Gwefan llywodraeth y DU

Awgrymiadau ar gyfer llenwi'r Ffurflen Dreth Ymddiriedolaethau ac Ystadau

Mae’r awgrymiadau canlynol yn rhoi arweiniad cam-wrth-gam drwy rai o’r pwyntiau sy’n peri trafferth ar y Ffurflen Dreth Ymddiriedolaethau ac Ystadau – ffurflen SA900. Maent yn ddefnyddiol, ni waeth ai ffurflen bapur ynteu ffurflen ar-lein y byddwch yn ei llenwi.

A oes angen i chi lenwi’r ffurflen gyfan?

Ni fydd angen i chi lenwi’r Ffurflen Dreth Ymddiriedolaethau ac Ystadau gyfan os yw unrhyw un o’r datganiadau yng Ngham 1 ar dudalen 2 y ffurflen yn berthnasol i chi.

Os bydd datganiad yn berthnasol, rhowch dic yn y blwch priodol. Oni bai eich bod yn ymddiriedolwr ar ymddiriedolaeth elusennol, gallwch fynd ymlaen yn syth at gwestiynau 19, 20 a 21, sy’n trafod manylion cyswllt a gwybodaeth ymarferol arall. Yna, bydd rhaid i chi lenwi’r datganiad yng nghwestiwn 22.

Cwestiwn 23

Dim ond i gynrychiolwyr personol y mae cwestiwn 23, sy’n ymddangos rhwng cwestiynau 7 a 8, yn berthnasol. Gallwch chi anwybyddu'r cwestiwn hwn os ydych chi'n ymddiriedolwr.

Cwestiwn 8

Bydd rhaid i chi ateb pob cwestiwn drwy roi tic yn y blychau priodol. Os na wnewch chi, gallai Cyllid a Thollau EM anfon y ffurflen dreth yn ôl atoch er mwyn i chi ei llenwi.

Mae'r ffurflen wedi newid. Mae blychau 8.17 ac 8.18 – ynghylch a oes buddiolwr agored i niwed wedi’i dderbyn ai peidio – wedi cael eu hychwanegu. Os oeddech chi’n gyfarwydd â’r hen ffurflen, gwnewch yn siŵr eich bod yn llenwi’r blychau cywir.

Cwestiwn 9

Os oes gennych chi ymddiriedolaeth buddiant mewn meddiant a bod rhywfaint o’r incwm wedi cael ei drethu yn y dechrau, bydd angen i chi ddatgan hynny. Ni fydd angen i chi lenwi blychau 9.1 i 9.40 ar gyfer yr incwm hwn. Cofiwch, bydd angen i chi nodi’r incwm gros yng nghwestiwn 9.

Efallai y bydd yn dal angen i chi ateb cwestiynau 9.1 - 9.40 os bydd angen i chi gynnwys y credydau treth sydd ynghlwm wrth yr incwm, er mwyn gwneud cyfrifiadau yn nes ymlaen yn y ffurflen. Er enghraifft, i gyfrifo a yw treth wedi cael ei didynnu yn y ffynhonnell ar 80 y cant o’r incwm, ar gyfer taliadau ar gyfrif yn y dyfodol.

Blwch 9.6

Gall budd a gaiff ei rannu gael ei dderbyn yn ddi-dreth neu gyda threth wedi’i didynnu ar 20 y cant. Gwnewch yn siŵr eich bod yn rhoi’r ffigur cywir a bod y ffigurau cyfatebol ar y rhes hon yn gywir.

Blychau 9.15 i 9.23

Cofiwch gynnwys y credyd treth/treth dybiannol 10 y cant ym mlychau 9.16, 9.19 a 9.22. Rydych hefyd yn cynnwys y swm hwn yn y cyfanswm ym mlychau 9.17, 9.20 a 9.23.

Cwestiwn 9A

Rhaid i chi gynnwys swm y band cyfradd safonol oni bai fod y canlynol yn wir:

• does dim incwm ar y ffurflen na’r tudalennau atodol (gan anwybyddu enillion cyfalaf)
• nid yw'r incwm yn drethadwy ar y gyfradd arbennig ar gyfer ymddiriedolaethau (42.5 y cant ar gyfer difidendau neu 50 y cant ar gyfer pob incwm arall)
• mae gennych chi ymddiriedolaeth buddiant mewn meddiant a does dim wedi’i roi ym mlychau 9.29 – 9.31, 9.37A i 9.40, na 3.22 y tudalennau atodol ar gyfer Tir ac Eiddo
• mae gennych chi ymddiriedolaeth buddiant mewn meddiant a does dim wedi’i roi ym mlwch 4.4 y tudalennau atodol ar gyfer Incwm o Dramor – mae'r gyfradd ymddiriedolaeth yn berthnasol i unrhyw bremiymau trethadwy tramor

Cyfanswm y band cyfradd safonol sydd ar gael yw £1,000. Os yw’r setlwr wedi sefydlu dwy ymddiriedolaeth neu ragor, rhaid i’r swm hwn gael ei rannu'n gyfartal rhyngddynt – hyd at isafswm o £200 yr un.

