Gwefan llywodraeth y DU

Y penderfyniad am eich cais

Bydd rhywun nad yw'n feddyg yn y Gwasanaeth Anabledd a Gofalwyr (y 'swyddog gwneud penderfyniadau') yn ystyried yr adroddiad ochr yn ochr â'r holl wybodaeth arall a ddarparwyd ar gyfer eich cais ac yn penderfynu a ddylid cymeradwyo'ch cais ac ai'r gyfradd uchaf ynteu'r gyfradd isaf o'r Lwfans Gweini y mae gennych yr hawl iddi. Cewch lythyr yn nodi eu penderfyniad.

Cyfrinachedd

Bydd yr holl wybodaeth feddygol sy'n berthnasol i'ch cais, gan gynnwys adroddiad y meddyg o'r archwiliad meddygol, yn gyfrinachol ac ni chaiff ei rhyddhau i neb y tu allan i'r Adran Gwaith a Phensiynau.

Fodd bynnag, mae'n bosib y bydd y meddyg am anfon rhywfaint o wybodaeth am eich archwiliad meddygol at eich meddyg teulu. Dan yr amgylchiadau hynny, bydd y Gwasanaethau Meddygol yn ysgrifennu atoch ac yn gofyn a ydych chi'n fodlon iddynt wneud hynny.

Cael gwybod am y penderfyniad am eich budd-dal

Fel arfer, bydd angen oddeutu 22 diwrnod gwaith i brosesu cais am Lwfans Gweini, o'r diwrnod y bydd yr Adran Gwaith a Phensiynau'n derbyn eich ffurflen gais. Gallwch holi sut mae'ch cais yn dod yn ei flaen drwy alw'r llinell gymorth Anabledd.

Rhif ffôn: 08457 12 34 56

Ffôn testun: 08457 22 44 33

Mae'r llinellau ar agor rhwng 7.30 am a 6.30 pm o ddydd Llun i ddydd Gwener

E-bost: DBU-Customer-Service@dwp.gsi.gov.uk

Os nad ydych chi'n hapus â'r archwiliad meddygol

Os nad ydych chi'n hapus â'r ffordd y cafodd yr archwiliad meddygol ei gynnal, gallwch gwyno wrth y Gwasanaethau Meddygol. Esbonnir y drefn gwyno yn y llythyr gawsoch chi am eich archwiliad meddygol.

Cewch gwyno hefyd wrth y meddyg adeg yr archwiliad. Os na allant ddatrys y broblem, byddant yn rhoi taflen i chi'n esbonio'r drefn gwyno ffurfiol. Gallwch hefyd ffonio'r llinell gymorth Anabledd i ofyn am gyngor am sut i gwyno wrth y Gwasanaethau Meddygol.

Os nad ydych chi'n hapus â'r penderfyniad am eich budd-dal

Os ydych chi'n meddwl bod y penderfyniad am eich cais am Lwfans Gweini yn anghywir, neu os ydych chi'n anghytuno â faint a roddwyd i chi, gallwch wneud y canlynol:

• gofyn i'r swyddfa a wnaeth y penderfyniad ei esbonio
• gofyn am gael ailystyried y penderfyniad gan swyddog gwneud penderfyniadau arall
• apelio yn erbyn y penderfyniad i dribiwnlys annibynnol

• Sut i apelio yn erbyn penderfyniad ynghylch budd-daliadau

Adroddiad y meddyg

Cewch ofyn am gael copi o adroddiad y meddyg unrhyw bryd. Os byddwch chi'n apelio yn erbyn y penderfyniad am eich Lwfans Gweini, cewch weld adroddiad y meddyg fel rhan o'r broses apelio.

Archwiliadau meddygol pellach

Bydd eich dyfarniad o Lwfans Gweini naill ai am gyfnod penodol neu gyfnod amhenodol. Bydd y swyddog gwneud penderfyniadau yn pennu cyfnod eich lwfans gan ystyried ai anabledd neu salwch parhaol sydd gennych ynteu a fydd eich anghenion o bosib yn newid.

Os am gyfnod penodol y rhoddir eich lwfans i chi, fe'ch gwahoddir i wneud cais newydd chwe mis cyn i'r dyfarniad ddod i ben. Gelwir hyn yn ‘gais adnewyddu’. Prosesir ceisiadau adnewyddu yn yr un ffordd yn union â cheisiadau newydd, felly, mae'n bosib y gofynnir i chi fynychu archwiliad meddygol.

Os yw eich dyfarniad o fudd-dal am gyfnod amhenodol, gan amlaf, ni fydd yn rhaid i chi wneud cais adnewyddu. Fodd bynnag, weithiau, gellir adolygu dyfarniadau amhenodol, ac fe all fod yn rhaid i chi gael archwiliad meddygol arall fel rhan o'r adolygiad.

Mwy o ddolenni defnyddiol

• Cysylltiadau cymorth ariannol

• Lwfans Gweini