Gwefan llywodraeth y DU

Pwysau heb lwyth

Pwysau heb lwyth unrhyw gerbyd yw pwysau'r cerbyd hwnnw pan na fydd ganddo unrhyw lwyth neu faich. Mae hyn:

• yn cynnwys yr holl gorff a'r darnau sy'n angenrheidiol neu'n cael eu defnyddio fel rheol gyda'r cerbyd neu’r ôl-gerbyd pan fydd ar y ffordd
• yn eithrio tanwydd ac, yn achos cerbyd a yrrir gan drydan, y batris

Uchafswm màs awdurdodedig

Pan ddefnyddir y term uchafswm màs awdurdodedig yng nghyd-destun trwyddedau gyrru, mae’n cyfeirio at bwysau uchaf cerbyd neu ôl-gerbyd, gan gynnwys y llwyth trymaf y gellir ei gario’n ddiogel wrth ddefnyddio’r cerbyd ar y ffordd. Gelwir hwn hefyd yn bwysau gros y cerbyd, neu’r pwysau mwyaf a ganiateir. Caiff ei nodi yn llawlyfr y perchennog ac fel arfer fe’i dangosir ar blât neu sticer sydd ar y cerbyd. Efallai y bydd y plât neu’r sticer yn dangos y pwysau tynnu gros hefyd.

Israddio’r plât

Os yw’n annhebygol y defnyddir y cerbyd i gario’r uchafswm pwysau posibl, efallai y caiff y plât ei israddio, fel bod pwysau llai’n cael ei nodi arno. Yn achos cerbyd nwyddau trwm, dylid ymgynghori â’r Asiantaeth Gwasanaethau Cerbydau a Gweithredwyr (VOSA) oherwydd VOSA sy’n dosbarthu plât y weinyddiaeth y mae’n rhaid ei gael ar y cerbyd. Ar gyfer cerbydau eraill, dylid cysylltu â’r gwneuthurwr.

Uchafswm Pwysau

Mae’r uchafswm y gall cerbydau, ôl-gerbydau a cherbydau cymalog ei bwyso wrth gael eu defnyddio wedi’i farcio ar blât y cerbyd neu ar dystysgrif blât y weinyddiaeth, a gellir dod o hyd iddo yn llawlyfr y perchennog. Yn achos rhai cerbydau, efallai y rhestrir yr uchafswm pwysau ar y dystysgrif cofrestru cerbyd (V5C) hefyd. Os oes gennych unrhyw amheuon am hyn, dylid cysylltu â gwneuthurwr y cerbyd neu’r ôl-gerbyd.