Gallwch ddarllen rhagor am y band cyfradd safonol drwy ddilyn y ddolen isod.

• Treth ar wahanol fath o incwm ymddiriedolaeth

Cwestiwn 12

Os ydych chi’n llenwi’r Ffurflen Dreth Ymddiriedolaethau ac Ystadau ar gyfer ymddiriedolaeth newydd a bod manylion yr holl asedau gwreiddiol a setlwyd eisoes wedi cael eu dangos ar ffurflen 41G (Ymddiriedolaeth), ni fydd angen i chi ateb cwestiwn 12.

Cwestiwn 13

Dangoswch incwm fel gros a chostau fel net ar gyfer pob blwch yng nghwestiwn 13.

Cwestiwn 14 a Blwch 14.15

Dangoswch y taliadau net a wnaed i fuddiolwyr (sef y swm a dalwyd) a chynnwys unrhyw gronfa dreth a drosglwyddwyd o’r flwyddyn flaenorol ym mlwch 14.15. Os yw Cyllid a Thollau EM wedi anfon cyfrifiad treth atoch, byddwch yn gallu ei weld ar y dudalen grynodeb.

• Cronfeydd treth a help gyda chyfrifiadau cronfeydd treth

Cwestiwn 18

Dim ond os ydych am i ad-daliad gael ei wneud y dylech roi tic ger Ie. Peidiwch ag ateb y cwestiwn hwn os ydych am i unrhyw gredyd gael ei osod yn erbyn atebolrwydd yn y dyfodol. Cofiwch fod rhaid i'r ymddiriedolwr ddarparu llofnod er mwyn rhoi awdurdod i'r ad-daliad gael ei wneud i unrhyw un arall.

Cwestiwn 20

Os yw manylion yr ymddiriedolwyr wedi newid o gwbl, hyd yn oed os ydych chi wedi newid y cyfeiriad ar flaen y ffurflen, rhaid i chi ddatgan hynny. Dylech gadarnhau pwy fydd y prif ymddiriedolwr gweithredol.

Os byddwch yn llenwi ffurflen bapur

Osgoi camgymeriadau cyffredin

Gallwch osgoi gwneud camgymeriadau cyffredin drwy wneud y canlynol:

• ysgrifennu’n glir gan ddefnyddio inc glas neu ddu, ac ysgrifennu yn y mannau priodol yn unig
• peidiwch â chynnwys nodiadau ar y ffurflen, fel ‘i bob cyfrif' neu 'gwybodaeth i ddod'
• pan fydd gofyn i chi roi swm, defnyddiwch ddigidau yn unig (er enghraifft, defnyddiwch y ffigur 9, nid y gair ‘naw’)
• peidiwch â chynnwys ceiniogau – dylech dalgrynnu incwm ac enillion i lawr, a thalgrynnu credydau treth a didyniadau treth i fyny
• sicrhewch eich bod yn llofnodi’r ffurflen ac yn rhoi’r dyddiad arni
• gwnewch yn siŵr eich bod wedi llenwi ac wedi cynnwys unrhyw dudalennau atodol angenrheidiol
• darllenwch ffurflen SA950 – canllawiau ar gyfer llenwi’r Ffurflen Dreth Ymddiriedolaethau ac Ystadau

• Y Ffurflen Dreth Ymddiriedolaethau ac Ystadau, canllawiau a thudalennau atodol Opens new window

Defnyddio’r ffurflen sydd â’r cod bar cywir

Bydd gan eich Ffurflen Dreth Ymddiriedolaethau ac Ystadau god bar sydd yr un fath â'ch cyfeirnod trethdalwr unigryw (UTR) 10 digid. Rhaid i chi sicrhau eich bod yn defnyddio’r ffurflen gywir.

Peidiwch â defnyddio ffurflen rhywun arall, oherwydd gallai eich ffurflen chi fod wedi'i chofnodi yn erbyn yr UTR anghywir. Os ydych chi am anfon ffurflen bapur ac yn methu dod o hyd i’r un a gafodd ei hanfon atoch, gallwch gael un ar-lein gan Gyllid a Thollau EM.

• Y Ffurflen Dreth Ymddiriedolaethau ac Ystadau, canllawiau a thudalennau atodol Opens new window

Tudalennau atodol

Mae cwestiynau 1 i 7 ar y ffurflen dreth yn ymwneud â thudalennau atodol. Os ydych chi’n defnyddio unrhyw dudalennau atodol, cofiwch roi tic yn y blychau hyn a’r rheini yng nghwestiwn 22, gan eu bod yn rhoi gwybod i Gyllid a Thollau a oes unrhyw beth sydd heb ei gynnwys gyda’ch ffurflen dreth.

• Y Ffurflen Dreth Ymddiriedolaethau ac Ystadau, canllawiau a thudalennau atodol Opens new window

Mwy o ddolenni defnyddiol

• Cywiriadau i ffurflenni treth ac ad-daliadau

• Sut mae llenwi'r Ffurflen Dreth Ymddiriedolaethau ac Ystadau

Cysylltiadau defnyddiol

• Ymddiriedolaethau ac Ystadau Cyllid a Thollau EM