Gwefan llywodraeth y DU

Defnyddio radio VHF i anfon hysbysiad cyfyngder pan ydych chi’n agos at yr arfordir

Dylai cyfarpar cyfathrebu eich cwch gynnwys radio VHF o leiaf.

Mae VHF yn gweithio o fewn 30 môr-filltir i’r darn agosaf o dir y DU.

Mewn argyfwng, anfonwch neges lais Mayday neu Pan-Pan ar VHF sianel 16 (amledd 156.8MHz).

Defnyddio radio VHF gyda galw detholus digidol (DSC)

Os oes gennych chi DSC, defnyddiwch y botwm cyfyngder i anfon hysbysiad cyfyngder. Bydd pob cwch sydd â DSC a phob Canolfan Cydlynu Achub Morol (MRCC) yn yr ardal yn cael gwybodaeth yn awtomatig am y canlynol:

• rhif adnabod eich llong
• y math o alwad (cyfyngder)
• y sianel yr hoffech ei defnyddio i siarad (sianel 16 yw’r dewis awtomatig)
• eich lleoliad

Caiff yr hysbysiad hwn ei ailadrodd bob pedwar munud nes iddo gael ei gydnabod. Mae DSC VHF gan bob MRCC yn y DU a gan y rhan fwyaf o wylwyr glannau Ewrop, a byddant yn ymateb yn gyflym i alwadau.

Ar ôl yr hysbysiad DSC, anfonwch neges lais Mayday neu Pan-Pan ar sianel 16. Os derbyniwch gynnig o gymorth gan gwch arall, rhowch wybod i’r gwyliwr glannau a chanslo’r hysbysiad DSC fel ei fod yn stopio trawsyrru.

I anfon lleoliad manwl yn awtomatig, gofalwch fod y DSC wedi’i gysylltu â System Leoli Fyd-eang (GPS). Fel arall, bydd angen i chi ddiweddaru eich lleoliad â llaw yn rheolaidd.

Anfon neges lais Mayday neu Pan-Pan

Os yw eich sefyllfa’n ddifrifol, er enghraifft, bod bywyd rhywun mewn perygl, anfonwch neges lais Mayday. Os yw’n sefyllfa frys, ond nad oes bywyd rhywun mewn perygl, er enghraifft os yw eich mast wedi torri, anfonwch neges Pan-Pan.

Neges Mayday

Dywedwch yn araf ac yn glir:

• "Mayday, Mayday, Mayday"
• "This is (enw’r llong)" [dywedwch hyn deirgwaith]
• "Mayday"
• Enw eich llong, ei harwydd galw a’i rhif MMSI [dywedwch hyn unwaith]
• Eich lleoliad
• Natur y cyfyngder [er enghraifft, "the boat is sinking"]
• Dweud bod angen cymorth ar unwaith
• Faint o bobl sydd ar fwrdd y llong
• Unrhyw wybodaeth arall
• "Over"

Gellir anfon y neges lais Mayday heb ddefnyddio DSC.

Neges Pan-Pan

Dywedwch yn araf ac yn glir:

• "Pan Pan, Pan Pan, Pan Pan"
• Eich rhif MMSI ac enw eich llong [dywedwch hyn deirgwaith]
• Eich lleoliad
• Natur y sefyllfa [er enghraifft, "rig failure"]
• Beth rydych chi’n bwriadu ei wneud
• "Over"

Defnyddio ffôn symudol yn agos at yr arfordir mewn argyfwng

Os ydych chi’n agos at arfordir y DU, gallwch ddeialu 999/112 a gofyn am wyliwr y glannau. Peidiwch â dibynnu ar ffôn symudol ar y môr i roi gwybod i wyliwr y glannau, oherwydd gall fod yn anodd cael signal.

Tanio fflêr oleuo

Mewn argyfwng, cewch danio naill ai:

• fflêr goch
• fflêr oleuo barasiwt goch
• fflêr oleuo goch y gellir ei dal mewn llaw

Peidiwch â dibynnu ar fflerau goleuo’n unig i anfon hysbysiad. Rhaid i rywun arall ddweud eu bod wedi gweld eich fflêr oleuo er mwyn i chi gael cymorth. Gofalwch nad ydych chi’n tanio fflerau coch na fflerau goleuo parasiwt yn agos i hofrenyddion neu awyrennau.

