Gwefan llywodraeth y DU

Mesurau sy’n rhoi rheolaeth i rieni

Mae gan gyfrifiaduron a thechnolegau digidol eraill megis consolau gemau a ffonau symudol fesurau sy’n rhoi rheolaeth i rieni. Mae’r rhain yn eich galluogi i wneud pethau fel y canlynol:

• atal gwefannau a chyfeiriadau e-bost penodol drwy eu hychwanegu ar restr ffiltro
• gosod cyfyngiadau amser ar gyfer defnyddio’r dechnoleg
• rhwystro eich plentyn rhag chwilio rhai geiriau

Cyn i chi osod rheolau, gallwch edrych yn llawlyfr defnyddiwr y cyfarpar neu ar wefannau'r gwneuthurwyr er mwyn gweld pa reolaeth allwch chi ei gael. Gallwch chi hefyd gysylltu â’ch darparwr gwasanaethau rhyngrwyd neu â chwmni eich ffon symudol i gael gwybod am unrhyw fesurau diogelwch plant y maent yn eu cynnig.

Gosod rheolau gyda’ch plentyn

Wrth wneud cyfres o reolau ar gyfer defnyddio’r rhyngrwyd, mae’n syniad da i chi ei wneud yng nghwmni eich plentyn. Bydd bod yn rhan o'r broses yn ei helpu i ddeall y peryglon ac yn rhoi ymdeimlad o gyfrifoldeb iddo. Bydd hefyd yn rhoi gwybod iddo am ba fath o wefannau sy’n addas ar ei gyfer yn eich barn chi.

Y ffordd orau o gadw eich plentyn yn ddiogel ar-lein yw mynd ar y rhyngrwyd eich hun a dysgu sut mae’n ei defnyddio. Bydd hyn yn eich helpu i osod rheolau rhesymol.

Defnydd derbyniol o'r rhyngrwyd

Dyma rai enghreifftiau o ddefnydd defnyddiol:

• mae’n rhaid i’r cyfrifiadur sydd wedi’i gysylltu â’r rhyngrwyd fod mewn ystafell deulu gyda’r sgrin yn wynebu gweddill yr ystafell fel y gallwch weld beth sy'n digwydd
• os yw eich plentyn yn mynd ar wefan anaddas drwy gamgymeriad, dylai ddweud wrthych – gallwch ei ddileu o’r ffolder ‘hanes’ ac ychwanegu’r cyfeiriad at restr ffiltro’r cyfyngiadau rhieni
• nid yw byth yn dderbyniol i ddefnyddio iaith ymosodol neu fygythiol wrth gyfathrebu ar-lein
• dylai eich plentyn gymryd seibiant oddi wrth y cyfrifiadur bob 30 munud am resymau iechyd a diogelwch
• ni ddylai eich plentyn lwytho ffeiliau dieithr oddi ar y we heb eich caniatâd chi – mae’n well peidio byth â llwytho ffeiliau dieithr

• Rhwystro'ch plentyn rhag llwytho a rhannu ffeiliau ar y we yn anghyfreithlon

Peiriannau chwilio sy’n garedig at blant

Dylech sicrhau bod eich plentyn yn ymwybodol o beiriannau chwilio sy’n garedig at blant. Mae’r rhain yn ffiltro gwefannau amhriodol fel y gall plant chwilio’r rhyngrwyd yn ddiogel. Gall eich plentyn hefyd ddefnyddio peiriannau chwilio traddodiadol sydd â gosodiad chwilio diogel arnynt.

• Chwilotwyr sy'n garedig at blant gan WISE KIDS Opens new window

Rhoi terfyn ar seiberfwlio (bwlio ar-lein)

Dylai eich plentyn ddeall na ddylai fyth fod ag ofn dweud wrthych am negeseuon e-bost sy’n peri ofn neu sy’n bwlio, neu am negeseuon lle mae’r cynnwys yn annerbyniol. Nid bai eich plentyn ydyw ei fod wedi eu cael, a gallwch ychwanegu’r cyfeiriadau at restr ffiltro’r cyfyngiadau rhieni.

• Seiberfwlio: cadw eich plentyn yn ddiogel ar gyfrifiaduron a ffonau symudol

Diogelwch personol eich plentyn ar-lein

Mae’n bwysig bod eich plentyn yn deall y gallai rhai pobl ar-lein fod yn dweud celwydd ynghylch pwy ydynt, ac y gallent fod yn beryglus. Dylai hefyd fod yn ymwybodol y gall unrhyw wybodaeth bersonol y mae'n ei rhoi gael ei defnyddio mewn sgamiau ariannol neu ar gyfer bwlio.

Er mwyn cadw eich plentyn yn ddiogel, dylech ddweud wrtho am beidio â gwneud y canlynol:

• rhoi gwybodaeth bersonol i bobl y mae ond yn eu hadnabod ar-lein – mae hyn yn cynnwys ei enw, cyfeiriad ei gartref, rhif ffôn ei gartref a’i rif ffôn symudol, ei fanylion banc, ei rifau PIN a'i gyfrineiriau
• cyflwyno manylion ar gyfer cofrestru heb ofyn am ganiatâd a chymorth gennych chi
• ymweld â gwefannau sgwrsio nad ydynt wedi’u safoni/goruchwylio yn llawn
• trefnu i gyfarfod â ffrind ar-lein yn y cnawd heb i chi gael gwybod na heb eich caniatâd (os ydych chi’n caniatáu iddynt gyfarfod, dylech fynd gyda’ch plentyn bob amser)
• rhoi unrhyw awgrym o’i oedran na’i ryw mewn cyfeiriad e-bost personol neu mewn enw sgrin
• cadw unrhyw beth sy’n ei boeni neu’n gwneud iddo deimlo’n gynhyrfus ar-lein yn gyfrinach oddi wrthych
• ateb negeseuon e-bost na negeseuon eraill nad oedd yn dymuno’u cael

Gallwch fonitro defnydd eich plentyn o’r rhyngrwyd drwy edrych ar ffolder hanes eich porwr. Bydd yn cynnwys rhestr o wefannau yr ymwelwyd â hwy.

Os oes problem

Gobeithio y bydd y rheolau y byddwch yn eu gosod yn golygu y bydd eich plentyn yn gallu defnyddio’r rhyngrwyd yn ddiogel bob amser. Fodd bynnag, dylech hefyd wneud y pethau canlynol:

• cysylltu â’ch darparwr gwasanaethau rhyngrwyd os yw eich plentyn yn dod ar draws cynnwys amhriodol neu os oes rhywun anaddas yn cysylltu â’ch plentyn ar-lein
• gosod meddalwedd ffiltro a’i uwchraddio’n rheolaidd i warchod rhag defnydd amhriodol o’r rhyngrwyd

Os ydych chi’n bryderus ynghylch deunyddiau anghyfreithlon neu ymddygiad amheus ar-lein, cysylltwch â’r ganolfan Camfanteisio ar Blant a’u Hamddiffyn Ar-lein (CEOP).

• Canolfan Camfanteisio ar Blant a'u Hamddiffyn Ar-lein (CEOP)

Mwy o ddolenni defnyddiol

• Cyfrifiaduron a’r rhyngrwyd (adran cartref a chymuned)

• Dysgu mwy am ddiogelwch ar y rhyngrwyd ar Cross & Stitch ar gyfer plant Opens new window

• Gwefan Know IT All i rieni – cadw plant yn ddiogel ar-lein Opens new window

• Llwytho ‘Chwilio’r Rhyngrwyd a Diogelwch Plant' oddi ar y we (PDF, 548K) Opens new window

• Cymorth gyda ffeiliau PDF