion.

Gall rhai asiantaethau Rhoi drwy’r Gyflogres roi cerdyn elusen neu lyfr siec elusen i chi er mwyn i chi allu gwneud cyfraniadau uniongyrchol i unrhyw elusen pryd bynnag y dymunwch.

Ar ôl i gyfraniad gael ei ddidynnu o’ch cyflog neu’ch pensiwn, nid yw'n bosib cael ad-daliad. Mae’n bosib y bydd rhai asiantaethau yn codi ffi fechan, a ddidynnir o'ch cyfraniad, i dalu am gostau gweinyddol.

Rhoi drwy'r Gyflogres a chyfraniadau eraill i elusen

Nid yw Rhoi drwy'r Gyflogres yn effeithio ar unrhyw gyfraniadau eraill yr ydych am eu gwneud i elusen. Er enghraifft, gallwch roi cyfraniadau eraill drwy ddefnyddio Cymorth Rhodd os ydych chi’n talu o leiaf gymaint o dreth â’r swm y bydd yr elusen yn ei derbyn mewn ad-daliadau treth Cymorth Rhodd.

• Rhoi i elusen drwy Gymorth Rhodd

Cysylltu â’r Llinell gymorth Elusennau Cyllid a Thollau EM

Am ragor o wybodaeth gallwch gysylltu â’r Llinell gymorth Elusennau.

• Cysylltu â’r Llinell gymorth Elusennau Opens new window