Gwefan llywodraeth y DU

Sut gall bylchau ymddangos yn eich cofnod Yswiriant Gwladol

Mae’n bosib y bydd bwlch yn eich cofnod o gyfraniadau am eich bod:

• wedi bod mewn cyflogaeth, ond yn ennill llai na'r terfyn enillion is o £97 yr wythnos (cyfraddau'r flwyddyn dreth 2010-11)
• wedi bod yn ddi-waith a ddim yn hawlio budd-daliadau
• wedi bod yn hunangyflogedig ac wedi'ch eithrio rhag gorfod talu cyfraniadau Yswiriant Gwladol Dosbarth 2 oherwydd eich bod wedi gwneud cais am ‘CA6812 tystysgrif Eithriad Enillion Isel’ ac wedi cael un – dilynwch y ddolen isod
• wedi bod yn byw dramor

Cyfnodau sy’n cael eu cynnwys yn y llythyr

Fel arfer, bydd llythyrau yn cael eu hanfon rhwng mis Medi a mis Ionawr. Byddant yn rhoi gwybod i chi am y canlynol:

• bylchau yn eich cofnod Yswiriant Gwladol ar gyfer y flwyddyn dreth ddwy flynedd yn ôl
• faint o ‘flynyddoedd cymhwyso’ sydd gennych chi eisoes, hyd at, ac yn cynnwys, y flwyddyn dreth cyn honno lle mae gennych chi fwlch ynddi

Er enghraifft, os byddwch yn cael llythyr rhwng mis Medi 2012 a mis Ionawr 2013 (blwyddyn dreth 2012-13) bydd yn rhoi gwybod i chi am unrhyw fylchau ym mlwyddyn dreth 2010-2011 a faint o flynyddoedd cymhwyso sydd gennych chi hyd at flwyddyn dreth 2009-10.

Blwyddyn gymhwyso yw blwyddyn dreth lle rydych chi wedi talu, neu'n cael eich trin fel eich bod wedi talu, neu lle rydych chi wedi cael eich credydu â digon o gyfraniadau Yswiriant Gwladol i gyfrif tuag at Bensiwn sylfaenol y Wladwriaeth a rhai budd-daliadau profedigaeth penodol.

Beth fydd angen i chi ei wneud pan gewch chi’r llythyr?

Dylech wneud yn siŵr bod yr wybodaeth yn eich llythyr yn gywir, cyn un ai:

• dweud wrth Gyllid a Thollau EM os ydych chi'n credu nad oes bwlch – gweler yr adran nesaf ynghylch beth i'w wneud os bydd yr wybodaeth yn eich llythyr yn anghywir
• penderfynu a ydych chi am dalu cyfraniadau Yswiriant Gwladol gwirfoddol i lenwi’r bwlch

Nid bil na gorchymyn i dalu yw’r llythyr. Felly, eich penderfyniad chi fydd a ydych chi am dalu cyfraniadau gwirfoddol i wneud i’r flwyddyn gyfrif tuag at fudd-daliadau’r Wladwriaeth. Ond os byddwch yn penderfynu peidio â llenwi'r bwlch, ni fydd y flwyddyn yn cyfrif tuag at eich budd-daliadau’r Wladwriaeth, hyd yn oed os ydych wedi talu rhai cyfraniadau ar gyfer y flwyddyn.

Gallwch gael rhagor o wybodaeth i’ch helpu i benderfynu a fyddech yn manteisio o dalu cyfraniadau gwirfoddol drwy ddilyn y ddolen isod. Byddwch hefyd yn canfod tablau i’ch helpu i gyfrifo effaith talu, neu beidio â thalu cyfraniadau gwirfoddol ar Bensiwn y Wladwriaeth.

• Oes angen i chi ychwanegu at eich cyfraniadau Yswiriant Gwladol?

Beth i’w wneud os bydd yr wybodaeth yn eich llythyr yn anghywir

Os ydych chi’n credu bod yr wybodaeth yn eich llythyr yn anghywir, dylech wneud un o’r canlynol:

• llenwi a dychwelyd ffurflen CA93A 'Bwlch yn eich cyfraniadau Yswiriant Gwladol – gwybodaeth ychwanegol', a fydd wedi'i amgáu â’ch llythyr
• cysylltu â Chyllid a Thollau EM ar 0845 915 5996 (llinellau ar agor rhwng 8.30 am a 5.00 pm, o ddydd Llun i ddydd Gwener a rhwng 8.00 am a 4.00 pm ar ddydd Sadwrn)

Os ydych chi’n byw dramor

Os ydych chi’n byw dramor, dylech wneud un o'r canlynol:

• llenwi’r adran ‘gwybodaeth ychwanegol’ yn eich llythyr a’i anfon i Gyllid a Thollau EM
• cysylltu â Chyllid a Thollau EM ar +44 191 203 7010 (llinellau ar agor rhwng 8.30 am a 5.00 pm, o ddydd Llun i ddydd Gwener)

Mwy o ddolenni defnyddiol

• Gweld y cyfraddau cyfredol ar gyfer Yswiriant Gwladol ar wefan Cyllid a Thollau EM Opens new window

• Credydau Yswiriant Gwladol