• Beth i'w wneud â rocedi goleuo sy'n hen neu wedi eu niweidio

Sut mae anfon hysbysiad cyfyngder pan ydych chi’n bell o’r arfordir

Bydd angen cyfarpar cyfathrebu ychwanegol arnoch i anfon hysbysiad cyfyngder pan ydych chi dros 30 môr-filltir oddi ar arfordir y DU. Gallwch:

• anfon neges lais Mayday neu Pan-Pan ar radio amledd canolig (MF) (2182KHz) neu ar radio amledd uchel (HF)
• defnyddio ffôn lloeren i ffonio MRCC yn y DU
• deialu 112 ar ffôn lloeren i gysylltu â’r gwasanaethau argyfwng ledled Ewrop a rhai rhannau eraill o’r byd
• defnyddio’r botwm cyfyngder ar ddyfais cyfathrebu lloeren Inmarsat-C
• defnyddio tywysydd radio i ddangos eich lleoliad mewn argyfwng (EPIRB) i anfon hysbysiad cyfyngder drwy gyfrwng lloeren i’r MRCC agosaf

• Manylion cyswllt canolfannau MRCC

• Mwy am gyfarpar cyfathrebu radio i gychod pleser

Cadwch eich arwydd galw a gweithdrefnau cyfyngder wrth ymyl y radio

Mae’r gweithdrefnau cyfyngder a map o ble mae VHF yn gweithio ar y môr ar gael yn y daflen o’r ddolen isod. Gallwch hefyd ofyn am sticer i’w lynu’n agos at eich radio – cysylltwch ag Asiantaeth y Môr a Gwylwyr y Glannau (MCA).

• Download siart i lawr sy'n dangos ble mae VHF yn gweithio a'r gweithdrefnau cyfyngder radio (PDF, 918K)

• Download copi o daflen am signalau achub bywydau oddi ar y we (PDF, 204K)

• Help gyda ffeiliau PDF

• Cysylltu ag Asiantaeth y Môr a Gwylwyr y Glannau

Sut ymateb a gewch i’ch galwad cyfyngder

Pan fydd Gwylwyr Glannau EM yn derbyn galwad cyfyngder, byddant yn ei chydnabod, yn ymateb iddi ac yn gofyn am fwy o wybodaeth am y canlynol:

• beth yw’r digwyddiad a ble y mae
• faint o bobl sydd mewn trafferth
• pa mor beryglus yw’r sefyllfa iddynt

Yna, bydd y gwyliwr glannau’n penderfynu sut mae ymateb i’r hysbysiad cyfyngder, a allai olygu anfon badau achub, hofrenyddion chwilio ac achub neu dimau achub gwylwyr y glannau.

Byddant hefyd yn cysylltu ag unrhyw longau neu gychod sy’n agos at y digwyddiad ac yn gofyn iddynt helpu os gallant. Pan gewch gymorth gan wylwyr y glannau, byddant yn eich arwain drwy’r broses achub.

Bydd Gwylwyr Glannau EM yn ymateb i ddigwyddiadau chwilio ac achub (SAR) sy’n digwydd yn rhanbarth SAR y DU. Os gwnewch alwad cyfyngder y tu allan i ranbarth SAR y DU, awdurdod SAR y rhanbarth hwnnw fydd yn ymateb iddi.

Os derbyniwch signal cyfyngder

Rhaid i chi ymateb i unrhyw signalau cyfyngder y byddwch yn eu gweld neu’n eu clywed, a helpu unrhyw un neu unrhyw gwch sydd mewn cyfyngder hyd eithaf eich gallu. Ond ni ddylech beryglu eich cwch na’ch criw i wneud hynny.

• Rheoliadau diogelwch ar gyfer cychod pleser

Mwy o ddolenni defnyddiol

• Cofrestru eich cwch gyda Gwylwyr Glannau EM - y cynllun adnabod diogelwch gwirfoddol

• Cofrestru cychod pleser gan gynnwys iotiau

• Cadw'n ddiogel ar yr arfordir